Jesús osẽ Jerusaléngui ha upévare pe Sanedrín ndaikatúi ojukauka chupe. Haʼe oho siuda de Efraínpe, opytáva noréste gotyo Jerusaléngui. Jesús opyta upépe idisipulokuérandi, mombyry porã iñenemigokuéragui (Juan 11:54). Péro pe Páskua áño 33-pegua og̃uahẽ potaitéma, upévare Jesús oviaha jeýtama. Ohokuévo ohasa Samáriarupi ha oarriva Galiléape. Upérõ Jesús ovisita upe lugár última ves omano mboyve.

Oñepyrũvo pe viáhe, Jesús ohasa diferénte puévlorupi, ha tapére ojotopa 10 lepróso ndive. Pe lépra ningo peteĩ mbaʼasy ndevaíva okarúva ñande roʼóre, tahaʼe ñane kuã, ñane pysã térã ñane nambíre (Números 12:10-12). Ñandejára Léi heʼi umi lepróso osapukái vaʼerãha: “¡Cherasy, cherasy!”, ha oiko vaʼerã haʼeño ha mombyry umi héntegui (Levítico 13:45, 46, NM).

Upévare umi 10 lepróso opytánte mombyrymi Jesúsgui, ha osapukái hikuái: “¡Jesús, Mboʼehára, oreporiahuverekomína!”. Haʼe ohechávo chupekuéra, heʼi: “Tapeho pejechauka umi saserdótepe” (Lucas 17:13, 14). Péicha Jesús ohechauka orrespetaha Ñandejára Léi, pórke upépe heʼi umi saserdóte odeklara vaʼerãha peteĩ lepróso okueramaha. Upéva ojejapo rirémante haʼekuéra ikatu jey oiko umi hénte hesãiva apytépe (Levítico 13:9-17).

Umi 10 lepróso ojerovia Jesús ikatuha ojapo peteĩ milágro. Upévare, ndokueráitiramo jepe, pyaʼe voi oho hikuái umi saserdóte rendápe. Haʼekuéra ningo ojeroviaiterei Jesúsre, upévare tapére okueráma imbaʼasýgui. ¡Ajépa ovyʼaiténe raʼe hikuái!

Umi 10 leprósogui, 9 osegi hape, péro peteĩva ojevy. Ko kuimbaʼe, haʼéva peteĩ samaritáno, ou jey oagradese hag̃ua Jesúspe omonguera haguére chupe. “Sapukaihápe ombotuicha Ñandejárape”, pórke ohechakuaa Ñandejára podér rupive haʼe okueraha (Lucas 17:15). Ha og̃uahẽvo Jesús rendápe, oñesũ henondépe ha oagradese chupe.

Jesús omaña ijerére ha heʼi: “¿Noñemonguerái piko raʼe diez kuimbaʼépe? ¿Moõ piko upéicharõ oime umi nueve? ¿Ko kuimbaʼe tetã ambuegua añoite piko ojevy ombotuicha hag̃ua Ñandejárape?”. Upéi heʼi pe samaritánope: “Epuʼã katu ha tereho, rejerovia rupi rekuera” (Lucas 17:17-19).

Jesús omonguerávo koʼã 10 leprósope, ohechauka Jehová oĩha hendive. Ha peteĩva umi 10 apytégui ndahaʼéi voi okueránteva imbaʼasýgui, síno orekóma avei peteĩ esperánsa iporãitereíva. Añetehápe ningo koʼã tiémpope Ñandejára ndojevaléi hína Jesúsre omonguera hag̃ua umi héntepe. Upéicharõ jepe, jajeroviáramo Jesúsre, ikatu hína jahupyty pe jeikove opaveʼỹva. ¿Jahechaukápa hína ñandeagradesidoha pe kuimbaʼe samaritánoicha?