Jesús osẽ kuri Peréagui, ha koʼág̃a og̃uahẽmbotaitéma Betániape, peteĩ puévlo opytáva 3 kilómetrorupi Jerusaléngui. Upérõ ohasáma cuatro día Lázaro omano hague. Lázaro ermanakuéra, haʼéva María ha Marta hasẽ gueteri hese, ha heta hénte ou okonsola chupekuéra.

Upéi oñemombeʼu Mártape Jesús ouha. Upévo haʼe pyaʼe oho hendápe, ha og̃uahẽvo Jesús oĩháme heʼi chupe: “Karai, reimérire koʼápe, che ermáno nomanói vaʼerãmoʼã”. Katuete ningo Marta ha iñermána hetáma opensáne raʼe upévare. Péro Marta ndoperdéi la esperánsa. Haʼe heʼi Jesúspe: “Aguerovia Ñandejára omeʼẽtaha ndéve oimeraẽ mbaʼe rejeruréva chupe” (Juan 11:21, 22). Marta opensa Jesús ikatuha gueteri oipytyvõ iñermánope.

Jesús opromete chupe: “Ne ermáno opuʼã jeýta”. ¿Mbaʼérehepa opensa Marta ohendúvo upéva? Abrahán ha umi ótro Ñandejára siérvo yma guare, oguereko vaʼekue esperánsa oikove jeytaha ko yvy ape ári, ha Marta opensa Jesús oñeʼẽ hague chupe upe rresurreksiónre. Upévare heʼi: “Che aikuaa oñemoingove jeytaha chupe pe ára pahápe” (Juan 11:23, 24).

Péro, ¿ikatúnepa Jesús koʼág̃ama voi ojapo álgo Lázaro rehehápe? Haʼe omomanduʼa Mártape Ñandejára omeʼẽha chupe podér omoingove jey hag̃ua umi omano vaʼekuépe. Haʼe heʼi: “Pe ojeroviáva cherehe omanóramo jepe oikove jeýta, ha entéro oikovéva ha ojeroviáva cherehe nomanomoʼãi arakaʼeve” (Juan 11:25, 26).

Jesús ndeʼíri Mártape entéro isegidór oikóva upe tiémpope núnka nomanomoʼãiha. Jaikuaaháicha, haʼe voi omano vaʼerã, heʼi haguéicha ijapostolkuérape (Mateo 16:21; 17:22, 23). Jesús ningo heʼisénte umi ojeroviáva hese ikatuha ohupyty jeikove opaveʼỹva. Hetaiterei oĩ ohupytýtava pe vída etérna orresusita rire. Péro oĩta avei heta ojesalvátava ko múndo aña oñehundi vove. Ha hesekuéra añetehápe oikóta Jesús heʼi vaʼekue: ¡nomanomoʼãi arakaʼeve! Tahaʼe haʼeháicha, opavave ojeroviáva Jesúsre oikovéta opa ára g̃uarã.

Jesús heʼi: “Che hína pe ñemoingove jey ha che rupive oikove jey umi hénte”. Péro, ¿ikatúpa omoingove jey Lázarope, ojapóramo jepe unos kuánto día omano hague? Jesús oporandu Mártape: “¿Ndépa reguerovia upéva?”. Marta heʼi: “Aguerovia Karai, che aguerovia nde haʼeha pe Cristo, Ñandejára Raʼy, Upe ojeʼe vaʼekue outaha ko múndope”. Marta ojerovia Jesúsre ha opensa voi ikatuha upepete ojapo álgo oipytyvõ hag̃ua iñermánope. Upévare pyaʼe oho ohenói iñermánape ha heʼi chupe kirirĩhaitépe: “Pe Mboʼehára oime ou ha nerenoika” (Juan 11:25-28). Upepete María osẽ pe ógagui ha umi ohecháva chupe oho hapykuéri oimoʼãgui ohoha pe sepultúrape, Lázaro oĩháme.

Péro María oho Jesús rendápe, oñesũ henondépe, hasẽ ha heʼi chupe iñermána heʼíma vaʼekue voi: “Karai, reimérire koʼápe, che ermáno nomanói vaʼerãmoʼã”. Jesús ohecha María ha umi hénte hasẽha, ha upéva oguapyeterei hese. Upémarõ haʼe oñembyasyeterei ha hasẽ avei. Upéva opokoiterei umi héntere, péro oĩ heʼíva: “Ko kuimbaʼe ningo omonguera kuri pe isiégo vaʼekuépe, ¿ndaikatúi piko raʼe ojapo avei oimeraẽ mbaʼe ani hag̃ua Lázaro omano?” (Juan 11:32, 37).