Primavéra áño 30-pe, ohasa rire pe Páskua, Jesús ha idisipulokuéra osẽ Jerusaléngui. Péro haʼekuéra ndohói Galiléape hogapekuéra, síno opytánte Judéarupi. Upépe ovautisa hikuái heta héntepe. Juan el Bautista ojapóma oikóvo peichagua tembiapo un áñorupi, ha oĩ gueteri unos kuánto idisípulo omoirũva chupe, amalisia pe rrío Jordán ypýrupi.

Añetehápe ningo Jesús ndovautisái avavépe, síno haʼe odirihi idisipulokuérape ikatu hag̃uáicha haʼekuéra oporovautisa. Upe tiémpope, Juan ha Jesús omboʼe umi hudíope oñarrepenti hag̃ua opeka haguére Ñandejára Léi kóntrape (Hechos 19:4).

Juan disipulokuéra ohecha Jesús ojapóva ha ndogustapái chupekuéra. Upémarõ oho ojekeha Juánpe: “Mboʼehára, ¿nemanduʼápa pe kuimbaʼe reñeʼẽ hague ha oĩva kuri nendive [...]? Oime oporovautisa hína ha umi hénte ohopa hendápe” (Juan 3:26). Péro Juan ndaipochýi upe haguére. Haʼe ovyʼa oho porã rupi Jesúspe ha oipota idisipulokuéra ovyʼa avei. Upévare heʼi chupekuéra: “Peẽ voi pehendu che haʼe hague: Che ndahaʼéi hína pe Cristo, péro añembou henonderã”. Ha upéi omombeʼu ko ehémplo porãite: “Pe omendáva pe nóviare, haʼe pe nóvio. Pe nóvio amígo katu oñemboʼy ijykére ha ovyʼaiterei ohendúvo pe nóvio oñeʼẽha. Upévare che avyʼaiterei” (Juan 3:28, 29).

Pe nóvio amígo ovyʼaháicha, Juan ovyʼa kuri opresentárõ guare idisipulokuéra Jesúspe ojapo unos kuánto mése. Juan disípulo apytégui oĩma oñepyrũva omoirũ Jesúspe, ha koʼãva upe rire orresivi espíritu sánto. Juan ningo oipota entéro idisipulokuéra omoirũ avei Jesúspe. Añetehápe, haʼe hína pe opreparáva pe tape ikatu hag̃uáicha Cristo okumpli porã hembiapo. Upévare heʼi: “Koʼẽ koʼẽre hetavéta umi omoirũva Crístope, péro chehegui katu saʼivéta ohóvo” (Juan 3:30).

Jesús disípulo hérava avei Juan, tiémpo rire omombeʼu moõguipa ou Jesús ha mbaʼépa ojapo ikatu hag̃uáicha yvyporakuéra ojesalva. Haʼe oskrivi: “Pe oúva yvatégui tuichave enterove umi ótrogui. [...] Pe Túva ohayhu pe Taʼýrape ha omoĩ opa mbaʼe ipoguýpe. Ojeroviáva pe Taʼýrare ohupytýta jeikove opaveʼỹva, pe naiñeʼẽrendúiva pe Taʼýrape katu ndohupytymoʼãi jeikove opaveʼỹva, ha Ñandejára pochy rendy opytáta hiʼári” (Juan 3:31, 35, 36). ¡Ajépa iñimportantete entéro oikuaa koʼã mbaʼe!

Juan el Bautista heʼi riremi hetavetaha umi omoirũva Crístope, péro saʼivetaha umi omoirũva chupe, rréi Herodes omoinge chupe kárselpe. Herodes oipeʼa kuri iñermáno Filípogui hembireko hérava Herodías, ha omenda hese. Juan heʼi opavave renondépe oĩ vaiha upe ojapóva, upévare Herodes oapresaka chupe. Jesús ohendúvo Juan oĩha kárselpe, oho Judéagui idisipulokuérandi ha “oike Galiléape” (Mateo 4:12; Marcos 1:14).