Jesús ojevautisa riremínte, Ñandejára espíritu ogueraha chupe Judea desiértope. Haʼe oreko heta mbaʼe opensa hag̃ua, pórke ojevautisávo “pe yvága ojavri” (Mateo 3:16). Upérõ haʼe imanduʼapaite umi mbaʼe oaprende ha ojapo vaʼekuére oĩrõ guare yvágape. Añetehápe oreko heta mbaʼe ojepyʼamongeta hag̃ua.

Oĩ aja pe desiértope 40 día ha 40 nóche, Jesús ndoʼúi mbaʼevete ha iñembyahyieterei. Upémarõ pe Aña oaprovecha isituasión ha ou omoñuhã hag̃ua chupe, ha heʼi: “Ndéramo añete Ñandejára raʼy, ejapo koʼã itágui pan” (Mateo 4:3). Péro Jesús oikuaa ndovaleiha oipuru ipodér omeʼẽ hag̃ua gústo ijupe. Upévare orrechasa Satanás heʼíva chupe.

Péro Satanás ndohejái chupe. Ojapo jey ótra kósa omoñuhã hag̃ua Jesúspe. Heʼi chupe ojepoi hag̃ua pe témplo murálla árigui. Péro Jesús ndojapói upéva oikuaa rupi Satanás oipotanteha ojechauka umi héntepe. Upéva rangue, Jesús osita Ñandejára Ñeʼẽ heʼíva ha ohechauka chupe ndovaleiha jajapo mbaʼeve jadesafia hag̃ua Jehovápe.

Péro Satanás noñerrendíri, oñehaʼã jey omoñuhã Jesúspe. Oipuru ipodér ohechaukapaite hag̃ua chupe “umi goviérno oĩva ko yvy ape ári ha umi mbaʼe porãita orekóva”, ha heʼi: “Koʼã mbaʼe ameʼẽmbaitéta ndéve reñesũramo che renondépe ha una vemi jepe chemombaʼeguasu”. Upepete Jesús heʼi chupe: “¡Tereho koʼágui Satanás!” (Mateo 4:8-10). Haʼe ndoʼái upe ñuhãme oikuaa porã rupi Jehovápe añoite oadora vaʼerãha. Jesús odesidi iñeʼẽrendu Ñandejárape.

Upéicharõ, ¿mbaʼépa ikatu ñaaprende koʼã mbohapy tentasióngui? Ñanemboʼe Satanás ndahaʼeiha peteĩ mbaʼe jarekóva ñande pyʼapýpe ha ñandegueraha vaíva, síno haʼe hína peteĩ persóna rreál ikatuʼỹva jahecha. Ñaaprende avei Satanás orekoha ipoguýpe umi goviérno oĩva ko múndope ha odominaha igustoitépe. Upéicha rupínte haʼe oikuaveʼẽ kuri Jesúspe umi goviérno.

Epensamína: pe Aña una vemínte oipota Jesús oadora chupe, ha opromete ontregataha chupe entéro umi goviérno oĩva ko yvy ape ári. Ñande kásope avei Satanás ikatu oikuaveʼẽ ñandéve heta pláta, térã peteĩ puésto iñimportánteva ko múndope. Péro omoĩramo jepe ñane renonderã opaichagua tentasión, jasegi vaʼerã Jesús ehémplo ha ñaneñeʼẽrendu Ñandejárape. Ñanemanduʼákena avei Satanás ojerretira hague ohechávo Jesús ndoʼaiha iñuhãme, péro opeska hese ou jey hag̃ua “ija vove chupe” (Lucas 4:13). Upeichaite avei ikatu ojapo ñanderehe. Upévare, aníkena jajedeskuida chugui.