Jesús oĩrõ guare Jerusalénpe Paskuarã, áño 30-pe, ojapo heta milágro. Upévare heta persóna oñepyrũ ojerovia hese. Peteĩ fariséo hérava Nicodemo ohenduseterei Jesúspe. Haʼe oĩ pe Sanedrínpe, haʼéva hína hudiokuéra trivunál iñimportantevéva. Nicodemo ndopytavaiséi umi líder hudíondi, ha okyhyje ojehechárõ g̃uarã chupe oñeʼẽ jave Jesúsndi. Upévare oho hendápe pyhare.

Nicodemo heʼi Jesúspe: “Mboʼehára, avave ningo ndaikatumoʼãi ojapo koʼã milágro nde rejapóva, Ñandejára noĩriramo hendive, upévare roikuaa nde haʼeha peteĩ mboʼehára rejúva Ñandejáragui”. Jesús katu heʼi chupe: “Peteĩ onase jeýva añoite ikatúta ohecha Ñandejára Rréino” (Juan 3:2, 3).

Nicodemo oporandu: “¿Mbaʼéicha piko peteĩ kuimbaʼe itujámava onase jeýta? Ndaikatumoʼãingo oike isy retepýpe ha onase jey, ¿ajépa?” (Juan 3:4).

Péro Jesús oexplika chupe peteĩ onase jeýva natekotevẽiha oike jey isy retepýpe. Haʼe heʼi: “Pe nonaséiva y ha espíritugui ndaikatumoʼãi oike Ñandejára Rréinope” (Juan 3:5). Jesús ojevautisárõ guare ha oguejy hiʼári espíritu sánto, onase vaʼekue “y ha espíritugui”. Upérõ guare Ñandejára heʼi yvága guive: “Kóva hína che Raʼy ahayhuetéva ha aguerohorýva” (Mateo 3:16, 17). Péicha Jehová ohechauka Jesúsgui oiko jeyha Itaʼýra yvagapegua, ha ikatutaha oike pe Rréinope. Upe rire, Pentekostés áño 33-pe, oñemeʼẽ avei espíritu sánto hetave persóna ojevautisávape. Péicha haʼekuéra onase jey ikatu hag̃uáicha oiko chuguikuéra Ñandejára raʼy oikótava yvágape (Hechos 2:1-4).

Nicodemo nontendeporãi umi mbaʼe Jesús oexplikáva chupe. Upémarõ Jesús omombeʼu chupe maʼerãpa haʼe ou ko yvy ape ári. Jesús heʼi: “Moisés ohupi haguéicha pe mbói pe desiértope, upéicha avei ojehupíta pe Yvypóra Raʼýpe, ikatu hag̃uáicha opavave ogueroviáva chupe ohupyty jeikove opaveʼỹva” (Juan 3:14, 15).

Umi isrraelítape oisuʼúrõ guare mbói pe desiértope, tekotevẽ vaʼekue omaña hikuái pe mbói de kóvrere ojesalva hag̃ua (Números 21:9). Upéicha avei entéro yvypóra ojerovia vaʼerã Ñandejára Raʼýre, ikatu hag̃uáicha ojesalva ñemanógui ha ohupyty hag̃ua jeikove opaveʼỹva. Jesús ohechauka Jehová ojapoha tekotevẽva guive ikatu hag̃uáicha oñekumpli upéva. Haʼe heʼi: “Ñandejára ohayhuetereígui pe múndo omeʼẽ Itaʼýra peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva” (Juan 3:16). Upérõ ojapo seis mése ramo Jesús oñepyrũ hague hembiapo ko yvy ári, ha omyesakãma haʼe rupive ojesalvaha yvyporakuérape.

Jesús heʼi avei Nicodémope: “Ñandejára nomboúi Itaʼýra ohusga hag̃ua pe múndope”. Upéva heʼise haʼe ndoúi hague okondena yvyporakuérape oñehundi hag̃ua. Upéva rangue, oñembou chupe “pe múndo ojesalva hag̃ua haʼe rupive” (Juan 3:17).

Nicodemo ou Jesús rendápe pyhare, okyhyjégui ojehechárõ g̃uarã chupe. Ha omohuʼãvo ikonversasión, Jesús heʼi chupe peteĩ mbaʼe iñimportantetereíva: “Pe mbaʼerendy (orrepresentáva Jesús oiko lája ha umi mbaʼe omboʼéva) ou ko múndope, péro umi kuimbaʼe hembiapo vai rupi ohayhu pytũmby ohayhu rangue pe mbaʼerendy. Upévare ojehusga chupekuéra. Pe hembiapo vaíva ndaijaʼéi pe  mbaʼerendýre ha nosẽi hesakãháme ani hag̃ua ojekuaa hembiapokue. Péro pe ojapóva iporãva ou hesakãháme, ojekuaa hag̃ua umi hembiapo ojejapoha Ñandejára oipotaháicha” (Juan 3:19-21).

Jahechaháicha, Jesús omyesakã Nicodémope mbaʼéichapa haʼe okumplíta Ñandejára rembipota. Koʼág̃a ko fariséo ha mboʼehára leipegua ikatúma odesidi ojepyʼamongetátapa Jesús heʼi vaʼekuére térãpa nahániri.