José omombáy Maríape omeʼẽ hag̃ua chupe peteĩ avíso urhénte. Jehová ánhel ojeaparese chupe iképe ha heʼi: “Epuʼã ejagarra pe mitã ha isýpe ha tapeho pekañy Egíptope. Pepyta upépe haʼe jey peve ndéve reju hag̃ua, cháke Herodes oheka hína pe mitãʼípe ojuka hag̃ua” (Mateo 2:13).

José, María ha Jesús, pyaʼe porã osẽ oho upe pyharépe voi. Haʼetépe ojapo hikuái upéva, pórke Herodes oikuaáma umi astrólogo ombotavy hague chupe ha oho jeymaha hetãme. Haʼekuéra ou jey vaʼerã kuri hendápe omombeʼu hag̃ua chupe moõpa oĩ Jesús. Upévare Herodes ipochyeterei. Ha ojukaségui Jesúspe, ojukauka entéro umi mitãkuimbaʼe orekóva guive dos áño térã michĩvéva, oikóva Belénpe ha umi siuda oĩvape ijerére. Haʼe okalkula upe eda imanduʼa rupi umi astrólogo heʼi vaʼekuére.

¡Ajépa ivaiete upe oikóva! Ndajaikuaái ningo mboy mitãmepa ojejukáne rakaʼe upérõ, péro katuete umi mitã sy heta hasẽ ha ojaheʼo. Upéva okumpli peteĩ profesía ohai vaʼekue Ñandejára proféta, hérava Jeremías (Jeremías 31:15).

José ha ifamília katu og̃uahẽ porãnte Egíptope ha opyta oiko upépe. Tiémpo rire, peteĩ pyharépe Jehová ánhel oñeʼẽ jey Josépe iképe, ha heʼi chupe: “Epuʼã ejagarra pe mitã ha isýpe, ha tereho Israélpe, omanóma umi oheka vaʼekue pe mitãme ojuka hag̃ua” (Mateo 2:20). Upémarõ José odesidi oho jey hetãme ifamília reheve. Péicha oñekumpli ótra profesía heʼíva Ñandejára Raʼy oñehenoitaha Egíptogui (Oseas 11:1).

Oiméne José opytase Judéape, Belén ypýpe jeýnte, oiko haguépe voi hikuái oho mboyve Egíptope. Péro ohendu rréi Herodes raʼy  iñañaitéva, hérava Arquelao, ogovernaha koʼág̃a Judea. Ha Ñandejára oavisa jey chupe iképe ikatuha ipeligróso upépe. Upémarõ José ha ifamília oviaha nórte gotyove ha opyta oiko siuda de Nazarétpe, oĩva Galiléape. Oho hikuái mombyry porã Jerusaléngui, pe lugár umi hudío ohohápe oadora hag̃ua. Jesús okakuaa upe puévlope, ha péicha oñekumpli ótra profesía heʼíva: “Oñehenóita chupe Nazaretgua” (Mateo 2:23).