Og̃uahẽma primavéra, ha José, ifamiliakuéra, umi ótro ihénte ha iñamigokuéra oviaha vaʼerã Jerusalénpe. Káda áño haʼekuéra oho upépe ofesteha hag̃ua pe Páskua, pe Léi heʼiháicha (Deuteronomio 16:16). Jerusalén opyta 120 kilómetrorupi Nazarétgui, ha enterovénte vyʼapópe ohaʼarõjoa pe arete oviaha hag̃ua. Upérõ Jesús oreko 12 áño. Ha haʼe avei oipotaitereíma og̃uahẽ pe Páskua ikatu hag̃uáicha oho jey pe témplope.

Jesús ha ihentekuéra ndohói Jerusalénpe un díante pe Paskuarã. Pórke al ótro día pe Páskua rire, oñepyrũ avei ojegueromanduʼa “pe Pan Ilevaduraʼỹva Arete”, ipukúva siete día (Marcos 14:12). Umi hudío omboarete koʼã fiésta ojoapykueriete. Normálmente pe viáhe ojapóva José ha ifamiliakuéra oho hag̃ua Jerusalénpe odura dos semánarupi, osẽ guive Nazarétgui oho jey peve hógape. Péro ko áñope hiʼareve hikuái oñepresenta rupi peteĩ provléma. Haʼekuéra ohechakuaa upéva osẽ riréma Jerusaléngui.

Oukuévo Jerusaléngui, José ha María oimoʼã Jesús oĩha umi ihénte ha iñamigokuérandi. Péro opytávo opytuʼu hag̃ua peteĩ lugárpe upe pyharépe, ohechakuaa hikuái Jesús noĩriha hendivekuéra. Upévare oñepyrũ oheka chupe, péro ndojuhúi mamove. Upémarõ, José ha María ojevy jey Jerusalénpe oheka hag̃ua Jesúspe.

Un día pukukue oheka chupe hikuái ha ndotopái hese. Pe ótro día upéicha jey. Péro pe tercer díape oho hikuái pe témplope. Upépe oheka chupe umi pasíllore, ha hasypeve otopa hese. Jesús oguapy hína umi mboʼehára hudío apytépe. Oporandu chupekuéra heta mbaʼe ha ojapysaka avei hesekuéra. Umi mboʼehára oñesorprende pórke oñemeʼẽ enkuénta Jesús oikuaaha heta mbaʼe.

María heʼi chupe: “Che memby, ¿mbaʼére piko péicha rejapo orerehe? Nde túva ha che ningo oretarovaite rohekávo” (Lucas 2:48).

Jesús oñesorprende, pórke haʼe opensa itúva ha isy oikuaataha moõpa oĩ. Upévare heʼi chupekuéra: “¿Maʼerã piko pechereka raʼe? ¿Ndapeikuaái piko aime vaʼerãha che Túva rógape?” (Lucas 2:49).

Koʼág̃a otopámarõ hese hikuái, Jesús oho jey José ha María ndive hógape Nazarétpe, ha osegi iñeʼẽrendu chupekuéra. Haʼe okakuaa ohóvo ha iñaranduve avei. Imitãramo jepe, Ñandejára ha umi hénte oguerohory chupe. Jahechaháicha, haʼe imitã guive omoĩ ehémplo porã omotenondévo Ñandejárape, ha avei orrespetávo ituvakuérape.