José ha María oho jey rangue Nazarétpe, opytánte Belénpe. Pe mitã orekóvo ocho día oñesirkunsida vaʼerã, heʼiháicha pe Léi Ñandejára omeʼẽ vaʼekue Israélpe (Levítico 12:2, 3). Upe tiémpope umi mitãʼípe oñembohéra avei ocho día onase haguépe. Upévare José ha María ombohéra Jesús pe mitãme, ánhel Gabriel omanda haguéicha chupekuéra.

Upéi ohasa mas de un mes, ha Jesús orekóma 40 día. ¿Moõpa ogueraha chupe ituvakuéra? Ogueraha pe témplope Jerusalénpe, namombyrýiva haʼekuéra oikohágui. Pe Léi heʼi 40 día onase haguépe peteĩ mitãkuimbaʼe, isy oikuaveʼẽ vaʼerãha peteĩ ofrénda pe témplope ikatu hag̃uáicha ipotĩ jey (Levítico 12:4-8).

María ojapo upéva, ha ogueraha mokõi guyraʼi oikuaveʼẽ hag̃ua pe témplope. Upéva ohechauka José ha María imboriahuha. Pe Léi heʼi vaʼekue ojesakrifika vaʼerãha peteĩ ovecha mácho de un áño ha peteĩ guyra. Péro pe sy imboriahúramo ha ndaikatúirõ oikuaveʼẽ pe ovecha, ikatu omeʼẽ mokõi tortóla, térã mokõi palomaraʼy. Ha María ojecha upe situasiónpe ha oikuaveʼẽ umi mokõi guyra mimi.

Pe témplope oñemboja José ha María rendápe peteĩ karai ijedámava hérava Simeón. Ñandejára oikuaauka vaʼekue chupe nomanomoʼãiha ohechaʼỹre Crístope, pe Mesías Jehová opromete vaʼekue. Upe díape, pe espíritu sánto ogia Simeónpe oho hag̃ua pe témplope oĩháme José, María ha pe mitã. Upépe Simeón ojagarra ohupi ijyva ári Jesúspe.

Haʼe ohupívo pe mitãme, oagradese Ñandejárape ha heʼi: “Mburuvicha Guasu Ijojahaʼỹva, koʼág̃a ne rembiguái ikatúma omano pyʼaguapýpe nde ere haguéicha; ahecháma rupi upe reiporútava reporosalva hag̃ua, reprepara vaʼekue opavave umi hénte renondépe. Haʼe hína peteĩ mbaʼerendy oipeʼátava pe pytũmby ojahoʼíva tetãnguérape, ha omimbítava umi Israelgua renondépe” (Lucas 2:29-32).

José ha María oponderaiterei ohendúvo koʼã mbaʼe. Upéi Simeón ovendesi chupekuéra, ha heʼi Maríape imembýre: “Oĩta heta Israelgua hoʼáva ikáusare ha oĩta opuʼãva”. Avei heʼi Maríape oñandutaha peteĩ espáda haimbéva oatravesarõguáicha chupe (Lucas 2:34).

Upe díape oĩ avei upépe peteĩ profetísa hérava Ana. Haʼe oreko 84 áño ha arakaʼeve ndofaltáiva pe témplope. Upe moméntope oñemboja José, María ha Jesús oĩháme. Ana oagradese Ñandejárape ha oñeʼẽ pe mitãre entéro umi héntepe.

¡Ajépa omokyreʼỹeténe raʼe José ha Maríape ohechávo koʼã mbaʼe oikóva pe témplope! Oime vaʼerã ohechakuaa hikuái pe mitã haʼenteha voi upe Ñandejára opromete vaʼekue omboutaha.