Koʼẽ rire, domingo 9 de nisán, Jesús ha idisipulokuéra osẽ Betániagui ha oho Jerusalén gotyo. Og̃uahẽmbotávo hikuái Betfaguépe, opytáva pe sérro Olivotýpe, Jesús heʼi mokõi idisípulope:

“Tapeho pe puévlo opytáva pene renondépe, ha peikévo petopáta peteĩ vúrro oñeñapytĩva ha peteĩ vurroraʼy hendive; pejora ha pegueru chéve. Ha oĩrõ oporandúva peẽme, peje chupe: ‘Ore Ruvicha oikotevẽ’. Ha upepete ohejáta pegueru” (Mateo 21:2, 3).

Ñepyrũrã umi disípulo ndopillái péva okumpliha peteĩ profesía oĩva la Bíbliape. Péro upéi ohechakuaa hikuái okumpli hague peteĩ profesía Zacarías ohai vaʼekue. Ko proféta heʼi kuri pe Rréi Ñandejára oprometéva iñumildetaha, ha oiketaha Jerusalénpe peteĩ “vurroraʼy ári” (Zacarías 9:9).

Umi disípulo oike Betfaguépe ha ojagarra pe vurroraʼy ha isy. Upévo umi oĩva upépe oporandu chupekuéra: “¿Mbaʼére piko pejora hína pe vurroraʼy?” (Marcos 11:5). Umi disípulo heʼi Jesús oipurutaha umi mymba, upémarõ umi hénte ohejánte chupekuéra ogueraha. Upéi umi disípulo omoĩ ijao joʼaha mokõive animál ári, péro Jesús ojupi pe vurroraʼy ári.

Jesús oho aja Jerusalén gotyo hetave hénte oñembyaty ijerére. Oĩ umi omoĩva ijao haperãme ha ótro katu omoĩ “yvyra rakã”. Umi hénte osapukái: “¡Ñandejára, esalvamína chupe! ¡Tojehovasa pe oúva Jehová rérape! ¡Ñandejára tohovasa ñande ru David Rréino oútava!” (Marcos 11:8-10). Umi hénte apytépe oĩ unos kuánto fariséo, ha ipochy hikuái ohendúvo la ojeʼéva. Upévare oho ojeplagea Jesúspe ha heʼi: “Mboʼehára, ejaʼo nde disipulokuérape”. Jesús ombohovái: “Koʼãva okirirĩramo, umi ita jepe osapukáine” (Lucas 19:39, 40).

Oñemoag̃uívo Jerusalén rehe, Jesús omaña pe siudáre ha hasẽ hese heʼívo: “Nde rehechakuaa vaʼerãmoʼã koestedía umi mbaʼe oguerútava ndéve pyʼaguapy..., péro koʼág̃a oñemokañy nde resa renondégui”. Umi hénte upepegua naiñeʼẽrenduséi Ñandejárape ha upévare ojecháta hendive. Jesús omombeʼu mbaʼéichatapa upéva: “Og̃uahẽta ára umi ne enemigokuéra omoĩtaha nde jerére umi yvyra akua, nemongoráta ha ndejopýta opáguio, haʼekuéra ndepetéta yvýre, ndéve ha ne membykuérape oĩva ndepype, ndohejamoʼãi ni peteĩ ita ojoʼári” (Lucas 19:42-44). Ha upeichaite oiko; áño 70-pe Jerusalén oñehundi.

Jesús oikévo Jerusalénpe, “umi hénte upepegua ipyʼatarovapa”. Haʼekuéra oporandujoa: “¿Máva piko kóva?”. Ha umi ótra hénte heʼi chupekuéra: “¡Kóva haʼe hína Jesús oúva Nazarétgui oĩva Galiléape. Haʼe hína pe proféta oñepromete vaʼekue outaha!” (Mateo 21:10, 11). Pe hénte atýpe oĩ umi ohecha vaʼekue Jesús omoingove jeýrõ guare Lázarope, ha omombeʼu upéva umi oikóvape Jerusalénpe. Umi fariséo ohechávo koʼã mbaʼe, oñelamenta nosẽi haguére chupekuéra mbaʼeve. Haʼekuéra heʼi: “¡Oĩva entéroko oho hapykuéri!” (Juan 12:18, 19).

Jesús oho témplope oporomboʼe hag̃ua, ojapoháicha jepi voi oĩ jave Jerusalénpe. Upépe oñemboja hendápe umi isiégo ha oguataʼỹva, ha haʼe omonguerapa chupekuéra. Umi mitã katu osapukaijoa: “¡Ñandejára, esalvamína David Raʼýpe!”. Umi saserdóte ruvichakuéra ha mboʼehára leipegua okairo ohechávo ha ohendúvo koʼã mbaʼe. Upémarõ oho heʼi Jesúspe: “¿Rehendu piko mbaʼépa la heʼíva hína hikuái?”. Jesús ombohovái: “Ahendu. ¿Ha ndapeleéiva piko arakaʼeve Ñandejára Ñeʼẽme heʼiha: ‘Umi mitãnguéra ha mitãraʼy jepe nemombaʼe’?” (Mateo 21:15, 16).

Jesús osegi oporomboʼe ha ojesareko umi mbaʼe oikóvare ijerére. Upéi kaʼarúma, upévare haʼe ha iñirũnguéra oho jey Betániape oñepyrũ mboyve pe día 10 de nisán. Haʼe opyta Betániape pe domingo pyhare.