Jesús osẽ Jericógui ha oho Betániape, opytáva 20 kilómetrorupi upégui. Pe viáhe ijetuʼu pórke arriváda memete. Jericó ningo opyta peteĩ lugár váhope, ha Betania katu ijalturahápe. Oiméne ñanemanduʼa Lázaro ha umi mokõi iñermána oikoha Betániape, opytáva 3 kilómetrorupi Jerusaléngui, éste gotyo pe Sérro Olivotýgui.

Heta hudío og̃uahẽma Jerusalénpe pe Paskuarã. Umíva ou voimi “oñemopotĩ hag̃ua pe Léi heʼiháicha”, oiméramo opoko raʼe peteĩ teʼonguére, térã ojapo ambue mbaʼe omongyʼáva chupekuéra Ñandejára renondépe (Juan 11:55; Números 9:6-10). Koʼã hénte ou voivéva apytégui, oĩ oñembyatýva pe témplope ha oñeporandujoa hikuái oúnepa Jesús pe Paskuarã (Juan 11:56).

Jerusalénpe umi hénte ojodiskutipa oñeʼẽvo Jesúsre. Unos kuánto líder rrelihióso ojagarrase ha ojukase chupe. Upévare omanda voi hikuái umi héntepe, oikuaáramo moõpa oĩ Jesús, pyaʼe tojeavisa chupekuéra “ojagarra hag̃ua chupe” (Juan 11:57). Koʼã líder rrelihióso ojukaséma voi kuri Jesúspe haʼe omoingove jeýrõ guare Lázarope (Juan 11:49-53). Upévare oĩ opensáva Jesús nosẽicheneha umi hénte apytépe.

Jesús og̃uahẽ Betániape pe viernes 7 de nisán, “seis día pe Páskua mboyve” (Juan 12:1). Upe díape, pe kuarahy oike rire, oñepyrũtama pe sábado 8 de nisán. Ha umi hudío léi oproivi ojeviaha sabadokue, upévare Jesús ndaikatumoʼãi kuri ou Jericógui upe díape. Upéicha rupi, haʼe og̃uahẽma oñepyrũ mboyve pe sábado. Oime vaʼerã jepiveguáicha, Jesús oho Lázaro rógape.

Peteĩ kuimbaʼe Betaniagua hérava Simón, oinvita Jesúspe, iñirũnguérape ha Lázarope osena hag̃ua hendive sábado pyhare. Simón ningo “ilépra vaʼekue”, ha oiméne Jesús voi omonguera rakaʼe chupe. Marta oĩ avei upépe ha jepiveguáicha, oñemoĩ oñatende umi invitádore. María katu oñatendeve Jesúsre, péro ko vuéltape ojapo peteĩ mbaʼe ndogustáiva algúnope.

María oavri peteĩ mbaʼyruʼi orekóva “médio lítrorupi aséite hyakuã asýva ojejapóva nárdo teetégui” (Juan 12:3). Peichagua aséite ningo hepyeterei; un áño de traváho repykue voi. María oñohẽ pe aséite Jesús akãre ha ipýre, ha omokã pe ipy iñakãraguépe. Pe aséite ryakuãngue ojagarrapaite pe óga.

Umi disípulo ohechávo upéva ipochy ha oporandu: “¿Mbaʼupe piko oñeñohẽ rei pe aséite hyakuã asýva?” (Marcos 14:4). Upépe Judas Iscariote osẽ heʼi: “¿Mbaʼére piko noñevendéi pe aséite hyakuã asýva trescientos denáriore ha oñemeʼẽ imboriahúvape?” (Juan 12:5). Péro añetehápe Judas ndojepyʼapýi umi  imboriahúvare. Haʼe ningo oñangareko pe pláta ryru orekóvare umi disípulo, ha omonda oikóvo upégui.

Upémarõ Jesús osẽ odefende Maríape ha heʼi: “¿Mbaʼére piko pemolestase ko kuñáme? Iporãiterei ningo pe ojapóva cherehe. Umi imboriahúva akóinte oĩ penendive, che katu naimemoʼãi penendive opa árare. Ko kuña omoĩvo cherehe ko aséite hyakuã asýva, oprepara che rete oñeñotỹ hag̃ua. Añetehápe haʼe peẽme: Oñemombeʼúvo umi marandu porã oparupiete ko yvy ape ári, oñemombeʼúta avei ko kuña ojapo vaʼekue, ojegueromanduʼa hag̃ua chupe” (Mateo 26:10-13).

Ojapóma mas de un día Jesús opyta hague Betániape, ha opárupi ojekuaáma oĩha upépe. Upévare heta persóna ou Simón rógape ohecha hag̃ua Jesúspe, ha avei ohecha hag̃ua Lázarope, “upe haʼe omopuʼã jey vaʼekue omanóva apytégui” (Juan 12:9). Upévare umi saserdóte prinsipál opensa Lázaro káusare hetave hénte ojeroviaha Jesúsre. Upémarõ okalkula mbaʼéichapa ikatu ojuka Jesúspe ha avei Lázarope. ¡Ajépa iñañaite hikuái!