Pedro ohendu Jesús omeʼẽha konsého ohechaukáva mbaʼéichapa ikatu ñasolusiona umi provléma ñande rapichándi. Péro oiméne Pedro oipota ojeʼe mboy vésepa añetehápe ikatu ñaperdona umi ofallávape.

Upémarõ oporandu: “¿Che Ruvicha, mboy vésepa aperdona vaʼerã che ermánope ofalláramo chendive? ¿Siete vése piko?”. Oĩ líder rrelihióso heʼíva tres vésente oñeperdona vaʼerãha. Upévare Pedro opensa ivuenoitereiha oporoperdonávo “siete vése” voi (Mateo 18:21).

Péro Jesús ohechauka naiporãiha ñakonta mboy vésepa ñaporoperdona. Upévare okorrehi Pédrope ha heʼi: “Ndaʼéi ndéve siete vése, setenta y siete vése voi katu” (Mateo 18:22). Upéicha Jesús ohechauka Pédrope siémpre oporoperdona vaʼerãha. Núnka ndeʼíri vaʼerã mboy vésepa oiporiahuverekóta iñermánope.

Upéi Jesús omombeʼu peteĩ ehémplo, ikatu hag̃uáicha Pedro ha umi ótro disípulo siémpre imanduʼa oporoperdona vaʼerãha. Pe ehémplo oñeʼẽ peteĩ esklávore ni michĩmi noñehaʼãiva osegi ipatrón ehémplo. Jesús heʼi oĩ hague peteĩ rréi ohenóiva hembiguaikuérape, ikatu hag̃uáicha opaga hikuái ideveha. Peteĩ esklávo odeve chupe 10.000 talénto (térã 60 millón denário). Upéva ningo hetaiterei pláta ha pe tembiguái ni mbaʼevéicharõ ndaikatumoʼãi opaga. Upémarõ pe rréi heʼi oñevende hag̃ua pe kuimbaʼépe, hembireko, itaʼyrakuéra ha opa orekóva, ikatu hag̃uáicha opaga chupe la odevéva. Upépe pe esklávo oñesũ henondépe ha ojerure asy pe rréipe: “Cheraʼarõmiéna sapyʼami, ha apagapaitéta ndéve la adevéva” (Mateo 18:26).

Pe rréi ombyasyeterei hembiguáipe, ha operdonambaite chupe pe déuda. Péro pe tembiguái osẽmírente upégui, otopa ótro esklávore odevéva chupe 100 denárionte. Pe kuimbaʼe ojagarra hapichápe ijajúragui, ojuvy chupe, ha heʼi: “Epagáke chéve la redevéva”. Péro pe ótro tembiguái oñesũ henondépe ha ojerure asy: “Cheraʼarõmiéna  ha apagapaitéta ndéve” (Mateo 18:28, 29). Upéicharõ jepe, haʼe ndoiporiahuverekói hapichápe, ha hiʼarive omondo voi chupe kárselpe opagapa peve la odevéva chupe. Jahechaháicha, pe tembiguái odeve hetave vaʼekue ndosegíri pe rréi ehémplo.

Jesús osegi omombeʼu pe ehémplo. Heʼi umi ótro tembiguái ohecha hague pe oikóva ha ohoha omombeʼu pe rréipe. Pe rréi katu ipochyeterei, ohenoika pe esklávo iñañávape ha heʼi chupe: “Nde tembiguái aña, che aheja reínte kuri ndéve nde deveha rejerure asýrõ guare chéve. ¿Ndaikatúi piko nde avei reiporiahuverekomi nde rapichápe, che roiporiahuvereko haguéicha?”. Pe rréi ipochyeterei hese, ha ontrega umi guárdiape ogueraha hag̃ua chupe kárselpe opagapa peve upe odevéva. Upéi Jesús omohuʼã pe ehémplo heʼívo: “Péicha avei ojapóta penderehe che Ru yvagapegua, napeperdonáiramo pende pyʼaite guive pene ermánope” (Mateo 18:32-35).

¡Ajépa ohechauka porãite Jesús mbaʼérepa tekotevẽ ñaporoperdona! Ñandejára ningo hetaiterei pekádoma ñaneperdona, hiʼarive ndaikatúi ni ñakonta mboy vésemapa ojapo upéva. Upéicharõ, umi mbaʼe ojapóva ñane ermanokuéra ñane kóntrape, vyroreieterei ñakomparáramo Jehová ojapóvare ñanderehehápe. Upévare, ¿mbaʼére piko ndaikatumoʼãi ñaperdona chupekuéra ofalláramo jepe heta vése ñanendive? Ñanemanduʼákena Jesús omboʼe hague pe Sermón del Móntepe jajerure vaʼerãha Ñandejárape: “Eperdona oréve upe rodevéva, ore roperdonaháicha avei umi odevévape oréve” (Mateo 6:12).