Hiʼag̃uimbaitéma hína pe Páskua áño 32-pegua. Jesús hetáma opredika Galiléape. Ha Ñandejára Léi omanda rupi, oiméne koʼág̃a ohóma Jerusalénpe Paskuarã. Péro haʼe oho kirirĩhaitépe, pórke umi hudío ojukase chupe (Juan 7:1). Upe rire, oho jey Galiléape.

Oiméne oĩ aja Capernáumpe, Jerusalén guive ou hendápe umi fariséo ha mboʼehára leipegua. ¿Maʼerãpa ou hikuái mombyryetégui? Pórke haʼekuéra oipota Jesús heʼi peteĩ mbaʼe oheja vaítava chupe, ha péicha ikatúta oakusa chupe hikuái nokumplíri haguére umi kostúmbre rrelihiósa. Upévare, umi líder rrelihióso oporandu: “¿Mbaʼére piko nde disipulokuéra omboyke umi ñande ru ypykue omboʼe vaʼekue? Por ehémplo, haʼekuéra ndojepohéiri okaru mboyve” (Mateo 15:2). Péro añetehápe Ñandejára nomandái vaʼekue peteĩ persóna ‘ojepohéi vaʼerãha ikódo peve’ okaru hag̃ua (Marcos 7:3). Upéicharõ jepe, umi fariséope g̃uarã ivaieterei ndojesegíriramo ko kostúmbre.

Jesús ndeʼíri chupekuéra mbaʼérepa idisipulokuéra ndosegíri upe kostúmbre. Upéva rangue, ohechauka umi fariséope haʼekuéra la nokumpliseiha Ñandejára Léi. Jesús heʼi: “¿Mbaʼére piko peẽ avei pemboyke Ñandejára mandamiénto, pejaposégui umi kuimbaʼe omboʼe vaʼekue? Por ehémplo, Ñandejára heʼi vaʼekue: ‘Emombaʼe nde ru ha nde sýpe’; ha: ‘Oñeʼẽ vaíva itúva térã isýre ojejuka vaʼerã’. Peẽ katu peje: ‘Oĩramo heʼíva itúva térã isýpe: “Opa mbaʼe arekóva roipytyvõ hag̃ua, ameʼẽmbáma rregáloramo Ñandejárape”, upe tapicha natekotevẽvéima omombaʼe itúvape’” (Mateo 15:3-6; Éxodo 20:12; 21:17).

Umi fariséo heʼi peteĩ persóna orekóramo pláta, yvy térã ambue mbaʼe ha omeʼẽ rregáloramo Ñandejárape, umi mbaʼerepy haʼéma témplope g̃uarã ha ndaikatuvéima ojepuru ótra kosarã. Upéicharõ jepe, pe persóna oreko gueteri ipodérpe pe pláta ha umi mbaʼerepy, ha añetehápe ikatu hína oipytyvõ ituvakuéra ijedávape. Péro umi fariséo omboʼe peteĩ taʼýra ikatunteha heʼi ikosakuéra haʼeha “corbán” (pe rregálo oñemeʼẽva Ñandejárape térã témplope g̃uarã). Upéicha pe taʼýra oñembotavýnte ha nokumplíri irresponsavilida (Marcos 7:11).

Ndareíri Jesús ipochy umi tekove aña oipuru vai haguére Ñandejára Léi. Haʼe heʼi chupekuéra: “Péicha peẽ pemboyke Ñandejára Ñeʼẽ pejaposégui pende rukuéra ypykue omboʼévante. Peẽ tekove rovamokõi, ndareíri proféta Isaías heʼi penderehe: ‘Koʼã hénte ijurúpente chemombaʼe, ikorasõ katu mombyry oĩ chehegui. Reiete chemombaʼeguasu hikuái, oikógui omboʼe kuimbaʼekuéra heʼívante haʼeramoguáicha che ñeʼẽ’”. Umi fariséo ndoikuaái mbaʼépa heʼíta. Upéi Jesús ojerure umi héntepe oñembojave hag̃ua hese, ha heʼi chupekuéra: “Pejapysakákena ha pentende koʼã mbaʼe: Yvypórape nomongyʼái umi mbaʼe hoʼúva, síno pe osẽva ijurúgui hína la omongyʼáva chupe” (Mateo 15:6-11; Isaías 29:13).

Upéi, oĩ aja hikuái peteĩ ógape, umi disípulo oporandu Jesúspe: “¿Repilla piko umi fariséo ipochy hague pe ere vaʼekuére?”. Haʼe heʼi chupekuéra: “Entéro yvyramáta che Ru yvagapegua noñotỹi vaʼekue, ojehapoʼo vaʼerã. Pehejána chupekuéra. Haʼekuéra ndohechái mbaʼeve, ha upéicharamo jepe ohechauka haperã ótrope. Upévare, peteĩ siégo oisãmbyhýramo ótro siégope, mokõivéva hoʼáta peteĩ yvykuápe” (Mateo 15:12-14).

Pedro ojerure Jesús omyesakã hag̃ua chupekuéra mbaʼépa la omongyʼáva yvyporakuérape. Upémarõ Jesús heʼi: “¿Ndapehechakuaái piko umi mbaʼe hoʼúva peteĩ kuimbaʼe ohasaha ohóvo hyekuérupi, ha upéi osẽ jeyha? Péro umi mbaʼe osẽva ijurúgui, ou ikorasõgui, ha umíva  omongyʼa chupe. Yvypóra korasõgui osẽ umi mbaʼe vai ojaposéva, jejuka, ñemoakãratĩ, tekovai, ñemonda, japu ha ñeʼẽ vai ótrore. Koʼã mbaʼe hína la omongyʼáva yvyporakuérape, ndahaʼéi okaru haguére ojepoheiʼỹre” (Mateo 15:17-20).

Añetehápe ningo Jesús nomboʼéi hína chupekuéra natekotevẽiha ipotĩ. Haʼe ndeʼíri ndovaleiha jajepohéi ñañekosina térã jakaru mboyve. Upéva rangue, omongavaju umi líder rrelihióso rovamokõime omboyke haguére Ñandejára Léi porãite, ha osegi umi kostúmbre yvypórante omoĩva. Jahechaháicha, la añetehápe omongyʼáva peteĩ persónape haʼe hína umi mbaʼe vai osẽva ikorasõgui.