Jesús omombeʼu hína kuri mbaʼéicha vaʼerãpa opavave omoirũva chupe, ha oipuru kómo ehémplo peteĩ mitãme, pórke haʼekuéra iñumílde. Haʼe heʼi: “Oimeraẽ orresivíva peteĩ mitãmi koichaguápe che rérape, chéve avei cherresivi hína” (Mateo 18:5).

Upe mboyve, umi apóstol ojodiskuti hína kuri opensa rupi oĩha ijapytepekuéra iñimportantevéva. Upévare oime vaʼerã oimoʼã hikuái Jesús omongavajuha chupekuéra. Péro koʼág̃a apóstol Juan omombeʼu peteĩ mbaʼe oikóva upe rire. Haʼe heʼi: “Mboʼehára, rohecha kuri peteĩ kuimbaʼe oiporúva nde réra omosẽ hag̃ua umi demónio, ha rojokosemoʼã chupe nañanemoirũi haguére” (Lucas 9:49).

Amalisia Juan opensa umi apóstol añoite orekoha autorida omonguera hag̃ua umi héntepe ha omosẽ hag̃ua umi demónio. Péro, ¿mbaʼéicha rupípa pe kuimbaʼe hudío ikatu avei omosẽ demónio umi héntegui? Oime vaʼerã Juan opensa ko kuimbaʼe ndojapói vaʼerãha milágro pórke nomoirũi chupekuéra.

Péro Jesús osẽ heʼi Juánpe: “Ani pejokosétei chupe, ndaipóri avave ojapóva milágro che rérape ikatúva upéi oñeʼẽ vai cherehe. Pe noñemoĩriva ñanderehe ningo oĩ ñanendive. Ha oimeraẽ omeʼẽva peẽme y roʼysãmi jepe, peẽ haʼe haguére Cristo disípulo, añetehápe haʼe peẽme: katuete oñemeʼẽne chupe irregálo” (Marcos 9:39-41).

Pe kuimbaʼe ningo natekotevẽi kuri omoirũ Jesúspe haʼe hag̃ua isegidór. Upérõ neʼĩra gueteri oñepyrũ pe kongregasión, upévare pe kuimbaʼe noĩriramo jepe igrupopekuéra, ndeʼiséi oĩha ótro grúpope, térã omoñepyrũtaha peteĩ rrelihión fálsa. Pe kuimbaʼe añetehápe ojerovia Jesúsre ha upévare ikatu omosẽ umi demónio. Umi mbaʼe Jesús heʼíva hese, ohechauka pe kuimbaʼe orresivitaha irrekompénsa.

Avei, ivaietereíta pe kuimbaʼe oúramo otropesa umi apóstol káusare. Upévare Jesús heʼi: “Oimeraẽ omoñepysangáva peteĩva koʼã michĩvévape ojeroviáva cherehe, iporãve vaʼerã voi oñeñapytĩramo ijajúrare peteĩ ita guasu ha upéi ojepoi márpe” (Marcos 9:42). Upéicha Jesús ontendeka isegidorkuérape oñatende vaʼerãha ani hag̃ua ombotropesa avavépe. Heʼi avei ikuentaveha peteĩ persóna otrosa ipo, ipy térã operde hesa, koʼã mbaʼe ostorvátaramo chupe oike hag̃ua Ñandejára Rréinope. Ani ág̃a ndojaposéi haguére upéva ojepoi chupe Gehénape (peteĩ lugár ojehapyhápe yty, opytáva ag̃ui Jerusaléngui, oñehenóiva avei Valle de Hinón). Umi apóstol ningo katuete oikuaáne ko lugár, upévare ontende hikuái orrepresentaha destruksión etérna.

Jesús oavisa porã avei chupekuéra: “Aníkena peapoʼi ni peteĩva koʼã michĩvévape. Cháke añetehápe haʼe peẽme, umi ánhel oñangarekóva hesekuéra, akóinte oĩ che Ru yvagapegua renondépe”. Upe rire, ohechauka hag̃ua umi ‘michĩvéva’  ivaliosoitereiha, omombeʼu peteĩ ehémplo. Heʼi peteĩ kuimbaʼe orekoha 100 ovecha, upéi okañy hague chugui peteĩ, péro pe kuimbaʼe orekóramo jepe 99 ovecha, ovyʼaiteve ojuhúvo pe peteĩmi okañy vaʼekue. Upe rire Jesús heʼi: “Upéicha avei, che Ru oĩva yvágape ndoipotái oñehundi ni peteĩ koʼã michĩvéva jepe” (Mateo 18:10, 14).

Oiméne Jesús imanduʼa umi apóstol ojodiskuti hague, ajeve heʼi: “Perekóke juky pende pype ha akóinte peiko pyʼaguapýpe oñondive” (Marcos 9:50). Pe juky ningo omboheve umi tembiʼu. Upéicha avei ñane ñeʼẽ ijukýramo, ñande rapichakuéra ñanerendusevéta, ha avei jajogueraha porãvéta entérondi (Colosenses 4:6).

Péro sapyʼánte jaiko vai ñande rapichándi. Jesús heʼi mbaʼépa jajapo vaʼerã upéicha jave: “Ne ermáno opekáramo, tereho ha pene añoháme ehechauka chupe mbaʼépepa ofalla. Nerendúramo, reipytyvõ chupe oho jey hag̃ua tape porãre”. ¿Péro mbaʼépa jajapokuaa nopenáirõ ñanderehe? Jesús heʼi: “Egueraha nendive peteĩ térã mokõime, ikatu hag̃uáicha mokõi térã mbohapy testígo heʼíva rupive, ojekuaa añetépa opa ojeʼéva”. Último kásope, Jesús heʼi ñañeʼẽ vaʼerãha “kongregasiónpe”. Péva heʼise ñañeʼẽ vaʼerãha umi ansiánondi, ikatúva ohusga pe provléma. Pe opekáva nohenduséiramo ni chupekuéra, Jesús heʼi: “Etrata chupe tetã ambueguáramo ha impuésto kovraháramo”. Umi hudío ningo ndojeheʼái vaʼekue koʼã persónare (Mateo 18:15-17).

Umi ansiáno osegi vaʼerã la Biblia heʼíva odesidíta jave koʼã kásope. Jesús heʼi: “Oimeraẽ mbaʼe peñapytĩva ko yvýpe, umíva oñeñapytĩma yvágape. Ha oimeraẽ mbaʼe pejoráva ko yvýpe, umíva ojejoráma yvágape”. ¿Mbaʼépa heʼise koʼã mbaʼe? Umi ansiáno ohecháramo pe persóna opekáva noñarrepentiriha ha tekotevẽha ojekorrehi chupe, ojapo vaʼerã upéva, pórke yvágape ojedesidíma upéicha. Koʼã mbaʼe Jesús heʼi vaʼekue ideprovéchota kuri oñeforma vove umi kongregasión. Oñepresenta vove koʼãichagua káso, Jesús heʼi: “Oĩháme mokõi térã mbohapy oñembyatýva che rérape, che avei aime upépe ijapytepekuéra” (Mateo 18:18-20).