Jesús apostolkuéra opredika aja Galiléare, Juan el Bautista, pe kuimbaʼe oprepara vaʼekue pe tape Jesúspe g̃uarã, oĩ préso. Ojapóma haimete dos áño haʼe oĩ hague kárselpe.

Juan heʼi kuri entéro rovake oĩ vaiha Herodes Antipas omenda Herodíasre, iñermáno Felipe rembireko. Herodes ojedivorsia hembireko ypykuégui omenda hag̃ua Herodíasre. Herodes ningo heʼi okumpliha pe Léi Mosáika, péro upe Léi poguýpe imatrimónio ndovaléi, ha hiʼarive haʼe otraisiona kuri hembirekópe. Upévare, Juan heʼírõ guare oĩ vaiha la ojapóva, Herodes omoinge chupe kárselpe, oiméne Herodías voi omboligágui chupe.

Herodes ndoikuaái mbaʼépa ojapóta Juángui, “enterovénte ogueroviágui Juan haʼeha proféta” (Mateo 14:5). Péro Herodías “ndaijaʼeiete voi” hese, ha oheka oportunida ojukauka hag̃ua chupe (Marcos 6:19). Hasypeve koʼág̃a oñepresenta upe oportunida.

Oiko mboyvemi pe Páskua áño 32-pe, Herodes ojapo peteĩ fiésta ndetuicháva ikumpleáñore. Oinvita entéro umi orekóvape autorida, umi mburuvicha ehersitopegua ha umi kuimbaʼe iñimportantevéva Galileagua. Pe fiésta aja, Herodías membykuña hérava Salomé, ojeroky chupekuéra. Haʼe hína Felipe rajy, Herodías ména ypykue. Ha entéro umi kuimbaʼe oĩva upe fiéstape oguerohoryeterei Salomé ojeroky lája.

Herodes ovyʼaiterei avei ha heʼi itajyrangápe: “Ejerure chéve reipotáva ha ameʼẽta ndéve”. Ohura voi chupe: “Oimeraẽ mbaʼe rejeruréva ameʼẽta ndéve, che rréino jepe ambojaʼóne ndéve”. Upémarõ Salomé oho oporandu isýpe: “¿Mbaʼéiko la ajerurétava?” (Marcos 6:22-24).

Upéva hína pe oportunida Herodías ohaʼarõ vaʼekue. Ni ndahesapirĩri heʼi hag̃ua imembykuñáme: “Juan el Bautista akãngue”. Pyaʼe porã Salomé oho Herodes rendápe ha ojerure: “Aipota regueru chéve koʼag̃aite peteĩ vandéhape Juan el Bautista akã” (Marcos 6:24, 25).

Herodes ombyasyeterei ohendúvo upéva, péro iñinvitadokuéra ohendu kuri ohura hague Salomépe, ha nopyrũséi iñeʼẽre. Oikuaa oñemotĩtaha nokumplíriramo heʼi vaʼekue, ojukátaramo jepe peteĩ kuimbaʼe inoséntepe. Upémarõ Herodes omondo pyaʼe porã peteĩ guárdiape ha heʼi chupe mbaʼépa ojapo vaʼerã. Upe riremínte pe guárdia ogueru Juan akãngue peteĩ vandéhape, omeʼẽ Salomépe ha haʼe ogueraha isýpe.

Juan disipulokuéra oikuaávo upéva, ou ogueraha hetekue oñotỹ hag̃ua, ha upéi omombeʼu hikuái Jesúspe la oiko vaʼekue.

Upéi Herodes ohendu Jesús omongueraha oikóvo umi hasývape ha omosẽha demónio, ha oñepyrũ ojepyʼapy. Haʼe okyhyje oimérõ g̃uarã Jesús haʼe hína Juan, ‘opuʼã jeýva omanóva apytégui’ (Lucas 9:7). Upévare Herodes Antipas ohechaseterei Jesúspe, péro ndahaʼéi ohenduségui opredikávo, síno oikuaa hag̃uánte ndahaʼéipa hína Juan el Bautista.