Omonguera riremi pe ofisiál del ehérsito rembiguáipe, Jesús oho Naín gotyo. Upe siuda opyta 32 kilómetrorupi Capernáumgui, jahávo suroéste gotyo. Upérõ idisipulokuéra ha heta hénte oho hendive. Oiméne pytũmbotáma og̃uahẽvo ohóvo hikuái Naínpe. Upépe otopa hikuái umi hénte Naingua oguerahaha hína oñotỹ hag̃ua peteĩ mitãrusu omano vaʼekuépe.

Ñande pyʼa ningo hoʼa yvýre ñapensávo pe mitãrusu sy ohasávare hína. Haʼéngo viúda ha koʼág̃a omano chugui imemby peteĩmi. Omanórõ guare iména, pe kuñakarai oñekonsola opensávo orekoitiha imembýpe. Haʼe oreko kuri hese esperánsa, pórke oipytyvõta chupe ha oñangarekóta hese. Péro koʼág̃a omano chugui imemby ha opyta anga haʼeño peteĩ. ¿Máva piko ikatúta okonsola ha omoirũmi chupe?

Jesús ohechávo pe kuñakaraimíme, ombyasyeterei chupe, pórke ontende mbaʼeichaitépa oñeñandu ha opytaha haʼeñoite anga. Upévare heʼi chupe: “Anivéna nerasẽ”. Iñeʼẽre ojekuaa ombyasyha pe viúdape ha oipotaha ojerovia hese. Upéi Jesús oñemboja ha opoko pe kamíllare ojeguerahahápe pe omanóva (Lucas 7:13, 14). Upéva ningo osorprende umi héntepe, ha opytapaite hikuái. Entéronte oñeporandujoa mbaʼépa oiméne ojapóta.

Umi omoirũva Jesúspe ohecháma chupe ojapóvo heta milágro, por ehémplo omonguerávo umi hasývape. Péro oiméne núnka ndohecháiva omoingove jeývo peteĩ omanóvape. Oikuaáramo jepe hikuái ymave oikóma hague rresurreksión, ¿ikatúnepa Jesús ojapo upéva? (1 Reyes 17:17-23; 2 Reyes 4:32-37.) Jesús oñeʼẽ pe omanóvape ha heʼi chupe: “Mitãrusu, che haʼe ndéve: ¡Epuʼã!” (Lucas 7:14). Ha pe omanóva oguapy ha oñepyrũ oñeʼẽ, ha Jesús ontrega isýpe. ¡Pe kuñakarai ningo ovyʼaiterei!

Umi hénte ohechávo pe mitãrusu añetehápe oikove jey hague, oñepyrũ ombotuicha Jehovápe,  pe omeʼẽva ñandéve vída, ha heʼi: “Peteĩ proféta ipoderósova oñemopuʼã ñande apytépe”. Ótro katu ohechakuaa tuichaiterei mbaʼeha la ojapóva Jesús, ha heʼi: “Ñandejára imanduʼa ipuévlore” (Lucas 7:16). Ko mbaʼe guasuete oikóva, pyaʼeterei isarambi Naín jerére. Ha oiméne ojekuaa avei Nazarétpe, Jesús válle, opytáva nueve kilómetrorupi upégui. Avei ko notísia isarambi sur gotyo, Judea tuichakuére.

Juan el Bautista katu oĩ gueteri kárselpe ha oikuaaseve umi mbaʼe Jesús ojapóva. Juan disipulokuéra oho omombeʼu chupe umi milágro. ¿Mbaʼépa heʼi haʼe?