Ojapo dos áño Jesús oñepyrũ hague opredika, ha oñemeʼẽmbaite ko tembiapópe. ¿Mbaʼépa ojapóta koʼág̃a? ¿Opytuʼútapa ha opredika saʼimiénte? Nahániri. “Jesús okorre umi siuda ha puévlore [Galiléape], omboʼe umi sinagogahárupi ha omombeʼu pe marandu porã oñeʼẽva Ñandejára Rréinore. Avei omonguera opaichagua mbaʼasy.” (Mateo 9:35.) Umi mbaʼe Jesús ohecháva pe okorrehárupi, oipytyvõ chupe oñemeʼẽ hag̃ua enkuénta koʼytevéntema tekotevẽha opredika. Péro, ¿mbaʼéichapa ojapóta upéva?

Oho ohohápente, Jesús ohecha umi hénte oikotevẽha konsuélo ha oñemoag̃ui vaʼerãha Ñandejárare. Ojogua hikuái ovecha herekuaʼỹvape, oiko asy ha isarambipávape, ha Jesús oiporiahuvereko chupekuéra. Upévare heʼi idisipulokuérape: “Hetaiterei oĩ pe kóga oñemonoʼõ vaʼerã, umi omonoʼõva katu saʼi. Upévare, pejerurékena pe kóga Járape tombou hetave omonoʼõ vaʼerã ikóga” (Mateo 9:37, 38).

Jesús oikuaa mbaʼépa ojapóta oipytyvõ hag̃ua umi héntepe. Ohenói umi 12 apóstolpe ha omondo chupekuéra de a dos opredika hag̃ua, ha heʼi: “Aníkena peho umi tetã ambueguápe, ha ani peike umi siuda oĩva Samáriape. Upéva rangue, tapeho meme peheka umi ovecha Israelgua okañy vaʼekue. Pehokuévo, pepredika pehóvo ha peje: ‘Pe Rréino yvagapegua hiʼag̃uimbaitéma’” (Mateo 10:5-7).

Jesús omboʼe kuri chupekuéra opredika hag̃ua pe Rréino, ojejeruréva pe padrenuéstrope.  Haʼekuéra ikatu heʼi ‘pe Rréino yvagapegua hiʼag̃uimbaitemaha’ pórke oĩ hendivekuéra Jesucristo, pe Rréi Ñandejára oiporavo vaʼekue. ¿Mbaʼéichapa umi disípulo ohechaukáta orrepresentaha ko goviérno? Jesús omeʼẽ chupekuéra podér omonguera hag̃ua hasývape ha omoingove jey hag̃ua omanóvape, péro ndokovrái vaʼerã hikuái umi mbaʼére. ¿Mbaʼéichapa upéicharõ umi apóstol ikatúta ohupyty hemikotevẽ, por ehémplo hoʼumi vaʼerã káda día?

Jesús heʼi idisipulokuérape natekotevẽiha oprepara heta kósa oho hag̃ua opredika. Ndoguerahái vaʼerã ivolsónpe óro, pláta térã kóvre. Ni natekotevẽi ogueraha imatúla tapére g̃uarã, ao de rremúda térã sandália. ¿Mbaʼérepa? Jesús heʼi: “Pe ombaʼapóva, oreko derécho oñemeʼẽvo chupe hembiʼurã” (Mateo 10:10). Umi hénte oguerohorýva pe marandu porã omeʼẽta chupekuéra umi mbaʼe oikotevẽva. Jesús heʼi voi: “Mamo pehohápe, peg̃uahẽvo peteĩ ógape, pepyta upépe pesẽ jey peve upégui” (Marcos 6:10).

Jesús omboʼe avei chupekuéra mbaʼéichapa omombeʼu vaʼerã umi ogajárape pe marandu porã oñeʼẽva pe Rréinore. Haʼe heʼi: “Peg̃uahẽvo peteĩ ógape, pesaluda umi hénte oikóva pe ógape. Penemog̃uahẽramo hikuái, og̃uahẽta chupekuéra pende pyʼaguapy. Napenemog̃uahẽiramo katu, pe pyʼaguapy ou jeýta penendive. Ha oĩháme napenderresiviséiva ha napenerenduséiva, pesẽvo upe óga térã upe siudágui peityvyro pende pýgui pe yvytimbo” (Mateo 10:12-14).

Ikatu avei oĩ umi siuda térã puévlo noñehenduseihápe pe marandu porã. ¿Mbaʼéichapa opytáta upe lugár? Jesús heʼi hoʼa vaietereitaha chupekuéra. Haʼe heʼi: “Añetehápe haʼe peẽme: Pe Huísio Árape ojeporiahuverekovéta Sodoma ha Gomórrape, upe siudápe rangue” (Mateo 10:15).