Jesús omboʼe jey kuri umi héntepe mbaʼéichapa oñemboʼe vaʼerã, péro ndahaʼéi ko témarente la oñeʼẽ jeýva. Por ehémplo, opredikárõ guare Galiléare, oĩ vaʼekue heʼíva umi demónio ruvicha omeʼẽha chupe podér ojapo hag̃ua umi milágro. Koʼág̃a katu Jesús oĩ Judéape, ha ojeakusa jey chupe ojapoha heta mbaʼe umi demónio ruvicha oipytyvõgui chupe.

Umi hénte oponderajoa Jesús omosẽrõ guare peteĩ demónio omoñeʼẽngúva peteĩ kuimbaʼépe. Péro oĩ avei okopíva hese, ha heʼíva: “Haʼe ningo omosẽ umi demóniope oipytyvõgui chupe Beelzebub, umi demónio ruvicha” (Lucas 11:15). Oĩ avei oipotáva Jesús ojapo milágro Ñandejára rérape ohechauka hag̃ua mbaʼe apohápa hína haʼe.

Jesús oikuaa mbaʼépa opensa umi hénte okopíva hese, upévare osẽ heʼi chupekuéra peteĩ mbaʼe heʼíma vaʼekue umi Galileaguápe: “Satanás opuʼãramo ijehe voi, ¿mbaʼéicha piko upéicharõ igoviérno oho pukúta?”. Upéi heʼi chupekuéra derechoite: “Che amosẽramo umi demóniope Ñandejára po rupive, upéicharõ katu añetehápe Ñandejára Rréino penderupytýma” (Lucas 11:18-20).

Jesús heʼívo omosẽha umi demóniope “Ñandejára po rupive”, katuete umi ohendúva chupe imanduʼáne raʼe mokõi mbaʼe oiko vaʼekuére Moisés tiémpope. Primero, faraón siervokuéra ohechárõ guare pe milágro Moisés ojapo vaʼekue, orrekonose: “¡Ñandejára po rupive oiko ko mbaʼe!”. Ha segundo, imanduʼáne raʼe hikuái Ñandejára voi ‘oskrivi hague ipópe’ umi Diez Mandamiénto mokõi itáre (Éxodo 8:19, NM; 31:18, NM). “Ñandejára po” ningo haʼe hína ijespíritu sánto térã ifuérsa, ha upéva rupive Jesús omosẽ umi demónio ha omonguera hasývape. Jesús heʼi kuri umi okopívape hese Ñandejára Rréino ohupytymaha chupekuéra. Upéva heʼise pe Rréi Ñandejára omoĩ vaʼekue, haʼéva hína Jesús, oĩmaha ijapytepekuéra.

Jesús ipoderosove hína Satanásgui, upéicha rupi ikatu omosẽ umi demónio. Umi demónio haʼete peteĩ kuimbaʼe imbaretéva orekóva árma ha ovihiláva hóga, péro Jesús imbareteve jey ha ipuʼaka hesekuéra. Upéi Jesús omoĩ peteĩ ehémplo omombeʼúma vaʼekue voi, oñeʼẽva peteĩ kuimbaʼe endemoniádore. Heʼi pe demónio osẽ hague pe kuimbaʼégui, péro haʼe nomyenyhẽi iñakã umi mbaʼe porãgui. Upévare pe demónio ou jey ha ogueru siete demónio hendive. Ipahápe pe kuimbaʼe opyta vaive yma guarégui (Mateo 12:22, 25-29, 43-45). Peichaite oiko vaʼekue tetã Israel rehe.

Peteĩ kuñakarai oĩva pe hénte atýpe, osẽ hatã heʼi: “¡Ajépa ovyʼaiténe pe kuña ndereko vaʼekue hetepýpe ha nemokambu vaʼekue!”. Umi hudía ningo oipota imembýgui oiko proféta, ha koʼytevéntema ovyʼáta imemby haʼéramo pe Mesías. Oiméne pe kuñakarai opensa María ovyʼaitereiha haʼégui peteĩ mboʼehára sy. Jesús katu pyaʼe okorrehi chupe, ha heʼi mbaʼépa la añetehápe ñanembovyʼáva. Haʼe heʼi: “Nahániri, ovyʼa guei umi ohendúva Ñandejára Ñeʼẽ ha ojapóva” (Lucas 11:27, 28). Jesús arakaʼeve ndeʼíri oñemombaʼeguasu vaʼerãha isýpe. Upéva rangue ohechauka javyʼaséramo jaservi vaʼerãha Ñandejárape. Pe felisida nodependéi hína umi mbaʼe jahupytývare ni mávapa ñane hénte.

Ojapóma haguéicha Galiléape, Jesús okorrehi avei umi héntepe ojerurégui peteĩ milágro Ñandejára rérape. Péro haʼe heʼi ndojehechaukamoʼãiha chupekuéra mbaʼeve, “síno pe milágro oiko vaʼekue Jonás rehe añoite ohecháta hikuái”. Jonás ningo opyta vaʼekue tres día pe pira ryepýpe. Avei pyʼaguasúpe opredika, ha upéva omomýi umi Niniveguápe oñarrepenti hag̃ua. Péro Jesús heʼi umi héntepe: “Koʼápe oĩ hína peteĩ tuichavéva Jonásgui” (Lucas 11:29-32). Jesús tuichave avei Salomóngui. Jaikuaaháicha, Salomón iñarandueterei vaʼekue ha upévare pe rréina de Seba jepe ou kuri ohendu hag̃ua chupe.

Jesús heʼi: “Ñamyendy rire peteĩ lámpara nañamokañýi ni nañamoingéi kanásto guýpe. Upéva rangue jahupi yvate ohesape hag̃ua” (Lucas 11:33).  Haʼe heʼise hína naisentidoiha oñemoĩ peteĩ lámpara ndohesapemoʼãihápe. Upéicha avei, naisentídoi omboʼe ha ojapo umi milágro umi hénte ndoaseptaséiva renondépe.

Jesús omosẽ ramoite peteĩ demónio omoñeʼẽngúva peteĩ kuimbaʼépe. Umi hénte ohecháva upéva, omombaʼeguasu vaʼerã kuri Ñandejárape ha omombeʼu vaʼerãmoʼã ótrope pe notísia porãite. Péro upéva rangue okopi Jesúsre. Upémarõ haʼe heʼi: “Eñatendékena upéicharõ, ani remoypytũ rehesape rangue. Nde rete omimbipárõ ha ndaipóriramo ni michĩmi iñypytũha, upéicharõ opa mbaʼe omimbíta peteĩ lámpara nderesaperamoguáicha” (Lucas 11:35, 36).