Opa potáma hína pe Enrramáda Guýpe Jeiko Arete. Koʼág̃a haʼe pe séptimo día, ha Jesús omboʼe hína umi héntepe pe témplope, “umi kontrivusión ryru oĩháme” (Juan 8:20; Lucas 21:1). Amalisia upe lugár oĩ Kuñanguéra Korapýpe.

Pe arete aja, káda pyhare oñeilumina porã upe lugár. Oñemoĩ cuatro kandelávro tuichaicháva, ha káda uno oreko cuatro aséite ryru. Koʼã kandelávro ohesape pe témplo jerére mombyry peve. Koʼág̃a Jesús oñeʼẽ pe mbaʼerendýre ha oiméne umi ohendúva chupe opensa koʼã kandelávrore. Haʼe heʼi: “Che hína pe mbaʼerendy ohesapéva ko múndo. Pe chemoirũva ni mbaʼevéicharõ ndoikomoʼãi pytũmbýpe, orekóta guei pe mbaʼerendy oporomoingovéva” (Juan 8:12).

Umi fariséo osẽ heʼi: “Nde reñeʼẽ ndejehe, upévare ndaikatúi roguerovia la eréva”. Jesús katu heʼi chupekuéra: “Che añeʼẽramo jepe chejehe, añete upe haʼéva, aikuaágui moõguipa aju ha moõpa aha. Péro peẽ ndapeikuaái moõguipa aju ni moõpa aha”. Upéi heʼi avei: “Pende Léipe voi heʼi: ‘Oĩramo mokõi testígo, añete upe ojeʼéva’. Che añeʼẽ chejehe ha pe Túva chembou vaʼekue oñeʼẽ avei cherehe” (Juan 8:13-18).

Umi fariséo ndoaseptaséi la Jesús heʼíva, ha oporandu: “¿Moõiko oime nde Ru?”. Jesús ombohovái: “Peẽ ndachekuaái, ni chéve ni che Rúpe. Peẽ chekuaárire peikuaa vaʼerãmoʼã avei che Rúpe” (Juan 8:19). Umi fariséo oguerahaséramo jepe préso Jesúspe, avave ndaikatúi ojagarra chupe.

Jesús heʼi jey: “Che aháta ha peẽ cherekáta. Péro pemanóta pende pekádope. Che ahatahápe peẽ ndaikatúi peho”. Umi hudío ontende vai la Jesús heʼíva ha oñepyrũ oñeporandu: “¿Péva  piko ojejukase mbaʼe, ajeve heʼi: ‘Che ahatahápe peẽ ndaikatúi peho’?”. Haʼekuéra nontendéi mbaʼépa heʼise Jesús, pórke ndoikuaái hikuái moõguipa haʼe ou. Péro Jesús heʼi: “Peẽ ningo ko yvy arigua che katu yvategua. Peẽ ko mundopegua, che ndahaʼéi ko mundopegua” (Juan 8:21-23).

Jesús ningo oipota kuri ontende hikuái haʼe oiko hague yvágape ou mboyve yvypóraicha. Avei ohechaukase chupekuéra haʼeha pe Cristo térã pe Mesías oñepromete vaʼekue, ha umi líder rrelihióso ohaʼarõma vaʼerãha kuri chupe. Upéicharõ jepe, haʼekuéra ohechauka odespresiaha chupe ha oporandu vai guasu: “¿Nde piko máva?” (Juan 8:25).

Umi fariséo ningo ndoikuaaséi mbaʼeve Jesúsgui, upévare haʼe heʼi chupekuéra: “¡Aperde rei ningo che tiémpo añeʼẽvo penendive!”. Péro haʼe ombotuichase Itúvape ha heʼi mbaʼérepa umi hudío ohendu vaʼerã pe Taʼýrape: “Pe chembou vaʼekue ndaijapúi, ha che amombeʼu ko múndope umi mbaʼe haʼe heʼíva chéve” (Juan 8:25, 26).

Umi hudío ningo ndojeroviái Ñandejárare, péro haʼe ohechauka mbaʼeichaitépa ojerovia hese, ha heʼi: “Ág̃a pehupi vove yvyráre pe Yvypóra Raʼy, peikuaáta che haʼeha pe oñepromete vaʼekue outaha, ha ndajapoiha mbaʼevete chejehegui rei, amombeʼu guei koʼã mbaʼe pe Túva chemboʼe haguéicha. Pe chembou vaʼekue oĩ chendive, ndacherejái cheaño, che akóinte ajapógui umi mbaʼe haʼe oguerohorýva” (Juan 8:28, 29).

Unos kuánto hudío oñepyrũ ojerovia hese, ha haʼe heʼi chupekuéra: “Pejapo meméramo che haʼéva, peẽ añetehápe che disípulo, peikuaáta pe añetegua ha pe añetegua penemosãsóta” (Juan 8:31, 32).

Oĩ nontendéiva mbaʼérepa Jesús heʼi oñemosãsotaha chupekuéra, ha heʼi hikuái: “Oréngo Abrahán ñemoñare ha arakaʼeve ndoroikóiva avave rembiguáiramo. ¿Mbaʼére piko upéicharõ ere: ‘Penesãsóta’?”. Umi hudío oikuaa porã heta vésema oĩ hague tetã ambuegua poguýpe. Upéicharõ jepe, norrekonoseséi hikuái esklavoha. Péro Jesús ohechauka chupekuéra haʼeha gueteri tembiguái. Haʼe heʼi: “Opavave opekáva oiko pekádo rembiguáirõ” (Juan 8:33, 34).

Umi hudío norrekonoseséi oĩha pekádo poguýpe, ha upéva ipeligróso chupekuéra g̃uarã. Jesús heʼi: “Pe tembiguái ndopytái oiko opa árare pe ógape, pe taʼýra katu opyta opa árare” (Juan 8:35). Umi tembiguái ningo ndorekói derécho orresivi hag̃ua pe erénsia, ha ikatu voi oñemosẽ chupekuéra oimeha óra. Péro pe taʼýra onaséva pe famíliape, térã pe ojeadoptáva añoite opyta “opa árare”, térã orresivi pe erénsia.

Upéicharõ, umi hénte oikuaa porãramo añoite pe Taʼýrape ikatúta isãso pe pekádo ha ñemano poguýgui. Jesús heʼi: “Pe Taʼýra opoíramo pendehegui, añetehápe penesãsóta” (Juan 8:36).