Jesús oĩ hína Jerusalénpe, pe Enrramáda Guýpe Jeiko Aretépe. Haʼe ningo ovyʼaiterei “heta hénte ojerovia” haguére hese. Péro umi líder rrelihiósope ndogustaiete upéva, ha omondo guárdia ojagarra hag̃ua Jesúspe (Juan 7:31, 32). Upéicharõ jepe, Jesús oĩ upérupi ha nokañýi chuguikuéra.

Upéva rangue, osegi omboʼe umi héntepe Jerusalénpe, ha heʼi: “Aiméta gueteri penendive sapyʼami, aha mboyve pe chembou vaʼekue rendápe. Peẽ cherekáta ha ndachejuhumoʼãi, ha che aimehápe ndaikatumoʼãi peju” (Juan 7:33, 34). Umi hudío nontendéi mbaʼérepa haʼe heʼi upéva, ha oñeporandujoa hikuái: “¿Moõ mbaʼe piko ohóta kóva, ajeve la ndajatopamoʼãi hese? ¿Ohóta piko oiko umi hudíondi isarambíva umi griégo apytépe ha omboʼéta avei umi griégope? ¿Mbaʼépa heʼise: ‘Peẽ cherekáta ha ndachejuhumoʼãi, ha che aimehápe ndaikatumoʼãi peju’?” (Juan 7:35, 36). Péro Jesús heʼisénte hína koʼẽrõite omanotaha ha oñemoingove jeytaha oiko hag̃ua yvágape, ha upépe iñenemigokuéra ndaikatumoʼãi oho hapykuéri.

Upéi og̃uahẽ pe día sieteha pe aretépe. Káda koʼẽ oiko aja pe arete, peteĩ saserdóte oñohẽ pe altár vásere y ogueru vaʼekue piléta de Siloámgui, ha oheja osyry. Oiméne Jesús oipuru ko kostúmbre ehémploramo, ha heʼi umi héntepe: “Oĩramo ijyʼuhéiva, tou che rendápe ha toyʼu. Pe ojeroviáva cherehe, heʼiháicha Ñandejára Ñeʼẽ: ‘Ikorasõ mbytetégui osyrýta y oporomoingovéva’” (Juan 7:37, 38).

Koʼápe Jesús ohechauka hína mbaʼépa oikóta ág̃a ojeporavo vove idisipulokuérape espíritu sánto rupive, ha oñehenói chupekuéra oiko hag̃ua yvágape. Pe espíritu sánto oñeñohẽ umi disípulo ári Jesús omano rire. Pe áño sigiéntepe, Pentekostés guive oñepyrũ osyry y oporomoingovéva,  umi disípulo oñepyrũvo opredika pe marandu porã.

Umi hénte ohendúvo Jesús omboʼéva, oĩ heʼíva: “Añetehápe kóva hína pe Proféta”. Haʼekuéra opensa Jesús haʼeha pe proféta oñepromete vaʼekue outaha ha iñimportantevéva Moisésgui. Ótro katu heʼi: “Kóva ningo pe Cristo”. Péro oĩ avei heʼíva: “Pe Cristo añetehápe ndoumoʼãi Galiléagui, ¿ajépa? ¿Ndeʼíri piko Ñandejára Ñeʼẽme pe Cristo ou vaʼerãha David ñemoñarégui, ha Beléngui, pe puévlo David oĩ hague?” (Juan 7:40-42).

Ha péicha umi hénte ojoavypa. Oĩramo jepe oipotáva ojejagarra Jesúspe, avave noñanimái ojapo upéva. Umi guárdia osẽ oho jey Jesús reheʼỹ ha umi saserdóte prinsipál ha fariseokuéra oporandu: “¿Mbaʼeháiko ndapeguerúi chupe?”. Umi guárdia ombohovái: “Arakaʼeve norohendúiva peteĩ kuimbaʼe péicha oporomboʼéva”. Umi líder rrelihióso oñepyrũ oñembohory umi guárdiare ha oapoʼi chupekuéra heʼívo: “¿Anichéne peẽme penembotavýma avei? Ni peteĩ mburuvicha ni fariséo ndojeroviái hese, ¿ajépa? Péro koʼã henteita ndoikuaáiva pe Léi nomereséi Ñandejára oguerohory chupekuéra” (Juan 7:45-49).

Nicodemo ohendúvo upéva, odefende Jesúspe. Oiméne ñanemanduʼa dos áño imédiorupi upe mboyve, ko fariséo Sanedrinpegua oho hague Jesús rendápe peteĩ pyhare, ha ohechauka ojerovia hese. Koʼág̃a Nicodemo heʼi: “Ñande léi heʼi ñakondenaséramo peteĩ kuimbaʼépe ñahendu raẽ vaʼerãha chupe, jaikuaa hag̃ua mbaʼépa ojapo, ¿ajépa?”. Umi fariséo ipochyvéntema ha ombohovái chupe: “¿Nde piko Galileagua mbaʼe avei? Ehekána mbaʼépa heʼi Ñandejára Ñeʼẽme ha rejuhúta Galiléagui nosẽmoʼãiha ni peteĩ proféta” (Juan 7:51, 52).

Ñandejára Ñeʼẽ ndeʼíri direktoite Galiléagui osẽtaha peteĩ proféta. Upéicharõ jepe, ohechauka kuri upéguio outaha pe Cristo. Ñandejára Ñeʼẽ oprofetisa ojehechataha “peteĩ mbaʼerendy tuicháva” ‘Galiléape, oikohápe umi tetã ambuegua’ (Isaías 9:1, 2; Mateo 4:13-17). Avei ojeprofetisáma haguéicha, Jesús onase kuri Belénpe ha ou David familiarégui. Umi fariséo oiméne oikuaa upéva, péro amalisia haʼekuéra omosarambi japu umi hénte apytépe ani hag̃ua ojejerovia Jesúsre.