MAʼERÃPA ou Jesús ko yvy ape ári? Haʼe voi heʼi: ‘Tekotevẽ amoherakuã Ñandejára rréino, upearã ningo añembouvaʼekue’ (Lucas 4:​43, BNP). Koʼág̃a jahechamíta irundy mbaʼe Jesús omboʼevaʼekue Ñandejára goviérno rehe.

1. Jesús hína pe rréi. Haʼe voi heʼi haʼeha pe Mesías (Juan 4:​25, 26). Avei omombeʼu haʼeha pe rréi, ohechavaʼekue proféta Daniel peteĩ visiónpe. Jesús heʼivaʼekue ijapostolkuérape, peteĩ árape oguapytaha “itróno omimbipávape” ha oĩtaha omoirũva chupe ogoverna hag̃ua, koʼãvape ohenói ‘ovecha aty michĩva’. Ha ijapostolkuéra oĩta umíva apytépe (Mateo 19:​28, BNP; Lucas 12:32). Heʼi avei oĩtaha oikóva ko yvy ape ári, péro nogovernamoʼãiva hendive. Umívape oñehenói “ambue ovecha” (Juan 10:16).

2. Ñandejára rréino omoĩta tekojoja ko yvy ape ári. Ko goviérno rupive Jesús ojurumbotýta Satanáspe. Ha mbaʼéichapa ojapóta upéva? Haʼe omomarangatúta itúva réra omopotĩvo opaichagua mbaʼe vai ojeʼevaʼekue hese oñepyrũ guive pekádo Edénpe (Mateo 6:​9, 10). Jesucristo oĩrõ guare ko yvy ape ári omboʼevaʼekue opaichagua tapichápe omañaʼỹre imboriahu térã iplátapa, kuñápa térã kuimbaʼe. Ha upéichata avei ág̃a ogoverna vove. Jepe Jesús oñembou omboʼe hag̃ua umi Israelguápe, haʼe oñehaʼãmbaite oipytyvõ umi Samariaygua ha ambue tetãyguápe. Ndojoguaiete umi hudiokuéra rrelihión omoakãvape, haʼekuéra oapoʼi umi tetã ambueguápe, umi kuñáme ha imboriahúvape.

3. Ñandejára goviérno ndahaʼéi ko mundopegua. Jesús tiémpope umi Romaygua oreko asy umi hudío ipoguýpe. Upéicharamo jepe haʼe ndoikéi polítikape (Juan 6:​14, 15). Peteĩ jey oñeʼẽvo peteĩ mburuvichándi heʼi chupe: ‘Che rréino ndahaʼéi ko mundopegua’ (Juan 18:​36, BNP). Hemimboʼekuérape heʼi avei: ‘Peẽ ndahaʼevéima ko mundopegua’ (Juan 15:19). Jesús ndohejái isegidorkuéra oiporu mbaʼeveichagua árma, tahaʼe jepe odefende hag̃ua chupe (Mateo 26:​51, 52).

4. Cristo oisãmbyhýta mborayhúpe. Jesús heʼivaʼekue ombovevyitaha umi mbaʼe pohýi oraháva hemimboʼekuéra (Mateo 11:​28-30). Ha upévare oñemoñeʼẽ chupekuéra ani hag̃ua oiko jepyʼapýpe térã pláta rapykuéri, ojogueraha porã hag̃ua hapichándi, ha ovyʼa añete hag̃ua (Mateo kapítulo 5-7). Jesús ningo imbaʼeporã ha hory. Upévare oimeraẽ tapicha imboriahuvéramo jepe oho hendápe oikuaágui otrata porã ha omombaʼetaha chupe. Máva piko ndoipotamoʼãi peteĩ mburuvicha peichagua?

Ohechauka hag̃ua Ñandejára Rréino ojapótava Jesús ojapovaʼekue heta milágro. Mbaʼépa ohupyty umíva rupive? Jahechami.

(Oñeguenohẽ Mateo, Marcos, Lucas ha Juan kuatiañeʼẽgui.)