UMI rréi oisãmbyhýrõ guare Israel ha Judápe oĩvaʼekue avei profetakuéra. Haʼekuéra ipyʼaguasu ha ijerovia mbarete vaʼekue omombeʼu hag̃ua umi héntepe Jehová heʼíva. Jahechamína mbaʼe mbaʼépa oikuaaukavaʼekue umi proféta.

1. Jerusalén oñehundíta. Proféta Isaías ha Jeremías heta áño oiko mboyve heʼimavaʼekue Jerusalén oñehunditaha ha opytataha itapere. Omombeʼu avei mbaʼérepa Jehová ipochyete umi héntere. Umi Jerusalengua heʼi guaʼu omombaʼeguasuha chupe péro ndojapói haʼe heʼíva. Avei iñaña ha hovamokõi (2 Reyes 21:​10-15; Isaías 3:​1-8, 16-26; Jeremías 2:1–3:13).

2. Oiko porã jeýta hikuái Ñandejárandi. Ohasa rire 70 áño Babilóniape umi hudío ou jey hetãme. Upépe omopuʼã jey pe témplo ha omombaʼeguasu Jehovápe yma guaréicha (Jeremías 46:27; Amós 9:​13-15). Amo 200 áño rupi upéva oñekumpli mboyve, Isaías heʼimavaʼekue peteĩ kuimbaʼe hérava Ciro ojagarrataha Babilonia ha omosãsotaha umi hudiokuérape. Ha omombeʼu avei mbaʼépa ojapóta ojagarra hag̃ua upe tetã (Isaías 44:24–45:3).

3. Arakaʼépa oúta pe Mesías ha mbaʼépa ojapóta. Umi proféta heʼivaʼekue pe Mesías onasetaha táva Belénpe (Miqueas 5:2). Heʼi avei oiketaha Jerusalénpe peteĩ vúrro ári ha upéva ohechaukáta ndaijejapoiha (Zacarías 9:9). Imbaʼeporãta opavavéndi ha ohayhúta opaichagua héntepe, upéicharõ jepe heta oĩta ndaijaʼéiva hese (Isaías 42:​1-3; 53:​1, 3). Iñenemigokuéra heta oñemboharáita hese omano meve. Mbaʼépa oikóta chugui upe rire? Oñemoingove jeýta chupe ha omeʼẽta Itúvape hekove repykue oñeperdona hag̃ua opavavépe hembiapo vai (Isaías 53:​4, 5, 9-12).

4. Pe Mesías oisãmbyhy vove. Yvyporakuéra ndaikatúi voínte oisãmbyhy porãvo ijehegui rei. Pe Mesíaspe katu oñehenói voi Mburuvicha oguerúva pyʼaguapy, upéva ohechauka haʼe añoite ogoverna porãtaha ko yvy (Isaías 9:​6, 7; Jeremías 10:23). Haʼe oisãmbyhy vove maymáva jaikóta pyʼaguapýpe, mymbakuéra jepe imánsota (Isaías 11:​3-7). Oipeʼáta avei opaichagua mbaʼasy (Isaías 33:24). Ha avavéma nomanomoʼãvéi (Isaías 25:8). Hetaiterei omanovaʼekue jepe oñemoingove jeýta (Daniel 12:13).

(Oñeguenohẽ Isaías, Jeremías, Daniel, Amós, Miqueas ha Zacarías kuatiañeʼẽgui.)