1, 2. a) ¿Mbaʼe iñextráñovapa ojapo Ezequiel? (Ehecha pe taʼanga oĩva iñepyrũme). b) ¿Mbaʼépa heʼise umi mbaʼe ojapo vaʼekue Ezequiel?

ENTEROVÉNTE umi judío oĩva prisionéroramo Babilóniape oikuaase mbaʼérepa iñextrañoite Ezequiel oñekomporta lája. Haʼe ningo oguapy hína kuri peteĩ lugárpe una semánare, omaña puku ha noñeʼẽi. Upeichaháguinte opuʼã oho hógape ha oñemboty upépe. Upéi Ezequiel osẽ jey sapyʼa, umi ivesinokuéra katu omaña joa hese, ha haʼe oiporavo peteĩ ladríllo, omoĩ henondépe ha oñepyrũ odivuha hese. Upe rire Ezequiel, heʼiʼỹre mbaʼevete, oñepyrũ omopuʼã peteĩ murallaʼi pe ladríllo jerére (Ezeq. 3:10, 11, 15, 24-26; 4:1, 2).

² Heta hetave hénte ou ohecha hag̃ua mbaʼépa la oikóva, ha katuete oiméne oñeporandu hikuái: “¿Mbaʼe piko heʼise entéro koʼã mbaʼe?”. Péro amo gotyovémante umi judío oĩva prisionéroramo ontendéta mbaʼérepa iñextrañoite Ezequiel oñekomporta lája. Haʼe ningo oprofetisa hína peteĩ mbaʼe ivaietereíva oikótava amo gotyove, ha ohechaukátava oĩ porãha Jehová ipochy. ¿Mbaʼe piko la oikótava? ¿Mbaʼépa oikóta pe nasión de Israel rehe? ¿Ha mbaʼépa ñanemboʼe upéva ko ñane tiémpope?

3, 4. a) Emombeʼu umi mbohapy mbaʼe orrepresenta vaʼekue Ezequiel ohechaukáva mbaʼéichapa Jehová ohusgáta Jerusalénpe. b) ¿Mbaʼéichapa Ezequiel ohechauka oñemongorataha Jerusalénpe?

³ Amo áño 613-rupi a.C., Jehová heʼi Ezequiélpe orrepresenta hag̃ua mbohapy mbaʼe ohechaukátava mbaʼéichapa Jehová ohusgáta Jerusalénpe: Mbaʼéichapa pe siuda oñemongoráta, mbaʼéichapa osufríta umi oikóva upépe, ha mbaʼéichapa oñehundíta pe siuda ha ipuévlo. * Jastudia porãvéna koʼã mbohapy rrepresentasión.

⁴ Jerusalén oñemongoráta. Jehová heʼi Ezequiélpe: “Ejagarra peteĩ ladríllo ha emoĩ ne renondépe. [...] Emopuʼã ijerére peteĩ murálla” (elee Ezequiel 4:1-3). Pe ladríllo orrepresenta pe siuda de Jerusalén, ha Ezequiel katu orrepresenta Babilonia ehérsitope, upe ehérsito Jehová oipurútava. Jehová heʼi avei Ezequiélpe ojapo hag̃ua peteĩ murallaʼi raʼanga, peteĩ rrámpa pe siuda jerére ha mákina ojepurúva oñehundi hag̃ua okẽ ha murallakuéra. Umi mbaʼe haʼe omoĩmbaite vaʼerã pe ladríllo jerére. Koʼã mbaʼe orrepresenta kuri entéro mbaʼe Jerusalén kontrariokuéra oipurútava omongora ha oataka hag̃ua pe siuda. Ha ohechauka hag̃ua iñenemígo soldadokuéra iérroicha imbaretetaha, Ezequiel omoĩ ‘peteĩ vandéha de iérro, éntre pe siuda ha haʼe’. Upéi Ezequiel ojere ‘omaña’ pe siuda rehe. Entéro koʼã mbaʼe haʼe kuri “peteĩ señál pe puévlo de Israélpe g̃uarã”, peteĩ señál ohechaukáva oiko potaiteha peteĩ mbaʼe oñehaʼarõʼỹva: ¡Jehová oipurutaha peteĩ enemígo ehérsitope ohundi hag̃ua Jerusalén, pe siuda iñimportantevéva oĩva Ipuévlope ha pe lugár oĩháme Itémplo!

5. ¿Mbaʼéichapa Ezequiel ohechauka umi mbaʼe oikótava umi Jerusalenguáre?

⁵ Osufríta umi oikóva Jerusalénpe. Jehová omanda Ezequiélpe: “Rejagarra vaʼerã trígo, seváda, havílla, lentéha, sórgo (mího) ha umi ótra semílla (térã espélta, ótra varieda de seváda), [...] ha ejapo chuguikuéra pan. [...] Epesáta ha reʼúta 230 grámo pan káda día”. Ha Jehová heʼi avei chupe: ‘Aipeʼáta pe hiʼupy’ (Ezeq. 4:9-16). Ko pártepe Ezequiel norrepresentái Babilonia ehérsitope, síno umi hénte oikóvape Jerusalénpe. Koʼápe Ezequiel oprofetisa hína ág̃a oñemongora vove Jerusalén pe tembiʼu oeskaseataha. Upe tiémpope, pe pan ojejapóta diferénte semíllagui, upéva heʼise umi hénte hoʼutaha oimeraẽ mbaʼe otopáva. ¿Añetehápe piko peichaite peve iñembyahýita umi hénte? Ku oñeʼẽramoguáicha umi oikóvape Jerusalénpe, Ezequiel heʼi umi hénte oĩvape ijerére: “Umi sy ha túa hoʼúta ifamiliakuéra roʼokue, ha umi mitãnguéra hoʼúta isy ha itúa roʼokue”. Umi hénte ningo heta osufríta ha “ipiru ikãta” hikuái, avei heta omanóta ñembyahýigui ‘ojejapiramoguáicha fléchape’ (Ezeq. 4:17; 5:10, 16).

6. a) ¿Mbaʼe mbaʼépa Ezequiel orrepresenta al mísmo tiémpo? b) ¿Mbaʼépa heʼise vaʼekue Ezequiel opesa ha odividitaha iñakãrangue 3 pártepe?

⁶ Oñehundíta Jerusalén ha ipuévlo. Ko pártepe Ezequiel orrepresenta mokõi mbaʼe al mísmo tiémpo. Primero, orrepresenta umi mbaʼe Jehová ojapótava. Jehová heʼi chupe: “Ejagarra peteĩ espáda  haimbéva ha eipuru umi oporovarveáva naváhaicha” (elee Ezequiel 5:1, 2). Ezequiel po, pe ojagarraha ijespáda orrepresenta hína Jehová po, térã pe huísio Jehová oguerútava ojevalévo Babilonia ehérsitore. Segundo, Ezequiel orrepresenta umi mbaʼe oikótava umi judío rehe. Jehová heʼi chupe: “Emoperõ ne akã ha nde várva”. Upéva orrepresenta mbaʼéichapa umi judío ojeatakáta ha oñehundíta. Upéi Jehová omanda avei chupe: “Ejagarra umi valánsa epesa hag̃ua ne akãrangue ha edividi 3 pártepe”. Upéva ohechauka Jehová okalkula porã hague ohusga hag̃ua Jerusalén ha ojapopaitetaha upe okalkuláva.

7. ¿Mbaʼépa heʼise umi mbohapy mbaʼe Ezequiel ojapo vaʼekue pe iñakãranguégui?

 ⁷ Jehová heʼi Ezequiélpe odividi hag̃ua pe iñakãrangue oipeʼa vaʼekue 3 pártepe, ha ojapo hag̃ua peteĩ mbaʼe káda párte rehe. ¿Mbaʼépa heʼise upéva? (Elee Ezequiel 5:7-12). Ezequiel ohapy peteĩ párte pe iñakãrangue pe “siuda ryepýpe”, upéicha ohechauka umi omañávape hese oĩtaha unos kuánto Jerusalengua omanóva pe siuda ryepýpe. Upéi ojagarra ótra párte pe iñakãrangue ha oinupã espádape “pe siuda jerére kompletoite”, upéva ohechauka oĩtaha avei heta Jerusalengua ojejukáva okápe pe siuda jerére. Ipahápe, Ezequiel ojagarra pe tercera párte pe iñakãrangue oipeʼa vaʼekue ha omboveve pe yvytúre, upéva ohechauka oĩtaha avei heta Jerusalengua isarambíva umi nasionkuéra apytépe, péro ‘peteĩ espáda opersegíta chupekuéra’. Upéva heʼise ojesalváramo jepe, toho ohohápe, núnka ndoikomoʼãiha pyʼaguapýpe (Ezeq. 5:1, 2).

8. a) ¿Mbaʼe esperánsapa omeʼẽ pe rrepresentasión ojapo vaʼekue Ezequiel? b) ¿Mbaʼéichapa oñekumpli pe profesía oñeʼẽva umi akãrangue ‘ojelia vaʼekuére ao ruguáipe’?

⁸ Upéicharõ jepe, pe rrepresentasión profétika Ezequiel ojapo vaʼekue omeʼẽ avei peteĩ esperánsa. Jehová heʼírõ guare Ezequiélpe omoperõ hag̃ua iñakã heʼi avei chupe: “Rejagarra vaʼerã avei unos kuánto ne akãrangue [...] ha elia nde ao ruguáipe” (Ezeq. 5:3). Upéva ohechauka oĩtaha umi judío isarambíva umi nasionkuérape nomanomoʼãiva. Oĩta hína unos kuánto “umíva apytégui” ou jeýva Jerusalénpe, 70 áño oĩ rire hikuái esklávoramo Babilóniape (Ezeq. 6:8, 9; 11:17). ¿Oñekumplípa upéva? Si oñekumpli. Unos kuánto áño Babilonia opoi rire umi oĩvagui prisionéroramo, proféta Ageo heʼi oĩ hague umi judío ou jeýva Jerusalénpe, umi isarambi vaʼekue apytégui. Umi ou jeýva “ijedáma ha ohecha vaʼekue Ñandejára róga yma guare”, upéva hína pe témplo Salomón omopuʼã vaʼekue (Esd. 3:12; Ageo 2:1-3). Opromete haguéicha, Jehová nopermitíri opa pe adorasión verdadéra. Ko lívrope, kapítulo 9-pe, jahecha porãvéta mbaʼéichapa upérõ oñemeʼẽ jey vaʼekue Jehovápe adorasión verdadéra (Ezeq. 11:17-20).

9, 10. ¿Mbaʼe iñimportántevarepa ñanemopensa umi mbaʼe Ezequiel orrepresenta vaʼekue?

⁹ Umi mbaʼe Ezequiel orrepresenta vaʼekue ñanemopensa umi mbaʼe iñimportántevare heʼíva la Biblia oikotaha amo gotyove. ¿Mbaʼe mbaʼépa hína umíva? Oiko haguéicha pe siuda de Jerusalén  yma guarére, Jehová oipurúta umi goviérno ojapo hag̃ua peteĩ mbaʼe oñeimoʼãʼỹva: Ojeatakáta entéro umi rrelihión japu oĩva ko yvy ape ári (Apoc. 17:16-18). Oñehundírõ guare Jerusalén, oiko vaʼekue “peteĩ sarambi guasu ijojahaʼỹva” ha péicha avei oikóta og̃uahẽ vove pe “jehasa asy guasu”, ha oñemohuʼã vove upéva pe gérra de Armagedónpe. Peichagua sarambi “koʼág̃a peve núnka ndoikóiva” gueteri (Ezeq. 5:9; 7:5; Mat. 24:21).

¹⁰ La Biblia heʼi haimete enterove oĩva umi rrelihión fálsape ojesalvataha oñehundi vove umíva umi rrelihión. Ha okyhyjégui, koʼã hénte ohóta umi ótro hénte ohekávandi peteĩ lugár okañy hag̃ua (Zac. 13:4-6; Apoc. 6:15-17). Umi mbaʼe ohasátava hikuái, ñanemomanduʼa upe oiko vaʼekuére umi Jerusalenguáre, umi ojesalvávare oñehundírõ guare pe siuda ha isarambíva “yvytúre”. Jahecha haguéicha pe  párrafo 7-pe, haʼekuéra ojesalváramo jepe, Jehová omoĩ ‘peteĩ espáda opersegíva chupekuéra’ (Ezeq. 5:2). Upéicha avei, ág̃a ojeataka vove umi rrelihión fálsa ndaiporimoʼãi lugár ikatuhápe okañy hikuái, pórke Jehová espáda katuete ohupytýta chupekuéra. Armagedónpe oñehundipaitéta hikuái ha avei entéro umi hénte ojeʼévare haʼeha kavara (Ezeq. 7:4; Mat. 25:33, 41, 46; Apoc. 19:15, 18).

11, 12. a) ¿Mbaʼéichapa jahecha vaʼerã pe predikasión jastudia rire pe profesía heʼíva Jerusalén oñemongora hague? b) ¿Mbaʼéichapa okambiáta pe mensáhe japredikátava?

¹¹ Ñantende porã rire ko profesía, jahechakuaa ñamombaʼe vaʼerãha pe predikasión ha urhénte jajapo vaʼerãha upéva. ¿Mbaʼérepa jaʼe upéicha? Pe profesía ohechauka porã koʼág̃a jajapo vaʼerãha ikatúva guive ñaipytyvõ hag̃ua umi héntepe oservi hag̃ua Jehovápe. ¿Mbaʼérepa? Pórke mbykypaitéma hína pe tiémpo ‘ñamboʼe hag̃ua umi hénte entéro paisguápe’ (Mat. 28:19, 20; Ezeq. 33:14-16). Ág̃a oataka vove umi goviérno (térã “pe garróte”) umi rrelihión fálsape, ñande ndajapredikamoʼãvéima peteĩ mensáhe de salvasión (Ezeq. 7:10). Ndajapredikamoʼãvéima umi notísia porã, japytáta ‘ñaneñeʼẽngu’ Ezequiel rehe oiko haguéicha, haʼe ningo peteĩ tiémpore nomombeʼuvéima vaʼekue mbaʼeveichagua mensáhe (Ezeq. 3:26, 27; 33:21, 22). Oñehundi rire umi rrelihión japu, haʼekuéra itarovaitéta oheka “peteĩ proféta ohecháva visión”, péro ndaiporimoʼãi chupekuéra g̃uarã ni peteĩ mensáhe de salvasión (Ezeq. 7:26). Upérõ ja opátama pe tiémpo oñehekomboʼe hag̃ua umi héntepe oiko hag̃ua chuguikuéra Cristo disípulo.

¹² Péro upéva ndeʼiséi ndajapredikamoʼãveimaha. ¿Mbaʼérepa jaʼe upéva? Pórke pe jehasa asy guasu aja ikatu hína ñañepyrũ japredika peteĩ mensáhe de huísio ojoguátava “amandáu guasúpe”. Upe mensáhe ohechauka porãta og̃uahẽmaha huʼãme ko múndo aña (Apoc. 16:21).

13. ¿Mbaʼérepa Jehová ojerure Ezequiélpe oñeno hag̃ua ijiskiérda gotyo ha upéi iderécha gotyo?

¹³ Ezequiel ningo omombeʼu mbaʼéichapa oñehundíta Jerusalén, péro ndahaʼéi upévante, omombeʼu avei arakaʼépa oikóta. Jehová  omanda Ezequiélpe oñeno hag̃ua ijiskiérda gotyo 390 díare, ha pe iderécha gotyo 40 díare. Káda día orrepresenta vaʼekue un áño (elee Ezequiel 4:4-6; Núm. 14:34). Péicha haʼe ohechauka mbaʼe áñopepa oñehundíta Jerusalén. Amalisia Ezequiel ojapórõ guare upéva noñenói un diaite, síno unas kuánta órarente káda día. Umi 390 día orrepresenta hína umi 390 áño Israel opeka hague. Ikatu jaʼe oñepyrũ hague upéva áño 997-pe a.C., upérõ ojedividi kuri 2 pártepe pe rréino de 12 trívu (1 Rey. 12:12-20). Umi 40 día orrepresenta hína umi 40 áño Judá opeka hague. Ikatu jaʼe upéva oñepyrũ hague áño 647-pe a.C., upe áñope Jeremíaspe ojeporavo profétaramo oavisa hag̃ua pe rréino de Judápe. Upérõ guare Jeremías omyesakã porã vaʼekue Judá oñehunditamaha (Jer. 1:1, 2, 17-19; 19:3, 4). Upéicharõ, umi mokõi tiémpo ñañeʼẽ hague oñemohuʼã vaʼerã kuri áño 607-pe, ha upe áñope ojejagarra ha oñehundi Jerusalén, Jehová oprofetisa hagueichaite. *

14. a) ¿Mbaʼépa ohechauka Ezequiel ndodudái hague Jehová okumplitaha iñeʼẽ itiempoitépe? b) ¿Mbaʼe mbaʼépa oikóta kuri Jerusalén oñehundi mboyve?

¹⁴ Ezequiel orresivírõ guare pe profesía oñeʼẽva umi 390 díare ha umi 40 díare, haʼe oiméne nontendeporãi rakaʼe mbaʼe áñopepa  oñehundíta Jerusalén. Upéicharõ jepe, oiko mboyve upéva, haʼe oavisa jey jey umi judíope og̃uahẽ mbotaitemaha pe tiémpo Jehová ohusgataha chupekuéra. Ezequiel heʼi: “Pe fin oĩma nde ári” (elee Ezequiel 7:3, 5-10). Heʼívo koʼã mbaʼe, Ezequiel ni michĩmi ndodudái vaʼekue Jehová okumplíta hague Iñeʼẽ itiempoitépe (Is. 46:10). Pe proféta omombeʼu avei mbaʼépa oikóta Jerusalén oñehundi mboyve. Haʼe heʼi: “Ojoapykuéri oúta umi sarambi guasu”. Upéicha rupi, pe situasión ivaivéta kuri: Umi líder rrelihióso ndodirihimoʼãvéima chupekuéra oadora hag̃ua Ñandejárape, ha umi governánte katu ndaikatumoʼãvéima ogoverna pe puévlope (Ezeq. 7:11-13, 25-27).

15. ¿Mbaʼe pártepa Ezequiel profesiakuéragui oñepyrũ oñekumpli áño 609 a.C. guive?

¹⁵ Unos kuánto áño Ezequiel omombeʼu rire Jerusalén oñehunditaha, pe profesía oñepyrũ oñekumpli. Áño 609-pe ojekuaauka Ezequiélpe oñepyrũmaha ojeataka Jerusalénpe. Upérõ oñembopu peteĩ trompéta ojeavisa hag̃ua umi héntepe ou hag̃ua odefende isiuda. Péro Ezequiel oprofetisa haguéicha, “avave ndohói oñorairõ” (Ezeq. 7:14). Umi Jerusalengua ndohói odefende hag̃ua isiuda umi babilóniogui. Oiméne oĩ umi judío oimoʼãva Jehová osalvataha chupekuéra. Jehová ningo ojapóma vaʼekue voi upéva umi asirio oatakasérõ guare Jerusalén. Upérõ haʼe ombou peteĩ ánhel ha ohundipa lénto umi asirio ehérsito (2 Rey. 19:32). Péro ko vuéltape ni peteĩ ánhel ndoúi oipytyvõ chupekuéra. Sapyʼaitépe pe siuda oñemongorapa, ojogua peteĩ ‘ólla oĩvape tatápe’, ha umi hénte katu opyta préso pe siudápe, haʼete “unos kuánto soʼo pedáso” oĩva pe óllape (Ezeq. 24:1-10). Oñemongora rire pe siuda 18 mésere, ha heta osufri rire umi hénte, Jerusalén oñehundi.

16. ¿Mbaʼéichapa ikatu jahechauka jajeroviaha Jehová okumplitaha umi mbaʼe oprometéva itiempoitépe?

¹⁶ ¿Mbaʼépa ikatu ñaaprende ko párte Ezequiel oprofetisa vaʼekuégui? ¿Mbaʼépa ohechauka ñane predikasióngui ha umi hénte orreaksiona lájagui japredika jave? Jehová ningo odesidíma arakaʼetépa oñehundíta umi rrelihión fálsa. Ha oiko haguéicha Jerusalén rehe, Jehová ojapóta upéva itiempoitépe (2 Ped. 3:9, 10; Apoc. 7:1-3). Ñande ndajaikuaái mbaʼe óra ni mbaʼe díapa oikóta upéva. Upéicharõ jepe, Ezequiel ojapo haguéicha jasegi jaavisa umi héntepe, jaʼévo chupekuéra: “Pe fin oĩma nde ári”. ¿Mbaʼérepa jaavisa jey jey vaʼerã umi héntepe? Jajapo upéva la mísma rrasón Ezequiel ojapo haguére. * Haimete enterove umi hénte ndogueroviái vaʼekue Ezequiel oprofetisárõ guare Jerusalén oñehunditaha (Ezeq. 12:27, 28). Péro upe rire unos kuánto judío oĩva prisionéro ohechauka ikorasõ porãha ha oho jey ivállepe (Is. 49:8). Ñane tiémpope avei heta hénte ndogueroviái ko múndo oñehunditaha (2 Ped. 3:3, 4). Upéicharõ jepe, oĩ aja tiémpo jasegi vaʼerã ñaipytyvõ umi ipyʼaporãvape  otopa hag̃ua pe tape oporogueraháva jeikovépe (Mat. 7:13, 14; 2 Cor. 6:2).

17. ¿Mbaʼe mbaʼépa oikóta pe jehasa asy guasúpe?

¹⁷ Ezequiel profesía ñanemomanduʼa avei ág̃a umi rrelihiónpe ojeataka vove, umi hénte ‘ndohomoʼãiha oñorairõ’ odefende hag̃ua irrelihión. Upéva rangue, “ijyvakuéra ikangypáta” ha “oryrýi osusũta hikuái okyhyjégui”. Haʼekuéra ojerure asýta ajúda ha heʼíta: “Señór, Señór”, péro avave nombohovaimoʼãi chupekuéra (Ezeq. 7:3, 14, 17, 18; Mat. 7:21-23). ¿Mbaʼépa ojapóta avei hikuái? (Elee Ezequiel 7:19-21). Jehová ningo heʼi vaʼekue umi Jerusalenguáre: “Haʼekuéra omombóta ipláta kállepe”. Upéva ohechauka porã mbaʼépa oikóta pe jehasa asy guasúpe. Umi hénte ohechakuaáta ipláta ndaikatumoʼãiha osalva chupekuéra pe ñehundi guasu oúvagui.

18. ¿Mbaʼépa ñaaprende Ezequiel profesíagui?

¹⁸ ¿Rehechakuaápa mbaʼépa ñanemboʼe ko párte oĩvagui Ezequiel profesíape? Kóva ñanemboʼe ñamotenonde vaʼerãha umi mbaʼe iñimportantevéva. Epensamína ko mbaʼére: Umi oikóva Jerusalénpe ohechakuaa rire ae oñehundi potaitemaha chupekuéra ha  pe siudápe, opilla umi mbaʼerepy ndosalvamoʼãiha chupekuéra. Ha ontende rire ae hikuái upéva, omotenonde umi mbaʼe iñimportantevéva. Umi hénte omombo umi mbaʼerepy orekóva ha ‘oheka peteĩ proféta ohecháva visión’, péro haʼekuéra tardetereíma okambia (Ezeq. 7:26). Ñande katu jaikuaa porã ko múndo koʼẽrõitéma oñehunditaha. Ha jajerovia rupi Ñandejára promesakuérare ñamotenonde umi mbaʼe iñimportantevéva. Péicha rupi jaipuru ñande rekove ñambyaty hag̃ua tesóro yvágape, umíva ningo ideprovécho opa árare ha arakaʼeve ‘noñemombomoʼãi kállepe’ (elee Mateo 6:19-21, 24).

19. ¿Mbaʼéichapa ñandeafekta koʼág̃arupi Ezequiel profesía?

¹⁹ ¿Mbaʼéichapa ñandeafekta koʼág̃arupi Ezequiel profesía heʼíva Jerusalén oñehunditaha? Upéva ñanemomanduʼa mbykypaitemaha pe tiémpo ñaipytyvõ hag̃ua umi héntepe oikuaa hag̃ua Jehovápe. Upévare urhénte ñaipytyvõ vaʼerã chupekuéra oservi hag̃ua Ñandejárape. Ñande ningo javyʼaiterei ñaipytyvõramo umi hénte ipyʼaporãvape oadora hag̃ua ñande Ru Jehovápe. Péro oĩramo jepe ndoadoraséiva Jehovápe, ñande jasegi jaavisa umi héntepe ojapo haguéicha yma Ezequiel, heʼívo: “Pe fin oĩma nde ári” (Ezeq. 3:19, 21; 7:3). Avei jajedesidíma jasegitaha jajerovia Jehováre ha siémpre ñamotenondetaha ñande rekovépe pe adorasión verdadéra (Sal. 52:7, 8; Prov. 11:28; Mat. 6:33).