1, 2. a) ¿Mbaʼe gérra tuichaitévapa oiko potaite? b) ¿Mbaʼe porandúpa ñambohováita koʼág̃a? (Ehecha pe taʼanga oĩva iñepyrũme).

HETAITEREI áñorema ko yvy ape ári oñemano gerrahápe, umíva apytépe oĩ umi mokõi gérra mundiál oiko vaʼekue pe áño 1900 rire. Péro koʼẽrõitéma oikóta hína pe gérra tuichavéva. Ko gérrape ningo ndahaʼemoʼãi umi nasionkuéra oñorairõtava oñondive oipotáguinte peteĩ mbaʼe. Upéva rangue, ko gérra haʼe hína ‘pe gérra oikótava Ñandejára Todopoderóso ára guasúpe’ (Apoc. 16:14). ¿Mbaʼéichapa oñepyrũta upe gérra? Peteĩ enemígo oñemombaʼeguasuetereíva oikéta peteĩ yvy Ñandejára oguerohorývape. Upévare Ñandejára Jehová ogovernáva opa mbaʼe oguerúta peteĩ ñehundi guasu arakaʼeve ndojehecháiva gueteri, ha péicha ohechaukáta ipoderosoitereiha.

² Upévare katuete ñañeporandu koʼã mbaʼe: ¿Mávapa ko enemígo? ¿Mbaʼe yvýpepa haʼe oikéta? ¿Arakaʼe, mbaʼére ha mbaʼéichapa haʼe oikéta ko yvýpe? Koʼã mbaʼe oikótava ningo ñandeafektáta ñandéve, Ñandejára puévlope, upévare tekotevẽ jaikuaa mbaʼéichapa oñembohovái koʼã pregúnta. Upearã ñahesaʼỹijóta peteĩ profesía ijojahaʼỹva oĩva Ezequiel kapítulo 38 ha 39-pe.

3. Emombeʼu mbaʼépa hína pe idéa prinsipál oĩva Ezequiel profesía oñeʼẽvape Gog de Magog rehe.

 ³ (Elee Ezequiel 38:1, 2, 8, 16, 18; 39:4, 11). Koʼãva hína umi idéa prinsipál oĩva ko profesíape: “Umi ára pahápe” peteĩ enemígo hérava ‘Gog de Magog’, oikéta Ñandejára puévlo ‘yvýpe’. Péro upe atáke ‘omorrenegaitereíta’ Jehovápe, oatakáta Gógpe ha oganáta chupe. * Jehová ogana rire pe iñenemígo ha iñirũnguérape, ‘omeʼẽta chupekuéra umi yryvu ha animál salváhe rembiʼurã’. Ipahápe, Jehová omeʼẽta “Gógpe isepulturarã”. Ñantende hag̃ua mbaʼéichapa oñekumplíta koʼẽrõitéma ko profesía, jaikuaa raẽ vaʼerã mávapa Gog.

4. ¿Mbaʼépa ikatu jaʼe Gog de Magog rehe?

⁴ Upéicharõ, ¿mávapa Gog de Magog? Ezequiel heʼi vaʼekuére, ikatu jaʼe Gog haʼeha Ñandejára siervokuéra enemígo. ¿Gog piko ndahaʼéi hína avei Satanás réra, pe enemígo tuichavéva orekóva umi oadoráva Jehovápe añoiténte? Heta áñorema ñane puvlikasionkuéra heʼi upéva. Ojestudia porã rire Ezequiel profesía, ojehechakuaa tekotevẽha oñekambia upe oñentende lája. Rrevísta Ñemañaha omyesakã kuri ojepuru jave pe título Gog de Magog noñeñeʼẽiha peteĩ espíritu ndajahecháiva rehe, síno oñeñeʼẽ hína yvypóra rehe, peteĩ enemígo ikatúvare jahecha. Upéva hína peteĩ grúpo de nasión oñomoirũtava oñorairõ hag̃ua pe adorasión verdadéra kóntrape. * Jahecha mboyve mbaʼérepa jaʼe upéva, jahechami raẽ mokõi mbaʼe Ezequiel profesíape ohechaukáva Gog ndahaʼeiha peteĩ espíritu ndajahecháiva.

5, 6. ¿Mbaʼéichapa Ezequiel profesía ohechauka Gog de Magog ndahaʼeiha peteĩ espíritu?

⁵ “Romeʼẽta umi yryvu ha animál salváhe rembiʼurã” (Ezeq. 39:4). La Biblia oipuru jepi ehémploramo umi yryvu hoʼúva umi teʼongue oporoavisa hag̃ua Ñandejára oporohusgataha. Ñandejára omeʼẽ vaʼekue peichagua avíso pe nasión de Israélpe ha avei umi ótro nasiónpe (Deut. 28:26; Jer. 7:33; Ezeq. 29:3, 5). Péro jahechakuaa vaʼerã umi avíso noñemeʼẽi hague umi espíritupe, síno yvyporakuérape, hoʼo ha huguývape. Jaikuaa ningo umi yryvu ha animál salváhe hoʼuha soʼo, ndahaʼéi espíritu. Upéicharõ pe avíso Ñandejára omeʼẽva Ezequiel profesía rupive, ohechauka Gog ndahaʼeiha peteĩ espíritu.

⁶ “Ameʼẽta Gógpe isepulturarã [...] Israélpe” (Ezeq. 39:11). La Biblia ndeʼíri umi espíritu oñeñotỹha ko yvy ape ári. Upéva rangue, Satanás ha idemoniokuéra opytáta yvykua pypukúpe 1.000 áñore, ha upéi ojepoíta chupekuéra pe lágo oĩháme tatarendy, heʼiséva oñehunditaha chupekuéra opa ára g̃uarã (Luc. 8:31; Apoc. 20:1-3, 10). Ha la Biblia heʼi rupi Gógpe oñemeʼẽtaha “isepulturarã” ko yvy ape ári, ikatu jaʼe Gog ndahaʼeiha peteĩ espíritu.

7, 8. ¿Mbaʼépa oikóta Gog de Magog rehe oikotaháicha avei “pe rréi del nórte” rehe?

⁷ Gog ndahaʼéiramo peteĩ espíritu, upéicharõ ¿máva térã mbaʼépa hína Gog, pe enemígo ipahaite oatakátava Ñandejára puévlope? Jahechamína mokõi profesía ñanepytyvõtava jaikuaa hag̃ua mávapa Gog de Magog.

 ⁸ “Pe rréi del nórte” (elee Daniel 11:40-45). Daniel oprofetisa vaʼekue umi poténsia mundiál oĩtava ñane tiémpo peve. Peteĩva umi profesía heʼi oĩtaha mokõi enemígo polítiko oñokontráriova: “Rréi del sur” ha “pe rréi del nórte”. ¿Mávapa hína umíva? Hetaiterei áñore diferénte rréi ha nasión orrepresenta vaʼekue pe rréi del sur ha rréi del nórtepe, amedída ke oñorairõ hikuái okonsegi hag̃ua podér. “Pe rréi del nórte” ojapóta hína peteĩ atáke finál “umi ára pahápe”, ha oñeʼẽvo upévare Daniel heʼi vaʼekue: “Ipochyetereíta ha osẽta ohundi ha ojuka hag̃ua hetaitereípe”. Ko rréi del nórte ningo ohundise hína prinsipálmente umi oadorávape Jehovápe. * Péro oikotaháicha avei Gog de Magog rehe, pe rréi del nórte “oñehundíta” oataka rire Ñandejára puévlope.

9. ¿Mbaʼépa oikóta Gog de Magog rehe oikotaháicha avei “umi rréi ko yvy arigua” rehe?

⁹ “Umi rréi ko yvy arigua” (elee Apocalipsis 16:14, 16; 17:14; 19:19, 20). Apocalipsis omombeʼu “umi rréi ko yvy arigua” oatakataha Jesucrístope, “pe Rréi omandavéva entéro umi ótro rréigui”. Péro Jesús oĩma yvágape, upévare ndaikatumoʼãi oataka chupe diréktamente, upémarõ oatakáta hikuái umi oñemoĩvape Ñandejára Rréino favórpe. Upéicharõ jepe, umi rréi ko yvy arigua operdéta pe gérra Armagedónpe. Jahechakuaa avei chupekuéra oñehunditaha oataka rire Jehová puévlope. Koʼã mbaʼe ojoguaiterei upe ojeʼévare Gog de Magog rehe. *

10. Jahecha rire Ezequiel profesía, ¿mávapa ikatu jaʼe haʼeha hína Gog?

¹⁰ Jahecha rire koʼã mbaʼe, ¿mávapa hína Gog? Primero, jahechakuaa Gog ndahaʼeiha peteĩ espíritu. Segundo, Gog haʼe hína umi nasión koʼẽrõitéma oatakátava Ñandejára puévlope, ha katuete koʼã nasión oñomoirũta peteĩ grúpope. ¿Mbaʼérepa jaʼekuaa upéva? Ñandejára puévlo ningo oĩ opárupi ko yvy ape ári, ha upévare umi nasionkuéra oñeunímante vaʼerã oataka hag̃ua chupekuéra (Mat. 24:9). Ha umi nasionkuéra oatakátaramo jepe Ñandejára puévlope, Satanás idéa hína la ojapóva hikuái. Haʼe ningo hetaiterei tiémpoma omboliga umi nasiónpe oñemoĩ hag̃ua pe adorasión oñemeʼẽvare Jehovápe (1 Juan 5:19; Apoc. 12:17). Péro Ezequiel profesía oñeʼẽva Gog de Magog rehe omombeʼu hína umi nasión ko yvy arigua oatakataha Jehová puévlope. *

11. ¿Mbaʼépa heʼi Ezequiel profesía “pe yvy” rehe, Gog de Magog oiketahápe?

¹¹ Jahecháma haguéicha  párrafo 3-pe, Gog de Magog omorrenegaitereíta Jehovápe, pórke haʼe oikéta peteĩ yvy iporãitereívape chupe g̃uarã. ¿Mbaʼépa hína upe yvy? Jahechami jey upe heʼíva Ezequiel profesía (elee Ezequiel 38:8-12). Koʼápe heʼi Gog oiketaha ‘pe yvy oĩháme umi hénte ojegueru jey vaʼekue’ ha “oñembyaty jey vaʼekuépe umi nasionkuéragui”. Jahechakuaa avei mbaʼépa pe profesía heʼi umi oadorávare Ñandejárape ko yvýpe: Haʼekuéra oiko “trankílo ha segúro porã [...] umi lugár ndorekóivape murálla, okẽ tránka ha okẽ ojeprotehe hag̃ua”, ha  haʼekuéra ‘ombyaty hína heta rrikésa’. Enterove umi oadoráva Jehovápe haʼe oipotaháicha oiko hína upe yvýpe. ¿Péro mbaʼépa añetehápe pe yvy?

12. ¿Mbaʼéichapa ojeadora jey vaʼekue Jehovápe yma Israélpe?

¹² Iporãta ningo jahechami mbaʼéichapa ojeadora jey vaʼekue Jehovápe yma Israélpe. Upe yvýpe ningo hetaiterei áñore oiko vaʼekue pe puévlo Jehová oiporavo vaʼekue, ha avei haʼekuéra ombaʼapo ha oadora vaʼekue chupe upépe. Umi israelita naiñeʼẽrendúirõ guare, Jehová ojevale Ezequiel rehe oprofetisa hag̃ua ijyvykuéra oñehunditaha ha opytataha nandi (Ezeq. 33:27-29). Péro Jehová oprofetisa vaʼekue avei oĩtaha umi oñarrepentíva ha osẽva Babilóniagui, ha oho jeýtava pe yvýpe oadora jey hag̃ua chupe haʼe oipotaháicha. Jehová vendisión rupive, Israel yvy iporãiterei jeýta ha ‘ojoguáta pe hardín de Edénpe’ (Ezeq. 36:34-36). Upéva oiko vaʼekue áño 537-pe a.C. umi judío oĩ vaʼekue prisionéro oho jeýrõ guare Jerusalénpe, pe isiuda ohayhuetévape, oadora jey hag̃ua Ñandejárape haʼe oipotaháicha.

13, 14. a) ¿Mbaʼépa hína pe yvy espirituál? b) ¿Mbaʼérepa iporãiterei Jehovápe g̃uarã pe yvy espirituál?

¹³ Ñane tiémpope Jehová siervokuéra ohecha avei ojeadora jey hague Jehovápe haʼe oipotaháicha. Jahecháma haguéicha ko lívro kapítulo 9-pe, áño 1919-pe Ñandejára puévlope oñeguenohẽ oĩhágui prisionéro heta áñore Babilonia Guasu poguýpe. Upe áñope, Jehová ogueru umi oadorávape chupe peteĩ yvy espirituálpe. Upe yvy ningo haʼe hína pe paraíso espirituál, peteĩ situasión térã lugár espirituál oñevendesíva ojeadora hag̃ua Ñandejára teetépe. Upe yvýpe jaiko segúro porã oñondivepa, jareko pyʼaguapy ñane  ménte ha ñane korasõme (Prov. 1:33). Ñandéve ningo oñemeʼẽ hetaiterei informasión ñamombarete hag̃ua ñande jerovia, ha jareko heta mbaʼe jajapo vaʼerã predikasiónpe ha upéva ñanembovyʼaiterei. Añetehápe, umi mbaʼe jahasávare jaikuaa siertoha heʼíva Proverbios 10:22: “Jehová vendisión ningo la añetehápe ñanemborríkova, ha haʼe ni michĩmi nañanembosufríri”. Tahaʼe haʼéva pe lugár jaikoha ko yvy ape ári, ñande ñaime hína ko yvýpe, haʼéva pe paraíso espirituál, ha ikatu jasegi ñaime pype jajapóramo ko mbaʼe: Jasegíramo jahechauka jaadoraha Jehovápe umi mbaʼe jaʼe ha jajapóvape.

¹⁴ Ko yvy espirituál ningo iporãiterei Jehovápe g̃uarã. ¿Mbaʼérepa? Jehovápe g̃uarã umi oikóva upépe haʼe hína “umi mbaʼe iporãva oĩva entéro tetãme”, umíva hína umi hénte haʼe oguerúva oadora hag̃ua chupe haʼe oipotaháicha (Ageo 2:7; Juan 6:44). Koʼã persóna ningo oñehaʼãmbaite ombopyahu ikondúkta ha oreko umi kualida porã Ñandejára orekóva (Efes. 4:23, 24; 5:1, 2). Haʼekuéra oadora Ñandejárape haʼe oipotaháicha, upéicha rupi oñemeʼẽmbaite iservísiope, ha oñehaʼãmbaite ombotuicha ha ohechauka ohayhuha Jehovápe heta hendáicha (Rom. 12:1, 2; 1 Juan 5:3). ¡Mbaʼeichaitépa oiméne ombovyʼa Jehovápe ohechávo umi oadoráva chupe oñehaʼãmbaiteha omoporãve pe yvy espirituál! Ñapensamíntena: Ñamotenondévo ñande rekovépe pe adorasión ñameʼẽva Jehovápe, ndahaʼéi ñamoporãnteva pe paraíso espirituál, síno ñambovyʼaiterei avei Jehovápe (Prov. 27:11).

15, 16. ¿Arakaʼépa Gog oikéta ñande yvy espirituál oñembopyahu jey vaʼekuépe?

¹⁵ Jaikuaa ningo koʼẽrõitéma oñomoirũmbataha umi nasión peteĩ grúpope ha oikéta ñande yvy espirituál iporãitévape. ¡Ajépa isério upéva! Upépe ojeatakáta enterove oadorávape Jehovápe, upévare jaikuaaseve ko mbaʼégui. Koʼã mbohapy pregúnta ñanepytyvõta upearã.

¹⁶ ¿Arakaʼépa Gog oikéta ñande yvy espirituál oñembopyahu jey vaʼekuépe? Pe profesía heʼi Gog oatakataha Ñandejára puévlope “umi ára pahápe” (Ezeq. 38:16). Pe fráse heʼíva “umi ára pahápe” jatopa avei Isaías 2:2-pe. Kóva ohechauka upéva oikotaha hiʼag̃uimbaitévo pe fin. Ñanemanduʼa vaʼerã pe jehasa asy guasu oñepyrũtaha oñehundi vove Babilonia Guasúpe, orrepresentáva entéro rrelihión fálsa oĩvape ko múndope. Oñehundi rire umi rrelihión fálsape ha oñepyrũ mboyve Armagedón, Gog oipurúta entéro mbaʼe orekóva ojapo hag̃ua peteĩ atáke finál ohundiete hag̃ua Ñandejára puévlope.

17, 18. ¿Mbaʼéichapa Jehová ogiáta pe situasión pe jehasa asy guasu aja?

¹⁷ ¿Mbaʼérepa Gog oikéta ñande yvy espirituál oñembopyahu jey vaʼekuépe? Ezequiel profesía ohechauka mbaʼérepa: Primero, Jehová ogiáta rupi upe situasión, ha segundo, Gog iñañaiterei rupi.

¹⁸ Jehová ogiáta upe situasión (elee Ezequiel 38:4, 16). Jehová ningo heʼi Gógpe: “Amoĩta ne rañykãre umi gáncho” ha “che roguerúta  che yvy kóntrape”. ¿Heʼisépa upéva Jehová oovligataha umi nasiónpe oataka hag̃ua isiervokuérape? ¡Nahániri! Haʼe arakaʼeve ndojapomoʼãi ivaíva ipuévlo kóntrape (Job 34:12). Péro Jehová oikuaa iñenemigokuérape. Oikuaa haʼekuéra ndaijaʼeiha umi oadorávare chupe ha ndoperdemoʼãiha hikuái pe oportunida oñehaʼã hag̃ua ohundi chupekuéra (1 Juan 3:13). Omoĩramoguáicha gáncho Gog rañykãre, Jehová haʼetéta ku oitiráva chupe ojapo hag̃ua ivolunta pe tiémpo haʼe oipotávape. Babilonia Guasu oñehundi rire, Jehová ikatu hína omomýi de algúna fórma umi nasiónpe ojapo hag̃ua umi mbaʼe ojaposéva voi hikuái. Péicha Jehová opreparáta pe situasión ojeataka hag̃ua ipuévlope ha og̃uahẽ hag̃ua Armagedón, pe gérra tuichavéva oikótava ko yvy ape ári. Upéi haʼe osalváta ipuévlope, ombotuicháta igoviérno ha osantifikáta héra (Ezeq. 38:23).

19. ¿Mbaʼérepa Gog de Magog oñehaʼãta ñandejoko anivéma hag̃ua jaadora Jehovápe?

¹⁹ Gog iñañaiterei. Umi nasión ‘okalkuláta ojapo peteĩ mbaʼe ivaietereíva’. Haʼekuéra ipochyeterei ha ojaheiséta Jehová siervokuérare, haʼetévaicha ikangýva ha ‘oikóva hína umi lugár ndorekóivape murálla, okẽ tránka ha okẽ ojeprotehe hag̃ua’. Umi nasión ‘osakeaséta’ avei “umi ombyatývape hína heta rrikésa” (Ezeq. 38:10-12). ¿Mbaʼe rrikésapa hína umíva? Jehová puévlo oreko heta rrikésa espirituál, pe ivaliosovéva jarekóva haʼe hína pe adorasión ñameʼẽva Jehovápe  añoiténte. Umi nasión ojapóta ikatúva entéro anivéma hag̃ua jaadora Jehovápe, oipeʼaramoguáicha ñandehegui ko rrikésa, ndahaʼéi omombaʼégui upéva, síno pórke ndaijaʼéi hese ha enterove umi oadorávare Jehovápe.

20. ¿Mbaʼéichapa Gog oikéta pe yvýpe térã pe paraíso espirituálpe?

²⁰ ¿Mbaʼéichapa Gog oikéta pe yvýpe térã pe paraíso espirituálpe? Umi nasión ikatu hína oñehaʼã ñandejoko anive hag̃ua jaservi Ñandejárape lívremente kómo kristiáno, ni jaadora chupe. Upearã haʼekuéra ikatu oñehaʼã ponove ojejapo umi puvlikasionkuéra, anive hag̃ua jareko umi rreunión, pono jaiko en unida ha japredika kyreʼỹme Ñandejára mensáhe. Entéro koʼã mbaʼe ningo haʼe peteĩ párte orekóva pe paraíso espirituál. Satanás omboligáta umi nasiónpe oñehaʼã hag̃ua ohundi ko yvy ape árigui pe adorasión oñemeʼẽva Jehovápe ha avei umi oadorávape Ñandejárape.

21. ¿Mbaʼérepa jaagradesete Jehovápe ñandeavisa haguére koʼã mbaʼe oikótava koʼẽrõite?

²¹ Pe atáke ojapótava Gog de Magog ohupytýta enterove Jehová siérvope oikóva pe yvy espirituálpe. ¡Ajépa jaagradesete Jehovápe ñandeavisa haguére koʼã mbaʼe oikótava koʼẽrõite! Ñahaʼarõ aja pe jehasa asy guasu, jajerresolve vaʼerã jaadorataha Jehovápe haʼe oipotaháicha ha ñamotenondetaha upéva ñande rekovépe. Péicha jajapóvo, ñamoporã hína pe paraíso espirituál. Avei ikatu jahecha hína peteĩ mbaʼe ijojahaʼỹva: Mbaʼéichapa Jehová odefendéta ipuévlope ha osantifikáta héra Armagedónpe. Pe kapítulo oúvape jahecháta upéva.