Umi profesía oĩva la Bíbliape ha umi mbaʼe oiko vaʼekue ohechauka Jesús oñepyrũma hague ogoverna yvágape Rréiramo 1914-pe, ha péicha ohechauka ko yvy ape ári oñepyrũmaha Satanás múndo ára paha. ¿Mbaʼépa ojapo vaʼekue Jesús oikomírente chugui Rréi? ¿Haʼe piko ensegída oguenohẽ Babilonia Guasúgui isiervokuéra yvy ape ariguápe? ¿Haʼe piko onombra raʼe 1914-pe pe “esklávo de konfiánsa ha iñarandúva” ha omoñepyrũ pe kosécha tuichaitéva? (Mat. 24:45).

Ndaupéichai vaʼekue. Ñanemanduʼákena, apóstol Pedro heʼi hague Ñandejára espíritu rupive pe huísio oñepyrũtaha “Ñandejára rógape” (1 Ped. 4:17). Upéicha avei pe proféta Malaquías opredesi pe tiémpo Jehová outaha hógape, pe ojeadorahápe chupe, ha upearã omoirũta chupe Itaʼýra, “pe mensahéro pe kompromísope g̃uarã” (Mal. 3:1-5). Upe tiémpope oñemopotĩta ha ojeprováta ipuévlope. ¿Oiko piko raʼe upe tiémpope umi profesía heʼi haguéicha?

 ¡Si, upeichaite oiko! Ijetuʼueterei vaʼekue áño 1914 guive, ha upe situasión oho hese oñepyrũmi peve 1919, pórke oñemopotĩ ha ojeprova vaʼekue umi Estudiánte de la Bíbliape, upéi ojekuaáva testígo de Jehováramo. Áño 1914-pe heta oĩva Ñandejára puévlope ko yvy ape ári oñedesanimaite nog̃uahẽi rupi pe fin del múndo ohaʼarõ haguéicha hikuái. Koʼytevéntema oñedesanima hikuái áño 1916-pe omanórõ guare Charles Russell, haʼe ningo kyreʼỹme ogia vaʼekue Ñandejára puévlope. Oĩ vaʼekue algúno omombaʼetereíva ermáno Charles Rússellpe ha oñemoĩ mbarete vaʼekue Joseph Rutherford kóntrape, haʼe ningo ogia porã vaʼekue Ñandejára puévlope Russell rekovia. Hetave división oiko ha haimete ojedividi pe organisasión 1917-pe. Upéi, 1918-pe, oñentremete rupi umi omoakãva umi rrelihión heʼíva ijehe kristianoha, ermáno Joseph Rutherford ha 7 iñirũnguérape ojepersegi, oñekondena, ha ojegueraha kárselpe. Pe sentrál oĩva Bróoklynpe katu oñemboty. Péicha ojehechakuaa Ñandejára puévlo neʼĩraha opyta lívre Babilonia Guasúgui.

Péro, ¿mbaʼépa oiko rakaʼe 1919-pe? Heta mbaʼe okambiaite ha pyaʼeterei voi. Oñepyrũmírente upe áño, Rutherford ha iñirũnguéra osẽ kárselgui. Ha haʼekuéra oho jey ombaʼapo. Upe riremínte, ojeprepara peteĩ asambléa ojegueromanduʼáva koʼag̃aite peve, ha upérõ oñeguenohẽ mbotaitéma kuri pe rrevísta pyahu, The Golden Age (koʼág̃a ¡Despertad!). Pe rrevísta pyahu ojeprepara ojepuru meme hag̃uáicha predikasiónpe. Avei káda kongregasiónpe oñenombra peteĩ superintendénte oorganisa ha omotenonde hag̃ua pe predikasión. Upe áñope osẽ avei pe Bulletin (koʼág̃a Mbaʼéichapa Jaiko ha Japredika vaʼerã. Prográma rreuniónpe g̃uarã), oipytyvõtava oñeorganisa porã hag̃ua pe predikasión.

¿Mbaʼépa oiko raʼe? Ojekuaa porãiterei Cristo olivera hague ipuévlope oĩhágui prisionéroramo Babilonia Guasúpe. Haʼe onombra kuri pe esklávo de konfiánsa ha iñarandúvape. Upérõ oñepyrũma pe traváho ojekosecha hag̃ua. Upe áño 1919 ningo iñimportanteterei, pórke upe guive pe traváho osegi tenonde gotyo oñeimoʼãʼỹháicha.