Epensamína ko situasiónre: Guille, orekóva 17 áño, ojapopáma itaréa kolehiopegua ha oguapy ohecha hag̃ua téle.

Upéi og̃uahẽ sapyʼa itúa, omaña vai hese ha heʼi chupe:

¿Mbaʼépa nde rejapóne reiméramo Guille lugárpe?

Ñamoĩ chupe rehoha hína kállere ha retopa sapyʼa atýra ita nde raperãme, ¿mbaʼépa rejapóta? Katuete rehecháta moõrupipa ikatúta rehasa. Upéicha avei reñehaʼã vaʼerã reheka fórma ikatu hag̃uáicha reñemongeta nde tuakuérandi.

 EHÉMPLO:

Lidia heʼi: “Ijetuʼu chéve añemongeta hag̃ua che túandi, sapyʼánte amombeʼu jave chupe álgo, haʼe osẽ heʼi chéve: ‘Chediskulpa, norohenduimi, ótro ladoite apensa hína kuri’”.

MBAʼÉPA IKATU OJAPO LIDIA

1. Ojaʼo itúape.

   Lidia osapukái itúape ha heʼi: “¡Ndéko nereñatendéi voi cherehe. Iñimportánteko la haʼéva ndéve!”.

2. Noñeʼẽvéi itúape upévare.

   Lidia nomombeʼuvéintema itúape upe provléma orekóva.

3. Ohecha mbaʼe moméntopepa ikatu oñeʼẽ jey hendive.

   Lidia ikatu ohaʼarõnte oñeʼẽ jey hag̃ua itúandi térã oskrivi chupe peteĩ kárta omombeʼu hag̃ua chupe mbaʼe provlémapa oreko.

¿Mbaʼépa nde ere iporãvetaha ojapo Lidia?

EPENSAMÍNA KO MBAʼÉRE: Añetehápe Lidia túa ótro ladoite opensa. Upéicha rupi ndohechakuaái itajýra oñeñandu vai ha oñeʼẽseha hína hendive. Lidia nokonsegimoʼãi mbaʼeve oñepyrũramo osapukái vaipa itúape heʼiháicha pe opsión A. Ha itúa ndopillamoʼãi mbaʼérepa la ojeplagea ha ndaikatumoʼãi oipytyvõ chupe. Ha ndahaʼéi upévante, Lidia ojapóramo péicha ndohechaukamoʼãi orrespetaha itúape (Efesios 6:2). Jahechaháicha, mokõivévapente voi nokonveníri ko opsión.

Pe opsión B haʼetévaicha iporãva, péro ndaupeichaiete. Oiméramo Lídiape oipyʼapy hína peteĩ mbaʼe, nosolusionamoʼãi mbaʼeve okirirĩnteramo. Iporãvéta omombeʼúramo itúape, upéicha añoite haʼe ikatúta oipytyvõ chupe.

Oiporavóramo pe opsión C ohechaukáta mbaʼeve ndojokoiha chupe oñemongeta porã hag̃ua itúandi. Lidia ningo ikatúnte ohaʼãrõ ótro moménto oñeʼẽ hag̃ua hendive. Ikatu avei oskrivi peteĩ kárta omombeʼu hag̃ua itúape mbaʼépa oipyʼapy chupe. Ojapóramo upéicha, katuete oñeñandu porãvéta.

Haʼe omombeʼu porãramo itúape upe kártape mbaʼe provlémapa oreko, ág̃a itúa olee vove upe kárta ontendéta mbaʼépa heʼise raʼe chupe. Jahechakuaa upéicharõ pe opsión C ou porãvetaha chupekuéra. La Biblia heʼi jajapo meme vaʼerãha umi mbaʼe “oguerúva pyʼaguapy”, ha Lidia oñemongetárõ itúandi térã oskríviramo chupe peteĩ kárta, ohechaukáta hína ohenduha upe konsého (Romanos 14:19).

¿Mbaʼépa ikatu avei ojapo Lidia?

Epensamína mbaʼe mbaʼépa ikatu avei ojapo ha mbaʼépa ohupytýta ojapóramo upéicha.

Nemanduʼa vaʼerã nde tuakuéra sapyʼánte ikatuha nontendepái mbaʼépa la ereséva chupekuéra.

EHÉMPLO:

Ñamoĩ chupe nde tuakuéra oporanduha ndéve mbaʼérepa ndepirevai ha nde ere chupekuéra: “Koʼág̃a nañeʼẽséi hína”.

Haʼekuéra ikatu ontende nde ereha chupekuéra: “Nakonfiái penderehe. Amombeʼútante che amigokuérape mbaʼépa ojehu chéve”.

Epensamína rehasaha hína peteĩ provléma ijetuʼúvare ha nde sy térã nde túa nepytyvõseha, péro nde ere chupe: “Epenaʼỹnte cherehe. Che aikuaáta mbaʼépa ajapo”.

• ¿Mbaʼépa opensáta nde tuakuéra eréramo chupekuéra péicha?

• ¿Mbaʼépa iporãvéta ere chupekuéra?