Epensamína ko situasiónre: Karen oho peteĩ fiestahápe ha upéi ohendu sapyʼa hapykue gotyo peteĩ persóna oñeʼẽva chupe ha heʼíva:

Ojerévo omaña, ohecha iñamíga ouha hína hendápe mokõi servésa ipópe. Omeʼẽ chupe peteĩ ha heʼi chupe: “Ndéngo nekuñataĩma. Heʼúna rejedivertiʼimi hag̃ua”.

Karen ndoʼuséi pe servésa pórke haʼe menór de eda gueteri, péro ndopytavaiséi iñamígandi ha okyhyje avei heʼírõ g̃uarã hese ndovyʼakuaaiha. Haʼe oikuaa porã avei iñamíga Jessica ivuenaha ha ndojapomoʼãiha peteĩ mbaʼe ivaietereíva. Upémarõ Karen opensa: “¿Mbaʼéiko la tánto, ndahaʼéiko dróga la haʼútava?”.

¿Mbaʼépa nde rejapóne reiméramo Karen lugárpe?

Ani hag̃ua reheja ótro odesidi nderehe, nde voi rejekuaa porã vaʼerã. Reikuaa vaʼerã mbaʼépa oĩ porã ndéve g̃uarã, upéva nepytyvõta redesidi porã hag̃ua koʼãichagua situasiónpe (1 Corintios 9:26, 27).

¿Mbaʼépa nepytyvõta redefende hag̃ua umi mbaʼe oĩ porãva ndéve g̃uarã? Jahechamína cuatro pregúnta nepytyvõtava upearã.

Rehechakuaáramo mbaʼépepa ndevale, umi mbaʼe osẽ porãva ndéve ha umi kualida reguerekóva, rejeroviavéta ndejehe.

EHÉMPLO OĨVA LA BÍBLIAPE. Apóstol Pablo heʼi vaʼekue: “Ndachekatupyrýiramo jepe añeʼẽ hag̃ua, añetehápe aikuaa hína heta mbaʼe” (2 Corintios 11:6). Haʼe oikuaa porã rupi Ñandejára Ñeʼẽ, ndohejái vaʼekue omokangy chupe umi oñeʼẽ vaíva hese, upéva rangue osegi ojapo pe oĩ porãva (2 Corintios 10:10; 11:5).

EPENSAMÍNA NDEJEHE. Eanota mbaʼépepa ndevale ha mbaʼépa osẽ porã ndéve.

Eanota pe kualida iporãvéva reguerekóva (por ehémplo, oimérõ nepuntuál, nembaʼeporã, ndepojera, térã nekonfiávle).

Ndereikuaáiramo mbaʼeichagua persónapa nde ha mbaʼépepa nekangy, ndahasyietéta reʼa hag̃ua umi mbaʼe naiporãivape.

EHÉMPLO OĨVA LA BÍBLIAPE. Apóstol Pablo ningo oikuaa porã vaʼekue mbaʼépepa ikangy. Upévare heʼi vaʼekue: “Añetehápe, che pyʼaite guive aguerohory Ñandejára Léi, péro ahecha che retépe oĩha ótra léi, oñorairõva Ñandejára Léi ndive oĩva che akãme, ko léi haʼe hína pe pekádo oĩva che retépe ha cheguerekóva ipoguýpe” (Romanos 7:22, 23).

EPENSAMÍNA NDEJEHE. ¿Mbaʼépepa rehechakuaa nekangyha ha tekotevẽha remehora?

¿Ndépa rejupíne peteĩ táxipe ha rejerure pe choférpe tanembopasea peteĩ kuádrare opa peve chugui ikombustívle? Ndevyroitereíma vaʼerã rejapo hag̃ua upéva ha hiʼarive hepyetereípe osẽta ndéve.

¿Mbaʼépa ikatu reaprende ko ehémplogui? Reguerekóramo méta, ndereikomoʼãi rejerepa rei, síno reikuaátama mbaʼépa rehupytyse ha mbaʼépa ikatu rejapo rekonsegi hag̃ua upéva.

EHÉMPLO OĨVA LA BÍBLIAPE. Apóstol Pablo heʼi vaʼekue: “Che adipara aikuaa rupi moõpa aha” (1 Corintios 9:26). Haʼe oikuaa porã vaʼekue mbaʼe mbaʼépa ohupytyse ha siémpre oñehaʼã ohupyty hag̃ua umi méta orekóva (Filipenses 3:12-14).

EPENSAMÍNA NDEJEHE. Eanota mbohapy méta reguerekóva ha rehupytyséva hína ko áñope.

Nde voi nereiméiramo segúro umi mbaʼe regueroviávare, manterei rekambiáta ikatu hag̃uáicha ne amigokuéra ndeguerohory. Péicha rejoguáta hína peteĩ animál héravape kamaleón, okambiánteva la ikolór asegún moõpa oĩ.

Reiméramo segúro oĩ porãha umi mbaʼe rekreéva, nderehejamoʼãi avave odesidi nderehe, ni nderejapomoʼãi peteĩ mbaʼe umi ótro ojapo haguérente.

EHÉMPLO OĨVA LA BÍBLIAPE. Ikatu oime proféta Daniel imitã gueteri ojeguerahárõ guare chupe mombyry hógagui. Upéicharõ jepe haʼe ojedesidíma vaʼekue iñeʼẽrendutaha Ñandejárape (Daniel 1:8). Haʼe ndohejái vaʼekue avave odesidi hese, ha osegi ojapo pe haʼe oikuaáva oĩ porãha.

EPENSAMÍNA NDEJEHE. ¿Ndépa rejerovia Ñandejárare? Oimérõ upéicha, ¿mbaʼérepa rejerovia hese? ¿Mbaʼérepa reime segúro Ñandejára oexistiha? Eanota mbaʼépa rekree.

Ndépa reguerovia ou porãtaha ndéve rejapóramo umi mbaʼe Ñandejára oipotáva? ¿Mbaʼérepa repensa upéicha?

Mbaʼépepa rejoguase, ¿peteĩ yvyra rogue ovevévape ape ha pépe térãpa peteĩ yvyramáta hapo pypuku ha oaguantávape umi torménta imbaretevéva jepe? Reñehaʼãramo nde voi rejekuaa porãve, rejoguáta pe yvyramáta hapo pypukúvape, ha ikatúta rerresponde ko pregúnta: ¿Mbaʼeichagua persónapa che?