KONSÉHO OĨVA LA BÍBLIAPE: “Anive pejepyʼapyeterei pendejehe” (Mateo 6:25).

¿Mbaʼépa heʼise? Jesús heʼi vaʼekue upéva pe Sermón del Móntepe. Peteĩ diksionário vívliko heʼi pe palávra griéga ojetradusíva “pejepyʼapyeterei” ikatuha ojepuru oñeñeʼẽ hag̃ua “umi hénte orreaksiona lájare imboriahúramo, iñembyahýiramo térã ohasáramo umi provléma jarekóva jepi káda día”. Heta vése oĩ ojepyʼapýva umi mbaʼe oikótavare tenonderãme. Ha añetehápe ningo ndaivaíri jajepyʼapy umi hénte jahayhúvare ha avei ñane remikotevẽre (Filipenses 2:20). Péro Jesús heʼi vaʼekue: “Aníke arakaʼeve pejepyʼapyeterei”. ¿Mbaʼépa heʼise raʼe upéicharõ? Haʼe ndoipotái idisipulokuéra oñekevranta rasa henonderãre, pórke upéicharõ oikóta ojepyʼapyháre ha ndaikatumoʼãi ovyʼa umi mbaʼe orekóvare koʼág̃a (Mateo 6:31, 34).

¿Ideprovéchopa ko konsého? Añetehápe ou porãitereíta ñandéve jasegíramo Jesús konsého. ¿Mbaʼérepa? Oĩ doktór heʼíva umi hénte ojepyʼapyetereíva orekoha peteĩ párte isistéma nerviósogui ndaikatúiva opytuʼu, ha upéva káusare “ikatu ou iprovléma ikorasõme térã oguereko hetave mbaʼasy, por ehémplo, úlsera ha ásma”.

Jesús heʼi avei ndovaleiha ñañekevranta rasa pórke upéva ndaideprovechomoʼãi ñandéve. Haʼe heʼi: “¿Máva piko pende apytépe ojepyʼapyetereíramo ikatúta ombopukumie hekove?” (Mateo 6:27). Ndajaikoʼarevemoʼãi ningo jajepyʼapy haguére ha ndajaikoporãvemoʼãi avei. Hiʼarive, heta vése jajepyʼapy oikórõ g̃uarã peteĩ mbaʼe, péro upéi ndoikói pe ñapensa haguéicha. Peteĩ expérto heʼi: “Naikuéntai jajepyʼapyeterei umi mbaʼe oikótavare, pórke hetave vése ndoikói umi mbaʼe vai ñapensa vaʼekue oikotaha”.

¿Mbaʼépa jajapokuaa upéicharõ ani hag̃ua jajepyʼapyeterei? Primero, jajerovia vaʼerã Ñandejárare. Haʼe ningo omeʼẽ hembiʼurã umi guyrápe ha ‘omonde’ umi yvotýpe, upévare jagueroviakuaa koʼýte omeʼẽtaha hemikotevẽ umi oadorávape chupe haʼe oipotaháicha (Mateo 6:25, 26, 28-30). Segundo, ani ñapensaiterei oikótavare koʼẽrõ. Jesús heʼi vaʼekue: “Ani pejepyʼapyeterei koʼẽrõ g̃uarãre, koʼẽrõko oĩta voi hína ambue jepyʼapy. Káda día ñambohovái vaʼerã voi heta mbaʼe vai” (Mateo 6:34).

Añetehápe iporãiterei pe konsého Jesús omeʼẽ vaʼekue, ha jajapóramo haʼe heʼiháicha katuete ñaneresãivéta. Ha ndahaʼéi voi upévante, ñañeñandu porãta ha jarekóta “Ñandejára pyʼaguapy” (Filipenses 4:6, 7).