Rosi omombeʼu: “Che ningo ajepyʼapyháre aiko, amboguapyeterei chejehe che provlemakuéra ha siémpre añeimahina mbaʼe vaípemante opataha”. ¿Mbaʼe téxto de la Bíbliapa oipytyvõ raʼe chupe? Peteĩva umi téxto haʼe Mateo 6:34: “Ani pejepyʼapyeterei koʼẽrõ g̃uarãre, koʼẽrõko oĩta voi hína ambue jepyʼapy. Káda día ñambohovái vaʼerã voi heta mbaʼe vai”. Rosi omombeʼu koʼã mbaʼe Jesús heʼi vaʼekue oipytyvõ hague chupe ani hag̃ua oñekevranta umi mbaʼe ikatúvare oiko koʼẽrõ, ha ni ndoikuaáiva añetehápepa oikóta. Ha heʼive: “Hetáma voi cheprovléma, natekotevẽi aiko ajepyʼapy rei umi mbaʼe ndoikóivare gueteri ha ni ndaikuaáiva oikótapa hína”.

Yasmín omombeʼu avei haʼe ojepyʼapyeterei hague, ha oñandu upéva odominaitemaha chupe. Ha heʼi: “Káda semána ningo cherasẽ ha sapyʼánte ni ndaikatúi ake. Umi pensamiénto vai cherundíma kuri ohóvo mbeguekatúpe”. ¿Mbaʼe téxto de la Bíbliapa oipytyvõ raʼe chupe? Haʼe heʼi 1 Pedro 5:7 oipytyvõ hague chupe, upépe heʼi: “Pemoĩ ipópe opaite mbaʼe pendepyʼapýva, haʼe ojepyʼapýgui penderehe”. Upéi Yasmín heʼive: “Asegi añemboʼe Jehovápe, ha kon el tiémpo haʼe ombohovái chéve che ñemboʼe. Haʼete voi ojeipeʼáva peteĩ kárga pohýi mbaʼe che árigui. Koʼág̃a peve ou jepi che akãme umi pensamiénto vai, péro ja aikuaáma mbaʼéichapa ikatu akontrola umíva”.

Peteĩ kuñataĩ hérava Isabella omombeʼu: “Che túa ningo siémpre oheja la kósa última orarã, ha che ajoguaiterei chupe upévape. Sapyʼánte ambotapykue umi mbaʼe iñimportánteva ahecha hag̃uánte téle térã apytuʼu hag̃ua. Peteĩ kostúmbre vaieterei ningo jajepokuaa jajapo péicha, pórke amo ipahápe jajestresa ha péicha péichantema jajapo upéi”. Pe konsého oĩva 2 Timoteo 2:15-pe oipytyvõ chupe, upépe heʼi: “Eñehaʼãmbaitéke reime porã hag̃ua Ñandejára renondépe, peteĩ kuimbaʼe ombaʼapo jejopývaicha, ndorekóiva mbaʼérepa otĩ hag̃ua”. Isabella heʼive: “Ndaipotái ningo Jehová otĩ che traváhore aheja rupi última orarã”. Koʼág̃a haʼe tuichaiterei omehora.

Peteĩ mitãkuña hérava Kelly katu heʼi: “Oñemeʼẽ jave chéve peteĩ traváho ajapo hag̃ua, siémpre ahejámi última orarã. Upéi añepyrũma cherasẽ, ajepyʼapyeterei ha saʼíma ake. Ha upéva cheperhudikáma”. Pe konsého oĩva Proverbios 13:16-pe tuichaiterei oipytyvõ chupe, upépe heʼi: “Pe persóna iñarandúva opensa porã raẽ ojapo mboyve álgo, péro pe itavýva vyroreínte ojapo” (TNM). Haʼe omombeʼu ojepyʼamongeta meme hague ko téxtore ha heʼive: “Iñimportanteterei ñanearandu ha ñaplanea jajapo mboyve peteĩ mbaʼe. Koʼág̃a areko peteĩ ahénda che eskritório ári ha upépe aanotapaite umi mbaʼe ajapótava, upéva chepytyvõ cheorganisáda hag̃ua ha avei pono aheja última orarã umi mbaʼe ajapótava”.

Peteĩ kuñakarai hérava Cristina omombeʼu: “Che ména chereja rei, ha apyta cheaño cuatro mitã michĩva reheve”. ¿Mbaʼe téxto bíblicopa oipytyvõ chupe? Proverbios 17:17, upépe heʼi: “Peteĩ amígo verdadéro nderayhúta tódo el tiémpo, haʼete voi ne ermáno oĩva nde ykére rehasa asy jave” (TNM). ¿Mbaʼéichapa oipytyvõ chupe umi iñamígo oservíva Ñandejárape? Haʼe omombeʼu: “Che amigokuéra chepytyvõ chéve ha che famíliape heta hendáicha, por ehémplo oĩ ogueraháva oréve tembiʼu, yvoty, ha tres vése voi hetaiterei oĩ ohóva orepytyvõ rojapo hag̃ua mudánsa. Peteĩva katu chepytyvõ akonsegi hag̃ua che travahorã. Umi che amigokuéra ningo siémpre oĩ che ykére”.

Diana, ñañeʼẽma hague anteve, omombeʼu mbaʼéichapa oñeñandu kuri ohasa rire umi desgrásia: “Ahecha entéronte oikoha vyʼápe oñondivepa, péro che katu añeñandu cheaño peteĩ ha ndavyʼái”. Pe heʼíva Salmo 68:6 tuichaiterei oipytyvõ chupe: “Ñandejára omeʼẽ hogarã umi oĩvape haʼeño” (TNM). Diana heʼi: “Ahechakuaa ko téxto noñeʼẽiha peteĩ ógarente, síno heʼise avei Ñandejára omeʼẽha ñandéve peteĩ óga espirituál, ikatuhápe ñaime segúro ha ñañandu haʼe ñanemokunuʼũha. Upépe ikatu ñaime unído umi ohayhúvandi Jehovápe. Péro aikuaa avei ndaikatumoʼãiha añemoag̃ui umi ótrore, che voi nañemoag̃uíriramo Ñandejárare. Upévare Salmo 37:4 tuichaiterei chepytyvõ, upépe heʼi: ‘Evyʼa nde pyʼaite guive rejapóvo Jehová heʼíva, ha haʼe katuete omeʼẽta ndéve umi mbaʼe reipotáva nde pyʼaite guive’” (TNM).

Haʼe heʼive: “Ahechakuaa tekotevẽ hague añakarama hatãve Jehováre, haʼe ningo pe amígo iporãvéva ikatúva jaguereko. Ha añemoag̃uive hag̃ua umi oñehaʼãvare avei oñekomporta Ñandejárape ogustaháicha, amoĩ peteĩ lístape mbaʼe mbaʼépa ikatu ajapo hendivekuéra. Aaprende ahecha vaʼerãha umi mbaʼe iporãva oguerekóva káda uno ha ambohasa reínte vaʼerãha ofalla jave hikuái”.

Jaikuaaháicha, umi oservíva Ñandejárape haʼénte avei imperfékto. Umi testígo de Jehová orekónte avei provléma entéro orekoháicha, péro umi enseñánsa oĩva la Bíbliape omomýi chupekuéra oipytyvõ hag̃ua ótrope, ha peichagua amígo haʼe hína la iporãvéva. Péro sapyʼánte jareko umi provléma ndaikatúiva ñasolusiona, por ehémplo peteĩ mbaʼasy vai térã omano ñandehegui peteĩ jahayhúva. ¿Ikatúnepa umi konsého oĩva la Bíbliape ñanepytyvõ jagueropuʼaka hag̃ua umichagua situasión?