Jaikuaa porã hag̃ua peteĩ persónape iñimportánte jaikuaa umi mbaʼe ojapo vaʼekue ha mbaʼe mbaʼépa ombohovái raʼe ohupyty hag̃ua upéva. Upéicha avei, jaikuaa porãve hag̃ua Ñandejárape iñimportánte jaikuaa umi mbaʼe haʼe ojapo vaʼekue. Katuete remombaʼéta rehechávo mbaʼéichapa ideprovécho ñandéve umi mbaʼe haʼe ojapo vaʼekue ha mbaʼéichapa ñanevenefisiáta amo gotyove.

Jehová ningo haʼe ñande Apohare Ijojahaʼỹva ha “ko múndo ojejapo ypy guive, hembiapokuére umi hénte ikatu ohecha mbaʼeichaguápa haʼe”, pórke hembiapokuére ojekuaa umi kualida porã orekóva (Romanos 1:20). “Haʼe hína pe ojapo vaʼekue ko yvy ipodér rupive, Haʼe iñarandu rupi omohenda porã ko yvy oprodusi porãitéva, ha iñarandu rupi oipyso vaʼekue pe yvága” (Jeremías 10:12). Ñamañáramo mbaʼeichaitépa Ñandejára ojapo porãiterei vaʼekue entéro mbaʼe, jahechakuaa haʼe ñanderayhuetereiha.

Epensamínte mbaʼeichaitépa jadisfruta Jehová ñandeapo rupi “ijoguaháramo” (Génesis 1:27). Ñandejára ñandeapo rupi ijoguahárõ ikatu jahechauka umi kualida porã haʼe orekóva, ndahaʼéiramo jepe la haʼe ojapohaichaite. Avei haʼe ñandekrea ñantende hag̃uáicha umi mbaʼe haʼe opensáva ha ileikuéra. Jarekóramo enkuénta umíva opa mbaʼe jajapóvape, javyʼave, isentído la ñande rekove ha ikatu voi jaiko iñamígoramo.

Ñane planétare voi jahechakuaa mbaʼeichaitépa Ñandejára ñanderayhu. Apóstol Pablo heʼi vaʼekue Ñandejárare: “Añetehápe umi mbaʼe porã ojapóvare oikuaauka peẽme mávapa haʼe, omboúvo ama yvágagui ha omeʼẽvo peẽme hetaiterei kóga. Haʼe hetaiterei tembiʼu omeʼẽ peẽme ha penembopyʼarory” (Hechos 14:17). Ñandejára omeʼẽmbaite ñandéve entéro mbaʼe ñaikotevẽva jaikove hag̃ua, ha ndahaʼéi voi upévante, okrea avei hetave mbaʼe ha de diferénte kláse ikatu hag̃uáicha jadisfruta. Péro oĩ hína hetaiteve mbaʼe Ñandejára omeʼẽséva ñandéve.

Jehová ojapo vaʼekue ko yvy jaiko hag̃ua pype pára siémpre. La Biblia heʼi: “Ko yvy haʼe omeʼẽ yvyporakuérape”.  Ha heʼi avei: “Haʼe ojapo ko yvy ojeiko hag̃ua pype, ndahaʼéi ojapo rei reínte vaʼekue” (Salmo 115:16; Isaías 45:18). ¿Mávapa oikóta ko yvy ape ári ha mboy tiémporepa? “Umi hembiapo porãvape oñemeʼẽta ko yvy, ha oikóta pype opa ára g̃uarã” (Salmo 37:29).

Jehová upearã okrea vaʼekue Adán ha Évape. Haʼe omoĩ vaʼekue chupekuéra peteĩ paraísope “ombaʼapo ha oñatende hag̃ua hese” (Génesis 2:8, 15). Ñandejára omeʼẽ avei chupekuéra peteĩ traváho iporãitereíva. Haʼe heʼi chupekuéra: “Penefamília retákena ha peñemboheta hetave ha pemyenyhẽ ko yvy ha peipuru” (Génesis 1:28). Adán ha Eva oreko vaʼekue posivilida oikóvo vyʼápe ha opa árare ko yvy ape ári. Péro ñambyasýramo jepe, haʼekuéra naiñeʼẽrendúi Ñandejárape ha upéicha operde upe posivilida ha noĩvéima umi ‘hembiapo porãva’ apytépe, umívape ningo Ñandejára ‘omeʼẽta ko yvy’. Péro jahechataháicha, Adán ha Eva ofalla haguére Jehová nokambiái umi mbaʼe ojapótava yvyporakuéra ha ko yvýpe g̃uarã. Péro upe mboyve jahechami ótra kósa Ñandejára ojapo vaʼekue avei ñanderehehápe.

¿Maʼerãpa Jehová omeʼẽ ñandéve la Biblia? Ñepyrũrãite voi haʼe omeʼẽ ñandéve Iñeʼẽ ikatu hag̃uáicha jaikuaa chupe (Proverbios 2:1-5). Añetehápe ningo la Biblia norrespondepamoʼãi ñandéve entéro mbaʼe jaikuaaséva Ñandejáragui, ha ndaipóri voi lívro ikatu vaʼerã ojapo upéva (Eclesiastés 3:11). Upéicharõ jepe, umi mbaʼe si heʼíva la Biblia ñanepytyvõ jaikuaa hag̃ua Ñandejárape. Jaleéramo la Biblia jahecháta mbaʼéichapa Ñandejára otrata vaʼekue la héntepe ha upéva ñanepytyvõta jaikuaa hag̃ua mbaʼeichagua persónapa haʼe. Jahecháta avei mbaʼeichagua persónapa haʼe oguerohory (Salmo 15:1-5). Mbaʼéichapa haʼe oipota ojeadora chupe, mbaʼéichapa oipota jaiko ha mbaʼépa opensa umi mbaʼerepýre. La Biblia omombeʼu avei umi mbaʼe Ñandejára Raʼy Jesucristo heʼi ha ojapo vaʼekue, ha umíva ñanepytyvõ porãvéntema jaikuaa hag̃ua Ñandejárape (Juan 14:9).

Jehová omeʼẽ avei ñandéve Iñeʼẽ ikatu hag̃uáicha jaikuaa mbaʼépa jajapo vaʼerã jaiko hag̃ua vyʼápe ha isentído hag̃ua la ñande rekove. La Bíbliape jatopa mbaʼépa jajapo vaʼerã javyʼa hag̃ua ñande rogapýpe, ñañeñandu porã hag̃ua ha avei jagueropuʼaka hag̃ua umi mbaʼe ñandepyʼapýva. Upéi jahecháta mbaʼéichapa la Biblia orresponde ñandéve umi pregúnta iñimportantevéva, por ehémplo, mbaʼérepa oĩ hetaite sufrimiénto ha mbaʼépa ñaneraʼarõ amo gotyove. La Biblia oexplika porã avei mbaʼépa Ñandejára ojapo raʼe ikatu hag̃uáicha oñekumpli umi mbaʼe oipota vaʼekue ñandéve g̃uarã iñepyrũete guive.

Oĩ avei hetave mbaʼe ohechaukáva ñandéve la Biblia ndaijojahaiha ha añetehápe ouha Ñandejáragui. La Biblia ningo oskrivi vaʼekue 40 kuimbaʼérupi diferénte tiémpope ha oñetermina 1.600 áñope, upéicharõ jepe osegi el mísmo téma oñepyrũ guive opa peve. Upéva ohechauka porã ñandéve ouha Ñandejáragui (2 Timoteo 3:16). Ymaitereímarõ jepe la Biblia ojeskrivi hague, koʼag̃aite peve oñemantene umi mbaʼe oñemboʼéva pype, ndojoguái umi ótro lívro yma guarépe. Hetaiterei lívro de la Biblia yma guare ojetopa vaʼekue ohechauka siertoha upéva. Heta tiémpore oĩ vaʼekue ojokoséva pono ojetradusi, oñemosarambi térã ojelee la Biblia, upéicharõ jepe koʼag̃aite peve oĩ la Biblia. Ha ndahaʼéi voi upévante, koʼág̃a la Biblia haʼe pe lívro hetave ojetradusi ha oñevendéva ko múndo tuichakuére. Jahechávo mbaʼéichapa la Biblia heta tiémporema oexisti, ohechauka ñandéve ‘Ñandejára ñeʼẽ opytataha opa ára g̃uarã’ (Isaías 40:8).

Ñandejára omeʼẽ avei peteĩ mbaʼe iñimportantetereíva ohechauka hag̃ua katuete okumplitaha ipropósito. Jaʼéma haguéicha, Ñandejára oipota vaʼekue yvyporakuéra oiko pára siémpre ko yvy ape ári. Péro upéi Adán ou kuri naiñeʼẽrendúi Ñandejárape ha opeka, ha upépe operde pe oportunida oikovévo pára siémpre ha entéro ifamiliare operde avei upéva. “Peteĩ kuimbaʼe rupive pe pekádo oike ko múndope, ha pe ñemano oike pekádo rupive. Upéicha pe ñemano ohupyty entéro kuimbaʼépe, enterovéva opeka rupi” (Romanos 5:12). Adán opeka rupi haʼetévaicha kuri  noñekumplimoʼãvéimava umi mbaʼe Ñandejára oipota vaʼekue yvyporakuérape g̃uarã. ¿Péro mbaʼépa ojapo Jehová upémarõ?

Haʼe ningo ihústo ha upévare okastiga Adán ha Évape naiñeʼẽrendúi haguére, péro oporohayhueterei rupi ojapo tekotevẽva guive ikatu hag̃uáicha Adán ha Eva familiare oreko jey esperánsa. Jehová iñarandu rupi omoĩ ensegída voi peteĩ solusión ombohovái hag̃ua upe situasión ha omombeʼu mbaʼépa la ojapótava (Génesis 3:15). Haʼe Itaʼýra Jesucristo rupive ñandepeʼáta pekádo ha ñemano poguýgui. ¿Péro mbaʼépa tekotevẽta ojapo upearã?

Ikatu hag̃uáicha ñandesalva umi mbaʼe vai jahupytývagui Adán káusare, Jehová ombou Itaʼýra Jesúspe ko yvy ape ári omboʼe hag̃ua la héntepe mbaʼépa ojapo vaʼerã ojesalva hag̃ua ha omeʼẽ hag̃ua hekove “opaga ha oguenohẽ hag̃ua hetápe pekádo poguýgui” a (Mateo 20:28; Juan 14:6). Jesús ikatu vaʼekue omeʼẽ hekove ñanderehehápe pórke haʼe perfékto kuri, haʼe haguéicha avei Adán. Péro Jesús ndojoguaiete Adánpe pórke haʼe iñeʼẽrendu vaʼekue Ñandejárape omano meve. Jesús nomereséi kuri omano ha upévare Jehová omoingove jey chupe ha oho jey yvágape. Péicha Jesús omeʼẽ jey umi hénte iñeʼẽrendúvape pe oportunida oikove hag̃ua pára siémpre, jepe Adán káusare ojeperdéma kuri upéva. Pórke “peteĩ kuimbaʼe naiñeʼẽrendúi rupi heta héntegui oiko pekadór, upéicha avei peteĩ kuimbaʼe iñeʼẽrendúgui heta héntere ojeʼéta hekojojaha” (Romanos 5:19). Jesús sakrifísio rupive Ñandejára okumplíta ipromésa, umi hénte ikatúta oiko pára siémpre ko yvy ape ári.

Umi mbaʼe Jehová ojapo vaʼekue osolusiona hag̃ua umi provléma oĩva Adán káusare, ñanepytyvõ jaikuaa porãve hag̃ua chupe. Jahechakuaa ndaiporiha mbaʼeve ikatúva ojoko chupe okumpli hag̃ua ipropósito, haʼe heʼíva “núnka nosẽvaimoʼãi” (Isaías 55:11). “Péicha ojehechauka Ñandejára mborayhu ñande kásope: Ñandejára ombou Itaʼýra peteĩete ko múndope, ikatu hag̃uáicha haʼe rupive jahupyty pe jeikove. Pe mborayhu ndeʼiséi ñande jahayhu hague Ñandejárape, síno haʼe la ñanderayhu vaʼekue ha ombou Itaʼýrape oñemeʼẽ hag̃ua sakrifísioramo, ikatu hag̃uáicha ojeheja rei ñande pekádo ha jaiko porã jey hendive” (1 Juan 4:9, 10).

Ñandejára omeʼẽramo itaʼýra jepe ñanderehehápe, koʼytevéntema omeʼẽta ñandéve pyʼaporãme entéro umi ótra kósa opromete vaʼekue (Romanos 8:32). ¿Mbaʼéiko Ñandejára opromete ñandéve? Jahechamína.