Jesús heʼi vaʼekue mbaʼéichapa jaikuaáta “Ñandejára Rréino og̃uahẽ mbotaitemaha” (Lucas 21:31). Por ehémplo heʼi oikotaha gérra, terremóto guasu, ñembyahýi ha umi mbaʼasy iñasarambíva opárupi. Koʼã mbaʼe oikóma hína ñane tiémpope (Lucas 21:10-17).

La Biblia heʼi avei mbaʼéichapa oñekomportáta umi hénte “umi ára pahápe”. Upéva ikatu jatopa 2 Timoteo 3:1-5-pe, heʼihápe umi persóna oñekomporta vaietereitaha. Jahecha jave mbaʼéichapa umi hénte ñane tiempopegua opensa ha umi mbaʼe ojapóva, ojekuaa porãiterei oñekumpliha la Biblia heʼíva.

¿Mbaʼépa heʼise koʼã mbaʼe oikóva hína? Heʼise Ñandejára Rréino og̃uahẽmbaitemaha ha ojapotaha peteĩ kámbio tuichaitereíva ko yvýpe. Upépe ae entéro persóna oiko porãta ko yvy ape ári (Lucas 21:36). Ñandejára opromete la Bíbliape omoporãtaha ñane planéta ha ovendesitaha umi oikóvape Igoviérno poguýpe. Jahechamína unos kuánto ehémplo.

‘Upe rire oñemeʼẽ Jesúspe autorida ogoverna hag̃ua, podér ha peteĩ rréino, ikatu hag̃uáicha oservi chupe umi hénte opa tetãygua ha puévlo oñeʼẽva diferénte idióma. Haʼe ogovernáta opa ára g̃uarã ha irréino noñehundimoʼãi arakaʼeve’ (DANIEL 7:14).

Mbaʼépa heʼise: Ñandejára Rréino ogovernataha ko yvy tuichakue ha Jesús haʼeha pe rréi. Nde ikatúta edisfruta pe goviérno poguýpe.

“Ni peteĩ oikóva ko yvy ape ári ndeʼimoʼãvéima: ‘Cherasy hína’” (ISAÍAS 33:24).

Mbaʼépa heʼise: Ndaiporiveitamaha hasýva ni orekóva diskapasida. Ikatúta reiko pára siémpre.

“Ndaiporimoʼãvéima ni peteĩ gérra ko yvy ape ári” (SALMO 46:9).

Mbaʼépa heʼise: Ndaiporiveitamaha gérra ni umi sufrimiénto oguerúva umíva.

“Opáta umi hénte iñañáva” ha “umi hénte ivuénova opytáta ko yvy ape ári” (SALMO 37:10, 11).

Mbaʼépa heʼise: Ndaiporiveitamaha hénte aña, upe tiémpope oikóta sólamente umi iñeʼẽrenduséva Ñandejárape.

“Umi hénte ojogapóta ha oikóta hóga teépe, oñotỹta parrál ha hoʼúta hiʼa” (ISAÍAS 65:21, 22).

Mbaʼépa heʼise: Ko yvy kompletoite haʼetaha peteĩ hardín neporãva. Ñandejára okumplíta pe jajeruréva hína jaikóvo: “Tou ne Rréino” (Mateo 6:10).