“Peñemboʼe jave ani perrepeti jey jey peteĩ mbaʼénte” (Mateo 6:7).

Ñañemboʼe jave Ñandejárape haʼe ndoipotái jarrepeti jey jeýnte chupe umi mbaʼe jaikuaáva de memória térã jaleéva peteĩ lívrope. Upéva rangue haʼe oipota ñañeʼẽ chupe ñande pyʼaite guive. Por ehémplo, ¿mbaʼéichapa nde eñeñandúta peteĩ ne amígo tódo los día heʼíramo ndéve la mísma kósa? Ajépa ndaigustomoʼãi ndéve. Umi oñoamígova ningo ikatu oñeʼẽ oñondive oimeraẽ témare. Upéicharõ, ñañemboʼéramo Ñandejárape ku ñañemongétarõguáicha hendive, jahechaukáta chupe jaikoseha iñamígoramo.

“Peẽ pejerure jave noñemeʼẽi peẽme, pórke peẽ pejerure hína pejapo hag̃ua ivaíva” (Santiago 4:3).

Nañahaʼarõi vaʼerã voi Ñandejára orresponde ñane ñemboʼe oimérõ jajapose hína peteĩ mbaʼe ndogustáiva chupe, térã jajerurérõ chupe peteĩ mbaʼe haʼe ndoipotáiva ñande jareko. Por ehémplo, peteĩ persóna ohugáramo ogana hag̃ua pláta ha oñemboʼéramo Ñandejárape oreko hag̃ua suérte, ¿ndépa ere Ñandejára orrespondetaha upe ñemboʼe? Ñandejára ningo heʼi porã ñandéve ndovaleiha ñandetaryrýi ha ndovaleiha avei jarovia umi mbaʼe ndahaʼéiva siérto, por ehémplo pe vuéna suérte (Isaías 65:11; Lucas 12:15). Jaikuaa porã ningo Ñandejára norrespondemoʼãiha peichagua ñemboʼe. Upéicharõ, Ñandejára orresponde hag̃ua ñane ñamboʼe, jajasegura raẽ vaʼerã  umi mbaʼe jajeruréva chupe ojoguerahaha hína umi mbaʼe heʼívandi la Bíbliape.

“Pe nohenduséiva pe léi heʼíva, pe iñemboʼe jepe oporombojeguaru” (Proverbios 28:9).

Ymave Ñandejára norrespondéi vaʼekue iñemboʼe umi persóna naiñeʼẽrendúivape chupe (Isaías 1:15). Ha ohasávo la tiémpo Ñandejára nokambiái la opensa lája (Malaquías 3:6). Upéicharõ, jaipotáramo Ñandejára orresponde ñane ñemboʼe, ñaneñeʼẽrendu vaʼerã chupe. Péro ¿mbaʼépa jajapóta oimérõ ymave jajapo raʼe ivaíva? ¿Heʼisépa upéva Ñandejára núnka nohendumoʼãiha ñane ñemboʼe? Ndahaʼéi avei la upeichaite. Ñandejára ningo mborayhúpe ñaneperdonáta ñañarrepentíramo ñande pyʼaite guive ha ñañehaʼãmbaite jajapo la chupe ogustáva (Hechos 3:19).