Pamela heʼi: “Asegírõ guare tratamiénto pe kánserpe g̃uarã, akyhyjeterei kuri. Péro añemboʼe rire Ñandejárape, tuicha chepyʼaguapy ha ndahaʼevéima la akyhyjetereíva. Koʼag̃aite peve chembohasa asýiti ko mbaʼasy, péro pe ñemboʼe chepytyvõ ani hag̃ua añekonsentraiterei hese. Umi hénte oporandu jave chéve mbaʼéichapa añeñandu, haʼe chupekuéra: ‘Ndahaʼéi la aime porãitereíva, péro lomímonte avyʼa’”.

Natekotevẽi ningo ñahaʼarõ jahasa raẽ peteĩ situasión oapeligráva ñande rekove ñañemboʼe hag̃ua Ñandejárape. Koʼág̃arupi, enterovéva ñane provléma. Ha enterovéva ñaikotevẽ ajúda ñambohovái porã hag̃ua umíva. ¿Ikatúpa pe ñemboʼe ñanepytyvõ?

La Biblia heʼi: “Emoĩ Jehová pópe umi mbaʼe ndepyʼapýva, ha haʼe katuete nepytyvõta. Ni mbaʼevéicharõ ndohejamoʼãi pe iñeʼẽrendúva hoʼa” (Salmo 55:22). ¡Ñanembopyʼaguapyete ningo la heʼíva ko téxto! Jahechaháicha, ñañemboʼérõ Ñandejárape haʼe oipotaháicha, haʼe omeʼẽta ñandéve ñaikotevẽva guive ñambohovái porã hag̃ua umi situasión ijetuʼúva (Ehecha pe rrekuádro: “ Mbaʼépepa ideprovécho pe ñemboʼe”).