KATUETE jaagradeséta jarresivíramo peteĩ rregálo iporãitereíva. Jesús ohechauka vaʼekue iñimportanteha ñandeagradesído. Peteĩ día haʼe omonguera 10 kuimbaʼe orekóvape lépra, ko mbaʼasy ningo upe tiémpope ndaikatúi vaʼekue oñemonguera. Péro umi 10 apytégui, peteĩnte “ojevy ha sapukaihápe ombotuicha Ñandejárape”. Jesús heʼi: “¿Noñemonguerái piko raʼe diez kuimbaʼépe? ¿Moõ piko upéicharõ oime umi nueve?” (Lucas 17:12-17). Ko mbaʼe oiko vaʼekue ohechauka sapyʼaitépe ikatuha ñanderesarái umi mbaʼe porã ojejapóva ñanderehápe.

Pe sakrifísio Jesús ojapo vaʼekue idiferénte oimeraẽ ótro rregálogui. Haʼe voi pe rregálo tuichavéva jarresivi vaʼekue. Péro, ¿mbaʼéichapa ikatu rehechauka remombaʼeha Ñandejára ojapo vaʼekue nderehehápe?

• Eikuaave chupe. Jesús omano haguére ñanderehápe ndeʼiséi jahupytytamaha katuete pe jeikove opaveʼỹva. Jesús voi heʼi vaʼekue oñemboʼérõ guare Ñandejárape: “Umi hénte ohupyty hag̃ua jeikove opaveʼỹva, tekotevẽ ndekuaa porãve ohóvo, nde Ñandejára teete ha peteĩetévape ha Jesucrístope, upe nde rembou vaʼekue” (Juan 17:3). Por  ehémplo, ojeʼéramo ndéve nemitãme peteĩ persóna ndesalva hague, katuete reikuaa porãsevéta chupe ha reikuaaséta mbaʼérepa ndesalva raʼe. Ñandejára Jehová omeʼẽ kuri Itaʼýra ñanderehehápe, haʼe ningo ndoipotái reikuaánte chupe, síno oipota voi reñemoag̃ui hese. La Biblia heʼi voi: “Peñemoag̃uíkena Ñandejárare, ha haʼe oñemoag̃uíta penderehe” (Santiago 4:8).

• Ejerovia pe sakrifísiore. La Biblia heʼi: “Ojeroviáva pe Taʼýrare ohupytýta jeikove opaveʼỹva” (Juan 3:36). ¿Mbaʼépa heʼise jajerovia? Ndahaʼéi jaʼénteva jajeroviaha, síno jahechauka vaʼerã upéva (Santiago 2:17). ¿Ha mbaʼéichapa ikatu jahechauka? Por ehémplo, peteĩ rregálo ningo ñanembaʼéma jajagarra rire ae. Péicha avei rejapo vaʼerã pe rregálo Ñandejára omeʼẽvare ñandéve. ¿Mbaʼéichapa ikatu rejapo upéva? Reiko vaʼerã Ñandejára oipotaháicha. * Avei tekotevẽ rejerure chupe neperdona hag̃ua ikatu hag̃uáicha ne konsiénsia ipotĩ. Reñemoag̃uíramo hese ha rejeroviáramo pe sakrifísiore, ikatúta reiko pára siémpre ha pyʼaguapýpe (Hebreos 11:1).

• Egueromanduʼa Jesús omano hague ára. Jesús ojerure vaʼekue ojegueromanduʼa hag̃ua káda áño pe sakrifísio ojejapo vaʼekue ñanderehehápe. Haʼe heʼi: “Pesegíkena pejapo kóva penemanduʼávo cherehe” (Lucas 22:19). Ore testígo de Jehová rogueromanduʼáta hína upéva ág̃a martes 11 de abril oike rire kuarahy. Upe rreunión ipukúta 1 órarupi, ha pype oñeanalisáta mbaʼérepa tekotevẽ raʼe Jesús ou omano ha mbaʼéichapa upéva ikatu ñanepytyvõ koʼág̃ama voi ha avei tenonderãme. Pe áño ohasa vaʼekuépe oñerreuni kuri haimete 20 millón de persóna ogueromanduʼa hag̃ua upe día. Rovyʼaitereíta avei nde ikatúramo oremoirũ upe rreuniónpe ha péicha jahechauka ñamombaʼeha pe rregálo iporãvéva Ñandejára omeʼẽ vaʼekue ñandéve.