Jesús oprofetisa haguéicha oikotaha, koʼág̃arupi ojepredika hína opárupi ko yvy ape ári umi notísia porã oñeʼẽva Ñandejára Rréinore (Mateo 24:14). Pe lívro de Daniel ohechauka upe Rréino haʼeha peteĩ goviérno Ñandejára voi omoñepyrũ vaʼekue. Kapítulo 2-pe oñemombeʼu oĩtaha unos kuánto rréino térã goviérno omanda guasútava ko múndope, umíva oñepyrũta Babilóniagui ha og̃uahẽta ñane tiémpo peve. Pe versíkulo 44-pe katu omombeʼu ñandéve mbaʼépa oikóta upe rire:

“Ñandejára omoĩta peteĩ rréino núnka noñehundimoʼãiva. Ko rréino ndopytamoʼãi ótro puévlo poguýpe. Omonguʼíta ha ohundíta enterove koʼã rréino, ha ko rréino añoite opytáta opa ára g̃uarã”.

Ko profesía ha avei ótro oĩva la Bíbliape heʼi Ñandejára Rréino omyengoviataha entéro umi yvypóra goviérnope, ha heʼi avei ipoguýpe ndaiporimoʼãiha oñorairõva ni ojapóva sarambi. ¿Mbaʼéichapa jaikóta Ñandejára Rréino ogoverna vove ko yvy ape ári? Jahechamína unos kuánto promésa iporãitereíva oñekumplítava koʼẽrõitéma.

• OPÁTA UMI GÉRRA

  Salmo 46:9: “Ndaiporimoʼãvéima ni peteĩ gérra ko yvy ape ári, pórke Ñandejára omopẽ umi flécha ha umi lánsa, ha ohapy umi kárro ojepurúva gerrahápe”.

  Ko múndope oĩ hetaiterei persóna ivaletereíva ha oipurúva hetaiterei pláta ojapo hag̃ua umi árma. ¡Epensamína mbaʼéichapa jaiko vaʼerãmoʼã opa koʼã mbaʼe ojepurúrire oñepytyvõ hag̃ua la héntepe! Ha upéva haʼe hína la oikótava Ñandejára Rréino ogoverna vove ko yvy ape ári.

• OPÁTA UMI MBAʼASY

  Isaías 33:24: “Ha ni peteĩ oikóva ko yvy ape ári ndeʼimoʼãvéima: ‘Cherasýko hína’”.

  Epensamína mbaʼéichapa jaikóta ndaiporivéiramo hasýva ikorasõgui, orekóva kánser, huguy asukáva ha umícha. Upéicharamo ningo nañaikotevẽmoʼãvéima ospitál ni pohã. Ñandejára Rréino ogoverna vove, enterovéva siémpre hesãita.

• OPÁTA PE ÑEMBYAHÝI

  Salmo 72:16: “Ko yvy oprodusi porãitereíta, umi montáña ruʼãme entéro, hembypáta la ojekosecha vaʼerã”.

  Ko yvy oprodusi porãitereíta ha ohupytýta enterovetépe. Ndaiporimoʼãvéima iñembyahýiva ha entéro oñealimenta porãta.

• OPÁTA OÑEMBYASÝVA, OSUFRÍVA HA OMANÓVA

  Apocalipsis 21:4: Ñandejára “omokãmbaitéta hesaykuéra, ndaiporimoʼãvéima omanóva, oñembyasýva, hasẽva ni hasýva. Umi mbaʼe yma guare ohasapáma”.

   Umi persóna perféktota ha oikóta pára siémpre peteĩ paraísope ko yvy ape ári. Upéva ningo haʼe pe promésa porãite ojapóva ñandéve ñande Apohare ñanderayhuetéva Jehová.

¿Mbaʼépa nde repensa? ¿Oimépa koʼã mbaʼe iporãitereíma oñekumpli hag̃ua? La majoríape ningo ogusta umi promésa oĩva la Bíbliape, péro heta oĩ opensáva ñande ndaikatuiha jaiko pára siémpre, pórke ndoikuaái hikuái ni peteĩ persóna núnka nomanói vaʼekuépe.

Ymaite guive entéro yvypóra oiko pekádo poguýpe ha omano, upévare osufri ha oñembyasy. Upéicha rupi, oĩ opensáva koʼã mbaʼe oikónte vaʼerãha voi ñanderehe. Péro upéva ndahaʼeiete hína la Ñandejára opensa vaʼekue ñandéve g̃uarã.

Ikatu hag̃uáicha jajerovia umi promésa ojapo vaʼekuére Ñandejára, haʼe voi heʼi ñandéve: “Upeichaite avei umi palávra osẽva che jurúgui, ndojevymoʼãi che rendápe oñekumpliʼỹre. Síno katuete oikóta opaite mbaʼe che aipotáva, la che haʼéva núnka nosẽvaimoʼãi” (Isaías 55:11).

La Biblia heʼi Ñandejára ndaikatuiha ijapu (Tito 1:2). Ha Ñandejára voi ojapo ñandéve koʼã promésa, upévare iporãta ñapensáramo koʼã mbaʼére: ¿Añetehápe piko ikatúne jaiko pára siémpre peteĩ paraísope ko yvy ape ári? ¿Mbaʼépa jajapo vaʼerã jahecha hag̃ua Ñandejára okumpli vove opa mbaʼe opromete vaʼekue? Umi artíkulo oúvape jahecháta mbaʼéichapa oñembohovái koʼã porandu.