Por ehémplo, peteĩ kuñakarai hérava Teresa * oikóva Estados Unídospe operdepaite vaʼekue ikosakuéra oikórõ guare peteĩ urakán. Haʼe heʼi: “Che apensa vaʼekue naaguantamoʼãiha upe situasión. Ha heta vése añandu voi nameʼẽveimaha”.

Ijetuʼueterei avei ñambohovái hag̃ua omanóramo ñandehegui peteĩ jahayhúva. Peteĩ kuñakarai Australiagua hérava Rosa heʼi: “Omanóramo guare chehegui mokõive che membykariaʼy, añeñandu vaieterei ha apyta yvýre, ha ndaikuaái mbaʼépa ikatu ajapo ajerrekupera jey hag̃ua. Haʼe Ñandejárape: ‘Che ningo nameʼẽvéima. Hiʼã voi chéve apytánte ake rei ha ndapayvéi’”.

Daniel ohasa vaʼekue ótro situasión ijetuʼuetereíva. Haʼe opyta vaieterei vaʼekue hembireko omoakãratĩrõ guare chupe. Daniel omombeʼu mbaʼéichapa oñeñandu: “Che rembireko heʼírõ guare chéve chemoakãratĩ hague, añandu voi ku chekuturamoguáicha peteĩ kyse che korasõitépe. Ha heta tiémpore añandu vaʼekue upéva chembohasyete hague”.

Ko rrevísta Ñemañaha nepytyvõta ehecha hag̃ua mbaʼérepa ndovaléi eñentrega, ha ikatuha egueropuʼaka umi situasión ijetuʼuetereíva rehasáva, por ehémplo:

• Oikóramo peteĩ desástre naturál

• Omanóramo ndehegui peteĩ rehayhúva

• Netraisionáramo ne ména térã ne rembireko

• Reguerekóramo peteĩ mbaʼasy ijetuʼuetereíva

• Eñeñandu vaieterei térã eñedeprimíramo

Jahechamína primerorã mbaʼépa ikatu jajapo ñandeafektáramo peteĩ desástre naturál.