UMI artíkulo ohasa vaʼekuépe jahecha kuri umi situasión ijetuʼuetereíva ikatúva ohasa peteĩ persóna. Ikatu voi koʼág̃a rehasa hína peichagua situasión, ha eñeporandu noiméipa iporãve reñentregántema térã ikatu avei repensa ndaiporiha avave oñeinteresáva nderehe. Péro reimekuaa segúro Ñandejára ojepyʼapyha nderehe ha ombyasyha ohechávo resufriha. Haʼe ningo oñeinteresaiterei voi nderehe.

Salmo 86 ohechauka ikatuha jajerovia Ñandejárare, upépe heʼi: “Che ajerure ndéve ajúda ahasa asy jave, pórke aikuaa porã nde katuete chepytyvõtaha” (Salmo 86:7). Péro oiméne reikuaase: “Ahasa asy jave, ¿mbaʼéichapa Ñandejára chepytyvõ ajerure jave chupe ajúda?”.

Ñandejára norremediáiramo jepe ensegidaite upe rehasáva, la Biblia ohechauka porã haʼe ikatuha nembopyʼaguapy regueropuʼaka hag̃ua umi provléma. Filipenses 4:6, 7 heʼi: “Ani pejepyʼapyeterei mbaʼevére, síno opa árape pemombeʼu Ñandejárape peipotáva, pejapo upéva peñemboʼévo, pejerure asývo, ha peagradese avei chupe. Ha Ñandejára pyʼaguapy tuichavéva opa mbaʼe ikatúvagui pentende, oñangarekóta pene korasõre ha umi mbaʼe pepensávare”. Jahechamína unos kuánto téxto bíblico nepytyvõtava rehechakuaa hag̃ua Ñandejára oñeinteresaha nderehe.

‘Ñandejára ndahesaráiri ni peteĩ gorrióngui. Péro peẽ pevaleve hína heta gorrióngui’ (Lucas 12:6, 7).

EPENSAMÍNA: umi guyraʼi haʼete la naiñimportanteguasúiva, péro Ñandejára ndahesaráiri chuguikuéra. Haʼe ningo oreko enkuénta umi michĩvévape jepe ha káda uno iñimportanteterei chupe g̃uarã. Yvyporakuéra koʼýte iñimportanteve chupe g̃uarã umi guyraʼígui. Ñandejára hakateʼỹve yvyporakuérare opa ótro ikreasión oĩvagui ko yvy ape ári. Haʼe ñandeapo ijoguahárõ ha upévare ikatu jahechauka umi kualida porãite oguerekóva (Génesis 1:26, 27).

‘Jehová, nde ningo chekuaa porãiterei, pórke nde remaña mbaʼe mbaʼépa areko che pyʼapýpe. Ha reikuaáma mbaʼépa apensa. Emañána pe che pyʼapýpe oĩvare reikuaa hag̃ua mbaʼépa la chekevrantáva’ (Salmo 139:1, 2, 23).

EPENSAMÍNA: Ñandejára ningo ndekuaa porãiterei, ha oikuaa umi mbaʼe repensáva, reñandúva ha avei la ndepyʼapýva. Ikatu oime umi ótro nontendéi la rehasáva péro Ñandejára ojepyʼapy nderehe ha nepytyvõse. Upévare, aníkena reñentrega.

‘Jehová, ehendumína che ñemboʼe, chéngo ajerure asy ndéve chepytyvõ hag̃ua. Ñandejára, cherendúna por favór. Anína rehaʼarõiterei rekontesta hag̃ua chéve. Umi opytáva mbaʼeveʼỹre oñemboʼéta ha Ñandejára ohendúta chupekuéra’ (Salmo 102:1, 2, 17).

EPENSAMÍNA: Ñandejára ningo oreko enkuénta yvyporakuéra sufrimiénto. Haʼete voi oanotáva umi tesay oñohẽva yvyporakuéra, oñepyrũ guive entéro mbaʼe vai ko múndope (Salmo 56:8). Umíva apytépe oĩ avei nde resay. Ñandejára imanduʼa umi provléma rehasa vaʼekuére ha umi nde resay reñohẽvare, pórke neimportanteterei chupe g̃uarã.

‘Che ningo nde Jára, upévare ani rejepyʼapy. Che romombaretéta ha roipytyvõta. Che ningo Jehová, nde Jára. Che ningo haʼe ndéve: “Ani rekyhyje, che roipytyvõta”’ (Isaías 41:10, 13).

EPENSAMÍNA: Ñandejára ningo siémpre oĩ nepytyvõ hag̃uáicha. Upeichahágui rejúramo nekangy, haʼe nepytyvõta ha nemopuʼãta.

“Ñandejára ohayhuetereígui pe múndo omeʼẽ Itaʼýra peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva” (Juan 3:16).

EPENSAMÍNA: Ñandejára nderayhueterei ha upéicha rupi omeʼẽ Itaʼýra rekove nderehehápe. Ko sakrifísio rupive ikatu revyʼa koʼág̃ama voi, ha ereko oportunida reiko hag̃ua pára siémpre. *