ÑANDE ru ha ñande sy ypykue naiñeʼẽrendúi haguére, entéro yvypóra japyta pekádo ha ñemano poguýpe. Péro Ñandejára volunta yvyporakuérape g̃uarã nokambiái. La Bíbliape heta hendápe oasegura ñandéve upéva.

• “Umi hembiapo porãvape oñemeʼẽta ko yvy, ha oikóta pype opa ára g̃uarã” (Salmo 37:29).

• “Ñandejára Jehová ogovernáva opa mbaʼe ohundíta pe ñemano opa ára g̃uarã, ha omokãta umi hénte resay” (Isaías 25:8).

• “Ha ñane enemígo ipahaite oñehundítava haʼe pe ñemano” (1 Corintios 15:26).

• “Ndaiporimoʼãvéima omanóva, oñembyasýva, hasẽva ni hasýva” (Apocalipsis 21:4).

¿Mbaʼépa ojapóta Ñandejára ‘ohundiete’ hag̃ua pe ñemano? Jahechaháicha, la Biblia heʼi ‘umi hembiapo porãvape oñemeʼẽtaha ko yvy, ha oikóta pype opa ára g̃uarã’. Péro heʼi avei ndaiporiha “ni peteĩ kuimbaʼe ihústova siémpre ojapóva iporãva ha núnka ndopekáiva” (Eclesiastés 7:20). ¿Ikatúpa jaʼe upéicharõ Ñandejára opermititaha jaiko pára siémpre ndajajapóiramo jepe haʼe omandáva? Nahániri. Haʼe ni mbaʼevéicharõ ndojapomoʼãi upéva, pórke Ñandejára ndaikatúi ijapu (Tito 1:2). Upéicharõ, ¿mbaʼépa ojapóta Ñandejára okumpli hag̃ua ivolunta yvyporakuérape g̃uarã?

Jehová ñanderayhueterei ha upévare opaga la tekotevẽva ñanderreskata hag̃ua pe pekádo poguýgui. Rreskáte haʼe hína pe présio ojepagáva ojerrekupera hag̃ua álgo térã ojepaga hag̃ua pe hustísia ojerureháicha. Pe rreskáte ojepagáva ha pe mbaʼe ojerrekuperaséva oreko vaʼerã el mísmo valór. Ñande yvypóra ningo enterove imperfékto ha ñañekondenáma ñamano hag̃ua. La Biblia heʼi voi: “Péro ni peteĩva ndaikatúi osalva ótrope, ni ndaikatúi opaga Ñandejárape orreskata hag̃ua hapichápe. Ñande rekove ningo ovaleterei, upévare avave ndaikatúi opaga hese la ovaléva, ni iplatavéramo jepe” (Salmo 49:7, 8).

Peteĩ yvypóra imperfékto omanóramo opaga ipekádorente, ndaikatúi ni ijupe ojesalva ha ndaikatúi avei opaga ótro pekádore (Romanos 6:7). Ñande ñaikotevẽ kuri peteĩ persóna perfékta omano ñanderehehápe ha péicha opaga hag̃ua ñande pekádore, ndahaʼéi ipekádore (Hebreos 10:1-4).

Ñandejára oñenkarga kuri ojejapo hag̃ua upéva, haʼe ombou Itaʼýra Jesúspe yvágagui onase hag̃ua peteĩ yvypóra perféktoicha (1 Pedro 2:22). Jesús heʼi vaʼekue voi ou hague “opaga ha oguenohẽ hag̃ua hetápe pekádo poguýgui” (Marcos 10:45). Haʼe omano kuri ikatu hag̃uáicha oñehundi pe ñemano, ha omeʼẽ hag̃ua ñandéve oportunida jaikove hag̃ua opa árare (Juan 3:16).

Ñane tiémpope oñekumplíma hína umi profesía oĩva la Bíbliape. Koʼág̃arupi ijetuʼueterei la situasión ha hasy jagueropuʼaka hag̃ua, upéva ohechauka ñaimemaha “umi ára pahápe” (2 Timoteo 3:1). Koʼã ára paha opáta hína “og̃uahẽvo pe ára ojehusga ha oñehundi hag̃ua umi hénte añáme” (2 Pedro 3:3, 7). Péro umi ohayhúva Ñandejárape ojesalváta ha “oikovéta opa ára g̃uarã” (Mateo 25:46).

Hetaiterei persóna oñemoingove jeývape oñemeʼẽta avei oportunida oikove hag̃ua opa árare.  Jesús ovisitárõ guare pe siuda de Naín ohechauka kuri ikatuha omoingove jey umi omano vaʼekuépe. Upérõ omano kuri peteĩ viúda membykuimbaʼe peteĩmi, ha Jesús oiporiahuverekoitereígui pe kuñakaraípe omoingove jey pe imembýpe (Lucas 7:11-15). Apóstol Pablo heʼi vaʼekue: “Ha areko esperánsa Ñandejárare, [...] oñemoingove jeytaha umi hekojojáva ha hekojojaʼỹva”. Ko esperánsa porãite ohechauka porãiterei ñandéve mbaʼeichaitépa Ñandejára ñanderayhu (Hechos 24:15).

Hetaiterei persóna oreko esperánsa oikove hag̃ua pára siémpre. La Biblia heʼi: “Umi hembiapo porãvape oñemeʼẽta ko yvy, ha oikóta pype opa ára g̃uarã” (Salmo 37:29). Og̃uahẽ vove upe tiémpo, vyʼápe heʼíta hikuái apóstol Pablo oskrivi haguéicha ojapóma 2.000 áño: “Ñemano, ¿moõ piko oĩ la ne mbaretekue? Ñemano, ¿moõ piko oĩ la ne venéno?” (1 Corintios 15:55). Upépe por fin oñehundítama pe ñane enemígo tuichavéva, pe ñemano.