Ñandejára heʼi chupe: “Reʼuha díape katuete remanóta” (Génesis 2:17). Oimérire Adán ituja ha omanótante voi, ¿maʼerãpa Ñandejára heʼíta chupe upéva? Adán oikuaa kuri ndoʼúiramo pe frúta nomanomoʼãiha.

Adán ha Eva ningo noikotevẽi kuri upe frútare oikove hag̃ua, pe hardínpe oĩ voi kuri opaichagua yva (Génesis 2:9). Ndoʼúirire hikuái pe frúta ojeproivi vaʼekue chuguikuéra iñeʼẽrendúta kuri Ñandejárape, ha ohechaukáta orrekonoseha Ñandejára añoite orekoha derécho heʼívo chupekuéra mbaʼépa ojapo vaʼerã. Amo ipahápe ningo Ñandejára rupivénte voi haʼekuéra oikove.

Ñantende hag̃ua mbaʼérepa omano kuri Adán ha Eva, jahecha vaʼerã peteĩ mbaʼe oiko vaʼekue, ha upéva káusare koʼag̃aite peve jasufri la konsekuénsia. Satanás oipuru peteĩ mbóipe heʼi hag̃ua peteĩ japu ivaietereíva. La Biblia heʼi: “Pe mbói haʼe vaʼekue pe imañerovéva opaite animál Ñandejára Jehová ojapo vaʼekue apytépe. Upéi pe mbói heʼi pe kuñáme: ‘¿Añetéiko Ñandejára heʼi peẽme ndovaleiha peʼu umi yvyramáta hiʼávagui oĩva guive ko hardínpe?’” (Génesis 3:1).

Eva heʼi chupe: “Umi yva orekóva umi yvyramáta oĩva guive ko hardínpe ningo ore ikatu roʼu. Péro pe yvyramáta oĩvare hardín mbytépe, Ñandejára heʼíma oréve: ‘Aníke peʼu hiʼa, ha animoʼãke pepoko hese, cháke pejapóramo upéva, pemanóta’”. Péro pe mbói heʼi chupe: “Peẽ ningo ni mbaʼevéicharõ napemanomoʼãi. Ñandejára oikuaa porã peʼuha árape pe yva pejesapeʼataha, ha pejoguáta Ñandejárape ha peikuaáta mbaʼépa iporã ha mbaʼépa ivai”. Péicha Satanás heʼi Jehová ijapuha ha omokañyha álgo iporãva chuguikuéra (Génesis 3:2-5).

Eva hoʼa upe ñuhãme. Haʼe omaña pe yvyramátare, ha haʼete voi chupe hetereítava la hiʼa, upémarõ ipojái hese, oipoʼo pe frúta ha hoʼu. La Biblia heʼi mbaʼépa oiko upe rire: “Upéi iména oúrõ guare hendápe, omeʼẽ chupe ha haʼe hoʼu avei” (Génesis 3:6).

¡Oiméne Ñandejára oñeñandu vaieterei raʼe Adán ha Eva naiñeʼẽrendúi haguére! ¿Mbaʼépa odesidi ojapo? Jehová heʼi Adánpe: “Rembaʼapóta ha heta nderyʼáita rehupyty hag̃ua ne rembiʼurã, oiko jey peve ndehegui yvy, pórke upévagui voi nde rejejapo vaʼekue. Ndéngo yvýguinte voi rejejapo vaʼekue ha yvy jey oikóta ndehegui” (Génesis 3:17-19). Ha upeichaite oiko kuri, “Adán oikove 930 áño, ha upéi omano” (Génesis 5:5). Péro omano rire haʼe ndohói yvágape ni ótro lugárpe. Jehová ojapo vaʼekue Adánpe yvýguinte, ha upe mboyve Adán ndoexistíri vaʼekue. Omano rire katu oiko jey chugui  yvy ha opa rei jey. ¡Ajépa ñambyasyete la oiko vaʼekue!

Adán ha Eva naiñeʼẽrendúi rupi Ñandejárape ndahaʼevéima perfékto ni ndaikatuvéima oiko hikuái pára siémpre. Upe guive okambiáma ikuerpokuéra, oikóma chuguikuéra yvypóra imperfékto ha pekadór. Péro pe pekádo ndoperhudikái chupekuérante, síno avei entéro ifamiliarépe. Romanos 5:12 heʼi: “Peteĩ kuimbaʼe rupive pe pekádo oike ko múndope, ha pe ñemano oike pekádo rupive. Upéicha pe ñemano ohupyty entéro kuimbaʼépe, enterovéva opeka rupi”.

La Biblia oñeʼẽ jave pe pekádo ha ñemanóre heʼi haʼeteha peteĩ “téla okuvríva entéro umi tetãme”, ha avei peteĩ “mánto ojepysóva entéro umi puévlo ári” (Isaías 25:7). Ko téla okuvríva yvyporakuérape haʼete tatatĩ oñekontamináva ha ojagarrapáva opárupi. Upeichaite ningo, “Adán káusare enterove omano” (1 Corintios 15:22). Péro koʼág̃a ikatu ñañeporandu apóstol Pablo oñeporandu vaʼekue: “¿Máva piko chesalváta ko che retégui, chegueraháva hína ñemanóme?”. ¿Oĩpa álgien ikatúva ñandesalva? (Romanos 7:24).