Proféta Moisés heʼi vaʼekue ñaneñeʼẽrendúramo Ñandejárape Haʼe ñanevendesitaha (Deuteronomio 10:13; 11:27). Péro ndahaʼéi ñaneñeʼẽrendúva chupe jakyhyjégui ñandekastigárõ g̃uarã. Upéva rangue, jahayhu chupe jahechágui umi kualida porãite orekóva, ha upéva ñanemomýi ñaneñeʼẽrendu hag̃ua ha ñamboyke hag̃ua umi mbaʼe omoñeñandu vaíva chupe. La Biblia heʼi voi: “Jahayhu Ñandejárape heʼise ñakumpli imandamientokuéra, ha imandamientokuéra ndahaʼéi la hasyetereíva ñakumpli hag̃ua” (1 Juan 5:3).

Péro, ¿mbaʼe vendisiónpa jahupytýta ñaneñeʼẽrendúramo Ñandejárape? Jahechamína mokõi.

“Che hína nde Jára Jehová. Umi mbaʼe che romboʼéva ningo ideprovéchota ndéve, che rogia reho hag̃ua tape porãre” (ISAÍAS 48:17).

Ñandejára Jehová, haʼéva ñande Apohare, ñandekuaa porãiterei ha ikatu ñandegia. Péro jaipotáramo la haʼe ñanemboʼéva ñanepytyvõ jadesidi porã hag̃ua, ñaaprende vaʼerã Ñandejára Ñeʼẽgui mbaʼépa oipota jajapo, ha upéi jajapo upéva.

“Umi ohendúva Ñandejára ñeʼẽ ha ojapóva la ovyʼáva” (LUCAS 11:28).

Oĩ heta hénte ojapóva Ñandejára Ñeʼẽ heʼíva, ha upévare ovyʼa. Por ehémplo, epensamína la ojehu vaʼekue peteĩ karai oikóvape Espáñape. Haʼe heʼi ijarhél ha iviolénto hague, upévare otrata vai entérope, hembirekópe jepe. Péro peteĩ vuéltape olee proféta Moisés heʼi vaʼekue José rehe, haʼéva Jacob raʼy. Chupe oñevende esklávoramo, ha oñemoinge kárselpe ojapoʼỹre mbaʼeve ivaíva. Upéicharõ jepe, haʼe osegi iñamávle, ipyʼaguapy, ha oporoperdona (Génesis kapítulo 37-45). Pe karai heʼi: “José ehémplo chemokyreʼỹ añehaʼã hag̃ua cheamávle, chevuéno ha ajejokokuaa. Upéicha rupi koʼág̃a añetehápe avyʼa”.

Ñandejára Ñeʼẽ ñandegia hetave hendáicha jaikuaa hag̃ua mbaʼéichapa jatrata vaʼerã ñande rapichakuérape. Pe ótro artíkulope ñañeʼẽvéta upe témare.