Ñandejára opromete vaʼekue pe proféta Abrahánpe peteĩ ifamiliare rupive oñevendesitaha “entéro nasión oĩva pe yvy ape ári” (Génesis 22:18). ¿Mávapa haʼéta upéva?

Ojapóma haimete 2.000 áño Ñandejára omeʼẽ hague Jesúspe podér ojapo hag̃ua heta milágro, ha Jesús ou vaʼekue Abrahán familiarégui. Umi milágro ohechauka porã pe promésa ojejapo vaʼekue Abrahánpe, outaha Jesús rupive (Gálatas 3:14).

Umi milágro Jesús ojapo vaʼekue ñanepytyvõ japilla hag̃ua Ñandejára oiporavo hague chupe ovendesi hag̃ua yvyporakuérape pára siémpre, ha avei ohechauka mbaʼéichapa ojapóta upéva. Jahechamína mbaʼéichapa koʼã milágro ohechauka heta kualida porã orekóva Jesús.

Ontende umi ótrope: omonguera umi hasykatúvape.

Peteĩ vuéltape, peteĩ lepróso ojerure asy Jesúspe ikatúpa omonguera chupe. Jesús opoko hese ha heʼi chupe: “Si, romonguerase”. Ha upepete okuera (Marcos 1:40-42).

Ipojera: omongaru umi iñembyahýivape.

Jesús ndoipotái vaʼekue la hénte iñembyahýi. Upévare mas de una ves haʼe ojapo milágro omongaru hag̃ua hetaitereípe, ha upearã oipuru unos kuánto pan ha piraʼi oreko vaʼekue (Mateo 14:17-21; 15:32-38). Ha umi hénte okarupa rire, hemby jey hetaiterei tembiʼu.

Oporoporiahuvereko: omoingove jey umi omano vaʼekuépe.

Jesús ohechárõ guare peteĩ viudami oñembyasyetereiha omano rire chugui imembykuimbaʼe peteĩmi, omoingove jey pe mitãkuimbaʼépe. Pe kuñakarai ningo ndorekói kuri ótro okuida vaʼerã hese. ¿Mbaʼérepa Jesús ojapo upéva? La Biblia heʼi: “Jesús oiporiahuverekoiterei chupe” (Lucas 7:12-15).