Akakuaa vaʼekue peteĩ siuda héravape Puerto Limón, opytáva este gotyo Costa Rícagui. Che tuakuéra 8 ifamília, ha che anase sietehápe. Péro che túa ou omano che arekópe ocho áño, upévare che sýnte oremongakuaa vaʼekue.

Chemitãite guive chegustaiterei umi depórte, upévare ahuga meme vaʼekue pe béisbol. Che mitãrusúpe aike vaʼekue ahuga peteĩ ekípo ndahaʼéivape profesionál. Arekópe 20 áño peteĩ kasatalénto, térã peteĩ karai ohekáva mitãrusu ivaléva peteĩ depórtepe, cheinvita aha hag̃ua ahuga peteĩ ekípo profesionálpe oĩva Nicaráguape, péro upe tiémpope che sy hasy vai kuri ha che akuida vaʼerã hese, upévare arrechasa pe oférta. Upéi kon el tiémpo ótro kasatalénto cheinvita aike hag̃ua pe ekípo nasionál de béisbolpe oĩva Costa Rícape. Upe ekípope roĩ vaʼekue heta mitãrusu rohuga vaʼekue umi ekípo ndahaʼéivape profesionál. Ha ko vuéltape che aasepta. Aĩ ko ekípope 1949 guive 1952 peve, ha roho rohuga heta partído Cuba, México ha Nicaráguape. Che haʼe vaʼekue defénsor de váse la che ekípope ha chevaleʼi vaʼekue. Peteĩ vuéltape ahuga jepe 17 partído kontinuadoite ha ni una ves ndafallái. Chegustaiterei vaʼekue umi púvliko osapukáivo che réra pe estádiope.

Ambyasýramo jepe, añepyrũ cherekovaieterei. Areko kuri peteĩ che chíka, péro lomímonte asẽmi vaʼerã heta kuñándi. Avei amokõiterei vaʼekue. Peteĩ diápe tuichaiterei akaʼu ha al día sigiénte chekoʼẽntema che rupápe, ni che ndaikuaái mbaʼéichapa ag̃uahẽ raʼe che rógape. Avei chegusta vaʼekue ahuga lotería ha domino plátare.

Upe tiémpope che sýgui oiko testígo de Jehová. Haʼe opredika meme vaʼekue chéve oipotágui añeinteresa avei la Biblia heʼívare. Péro primerorã nahendúi chupe, pórke upérõ depórtente voi areko che akãme. Por ehémplo, apraktika jave ni ndachevareʼái vaʼekue pórke añekonsentraiterei pe huégorente. ¡Chegustaiterei vaʼekue la béisbol!

 Arekópe 29 áño ajegolpea vai vaʼekue ahugahápe, ha upéva káusare ajerretirámante pe béisbol profesionálgui. Péro ndahejaitéi vaʼekue ko depórte. Che róga ypýpe oĩ vaʼekue peteĩ lugár ohugahápe umi ekípo ndahaʼéiva profesionál ha che añepyrũ antrena umi hugadórpe.

Áño 1957-pe aha peteĩ asambléa ojapóvape umi testígo de Jehová peteĩ estádio che ahuga haguépe. Aimévo upépe ahecha mbaʼéichapa idiferénte umi Testígo, pórke che ahugárõ guare umi hénte ojapómi vaʼekue sarambi, péro umi testígo de Jehová katu irrespetuóso ha iñordenádo. Upéva la chemomýi vaʼekue astudia hag̃ua la Biblia hendivekuéra ha aha hag̃ua irreunionkuérape.

Chesorprendeterei heta mbaʼe aaprendéva la Bíbliagui. Por ehémplo, Jesús heʼíma hague voi umi ára pahápe idisipulokuéra opredikataha ko múndo tuichakuére umi notísia porã oñeʼẽva Ñandejára Rréinore (Mateo 24:14). Aaprende avei umi kristiáno tee noganaiha pláta opredika haguére umi héntepe, pórke Jesús heʼi vaʼekue: “Reínte oñemeʼẽ kuri peẽme, ha reínte pemeʼẽ vaʼerã avei” (Mateo 10:8).

Astudiávo la Biblia, añehaʼã ahecha umi Testígopa okumpli la upépe omboʼéva. Ahecharamoiterei mbaʼéichapa oñehaʼã hikuái opredika umi notísia porã opárupi, ha imbaʼeporãiterei avei hikuái Jesús oipota haguéicha. Marcos 10:21-pe Jesús heʼi vaʼekue: “Eju chemoirũ”, ha aleérõ upéva adesidi oikotaha chehegui peteĩ testígo de Jehová.

Primerorã ijetuʼu chéve akambia hag̃ua. Por ehémplo, heta áñore ahugámi káda semána la lotería, ha areko voi la che “número de la suérte”. Péro la Biblia omboʼe Ñandejára nomombaʼeiha umi oadoráva pe “dios de la suértepe” ni umi itaryrýivape (Isaías 65:11, TNM; Colosenses 3:5). Upévare ajedesidi ndahugaveimaha plátare ni lotería. ¡Ha pe sigiénte domingo osẽmi la che número de la suérte pe loteríape! Umi hénte opukapa cherehe upe haguére, ha chejopy hikuái ahuga jey hag̃ua, péro napenái hesekuéra. Upe tiémpo guive ndahugavéiva plátare.

Che aikose kuri Ñandejára oipotaháicha, upévare ajevautisa 1958-pe, peteĩ asambléa ojapóvape umi testígo de Jehová, péro upe diaitépe oñemoĩ a pruéva che fe (Efesios 4:24). Upe asamblearã apyta kuri peteĩ otélpe, ha pe kaʼaru pytũ aha jeývo upépe, ajuhu che chikakue cheraʼarõha hína pe che koty rokẽme. Ha heʼi chéve: “Ejúna javyʼaʼimi Sammy”. Péro che upepete haʼe chupe: “¡No!”, ha aexplika chupe añehaʼãha hína aiko Ñandejára oipotaháicha (1 Corintios 6:18). “¡¿Mbaʼe?!” heʼi chéve haʼe, ha oñepyrũ oñembohory la Biblia heʼívare. Avei oadula cherehe rovolve jey hag̃ua oñondive. Péro che upepete aike che kotýpe ha allavea che rokẽ. Ajevautisa guive ndajapovéiva umi mbaʼe vai yma ajapo vaʼekue, ha avyʼaiterei upe haguére.

Hetaiterei mbaʼe porãma ningo ahupyty asegi rupi umi konsého oĩva la Bíbliape, ha la askrivipárõ umíva ikatúta voi ajapo chugui peteĩ lívro. Koʼág̃a areko heta amígo cherayhúva, isentído la che rekove ha ikatu haʼe avyʼa añeteha.

Koʼag̃aite peve chegusta gueteri la béisbol, péro ndahaʼevéima upéva la iñimportantevéva chéve g̃uarã. Pe depórte rupive chefamóso ha heta agana vaʼekue la pláta, péro koʼã mbaʼe ningo ndodurái. Péro pe amista arekóva Jehovándi ha umi ermanokuérandi arakaʼeve ndopamoʼãi. La Biblia heʼi voi: “Ko múndo ha umi mbaʼe oipotáva, ohasa ohóvo; péro pe ojapóva Ñandejára rembipota opyta opa ára g̃uarã” (1 Juan 2:17). Koʼág̃a ajapo peteĩ mbaʼe chegustavéva: aservi Jehovápe ha aime iñorganisasiónpe.