Che túa oiko vaʼekue Alemániape, ha áño 1949-pe ova Austráliape. Oho upépe ombaʼapo hag̃ua umi mínape ha umi ojeprodusihápe elektrisida. Haʼe oho oiko kampañaháre estádo de Victóriape, ha upépe omenda che sýre. Che anase áño 1953-pe.

Chemichĩme gueteri che sy oñepyrũ ostudia la Biblia umi testígo de Jehovándi, upévare voíre che añepyrũma aaprende la Biblia omboʼéva. Péro che túape ndogustaiete vaʼekue mbaʼeveichagua rrelihión. Haʼe oñepyrũ iviolentoiterei ha che sy okyhyjeterei vaʼekue chugui. Upéicharõ jepe osegi ostudia kañyháme ha omombaʼeterei umi mbaʼe oaprendéva. Ha che túa ndaipóri aja, chemboʼémi chéve ha che ermánape umi mbaʼe oaprendéva. Omombeʼu oréve ko yvýgui oikotaha peteĩ paraíso ha heʼi avei rovyʼataha rojapóramo la Biblia heʼíva (Salmo 37:10, 29; Isaías 48:17).

Arekópe 18 áño adesidi asẽ che rógagui che túa iviolentoiterei haguére. Che aguerovia vaʼekue umi mbaʼe che sy chemboʼe vaʼekue la Bíbliagui, péro namombaʼeguasúi, upévare ndajapói la Biblia heʼíva. Añepyrũ ambaʼapo de elektrisísta peteĩ mína oñeguenohẽhágui karvón. Upéi amenda arekópe 20 áño ha 3 áño haguépe onase che rajy, upépe añepyrũ apensa mbaʼépa añetehápe iñimportanteve vaʼerã chéve g̃uarã. Aikuaa vaʼekue la Biblia ikatuha orepytyvõ ore rogapýpe, upémarõ añepyrũ astudia umi testígo de Jehovándi. Péro che rembirekópe ndogustaiete upéva. Ha ahárõ guare peteĩ rreunionhápe, heʼi porã chéve adesidi vaʼerãha apytátapa hendivekuéra térãpa asegíta astudia la Biblia ha aha ógagui. Ndaikuaáimarõ mbaʼépa ajapóta, ahendu chupe ha ndarresivivéi umi Testígope. Kon el tiémpo ambyasy ndajapói hague la aikuaáva oĩ porãha.

Peteĩ vuéltape che kompañerokuéra de traváho oñepyrũ ohechauka chéve pornografía. Chegustaiterei ha chembojeguaru vaʼekue avei, ha añeñandu vaietereími ahecha rire. Chemanduʼa vaʼekue umi mbaʼe aaprendévare la Bíbliagui ha aĩ vaʼekue segúro Ñandejára chekastigataha. Péro amáske pyʼỹi ahecha umi mbaʼe tieʼỹ akambia apensa lája ha añepyrũma añenvisiaite hese.

Amasdía añemomombyryve vaʼekue ahávo umi mbaʼe porã che sy chemboʼe vaʼekuégui, ha 20 áñore aiko upéicha. Umi mbaʼe ajapóvare ojekuaa mbaʼépa areko che akãme. Chejurukyʼa vaʼekue ha  chíste tieʼỹnte voi amombeʼu. Añepyrũ apensa umi rrelasión sexuál oĩha jajediverti hag̃uánte, ha aikóramo jepe che rembirekóndi, heta vése añeno avei ótro kuñándi. Peteĩ vuéltape amaña pe espéhope ha haʼe: “Ndachaʼéi nderehe”. Namombaʼevéi vaʼekue che rekove ha ajeguaru voi chejehegui.

Upéi che rembireko ha che rojedivorsia, ha ahechakuaa desastreteha la che rekove. Añemboʼe Jehovápe che pyʼaite guive ha adesidi astudia jeytaha la Biblia, ohasámarõ jepe 20 áño ndastudiavéi hague. Upe tiémpope che túa omanóma kuri ha che sýgui oikóma testígo de Jehová.

Apensávo la aiko lájare ha umi mbaʼe la Biblia heʼívare, ahechakuaa vaʼekue tuichaiterei akambia vaʼerãha. Péro Ñandejára opromete umi ojapóva haʼe oipotáva ipyʼaguapytaha, ha che ajedesidíma ajapotaha upéva. Ajedesidi ndaikomoʼãveimaha chejurukyʼa ni aporotrata vai. Yma cherekovai, chehugadór ha chekaʼu vaʼekue, ha amonda avei pe emprésa ambaʼapohápe, péro adesidi avei ahejapaitetaha koʼã mbaʼe vai.

Che kompañerokuéra de traváho nontendéi vaʼekue mbaʼérepa adesidi akambia. Ha 3 áño aja, manterei chemboligámi ajapo jey hag̃ua umi mbaʼe vai aheja vaʼekue. Michĩmi jepe ajavy jeýrõ, tahaʼe chepochyetereírõ térã osérõ chehegui peteĩ ñeʼẽ kyʼa, haʼekuéra ovyʼámi ha osapukaijoa: “¡Eh! Oumi jey ñanendive Joe yma guare”. Hasyetereími chéve heʼi jave péicha hikuái. Añandu voi ndavaleiha mbaʼeverã.

Che travahohápe henyhẽte vaʼekue la pornografía, tahaʼe komputadórape térã kuatiápe. Che kompañerokuéra de traváho ojepokuaa vaʼekue ombohasa ojupe komputadórape umi taʼanga tieʼỹ, ha ymave che ajapo vaʼekue avei upéva. Che añehaʼãmbaite anive hag̃ua haʼa pe mbaʼe vaípe, péro haʼete voi oimeháicha chereityse jeýva hikuái. Upémarõ añemongeta pe Testígo chembostudiávandi la Biblia ikatu hag̃uáicha chepytyvõ ha chemokyreʼỹ. Haʼe ipasiénsia cherehe ha cherendu porãnte. Oipuru unos kuánto versíkulo oĩva la Bíbliape ohechauka hag̃ua chéve mbaʼépa ikatu ajapo anive hag̃ua haʼa pe mbaʼe vaípe, ha chemokyreʼỹ añemboʼe meme hag̃ua Jehovápe chepytyvõ hag̃ua (Salmo 119:37).

Che kompañerokuéra de traváho apytépe oĩ vaʼekue mokõi alkoóliko. Upévare peteĩ vuéltape ajerure oñembyatypa hag̃ua hikuái kompletoite ha omeʼẽ hag̃ua servésa umi mokõime. Haʼekuéra ipochy ha osapukaijoa: “¡Mbaʼéicha piko péicha rejapóta! Haʼekuérango oñehaʼã hína osẽ hag̃ua pe vísiogui”. Che haʼe chupekuéra: “Ha che upéicha avei”. Upe guive haʼekuéra ohechakuaa che añehaʼã hague hína anivéma hag̃ua ahecha pornografía, ha ndoikovéima chemboliga aiko jey hag̃ua yma guaréicha.

Jehová tuichaiterei chepytyvõ, ha upéva rupive kon el tiémpo aheja pe vísio vai areko vaʼekue. Áño 1999-pe ajevautisa ha oiko chehegui testígo de Jehová. Aagradeseterei oñemeʼẽ haguére chéve oportunida amyatyrõ hag̃ua che rekove ha avyʼa hag̃ua.

Koʼág̃a antende porã mbaʼérepa Jehová ndochaʼeiete voi umi mbaʼe chéve chegusta vaʼekuére heta tiémpore. Haʼe cherayhu itaʼýraicha, upévare ndoipotái vaʼekue ahecha pornografía, oikuaágui cheperhudikataha. Añetehápe siertoite voi la heʼíva Proverbios 3:5, 6: “Ejerovia Ñandejárare nde pyʼaite guive ha ani ndejehe añónte. Eikuaáke haʼe oĩha opárupi, ha haʼe omyesakãtaha ndéve nde rape”. Umi léi oĩva la Bíbliape tuicha cheprotehe, ha ndahaʼéi voi upévante, síno chepytyvõ avei asẽ porã hag̃ua (Salmo 1:1-3).

Yma ajeguaru vaʼekue chejehegui, péro koʼág̃a amombaʼe che rekove ha chepyʼaguapy. Cherekopotĩ ha añandu Jehová cheperdonamaha ha chepytyvõha. Áño 2000-pe amenda peteĩ ermána héravare Karolin, haʼe iporãiterei ha ohayhu avei Jehovápe chéicha. Ore rogapýpe roiko porãiterei. Rovyʼaiterei roime haguére peteĩ organisasión ipotĩvape ha enterove ojoayhuhápe oñoermánoicha.