Che anase vaʼekue áño 1960-pe. Che sy oreko vaʼekue upérõ 17 áño ha che túa oheja rei chupe che anase mboyve. Ore roiko vaʼekue che avuelokuérandi peteĩ siuda michĩvape hérava Burg, opytáva pe yma oĩ haguépe República Democrática de Alemania (térã Alemania Oriental). Heta hénte upepegua ndogueroviái vaʼekue Ñandejára oexistiha, ha ore famíliape upéichante avei. Ñandejára ndahaʼéi vaʼekue mbaʼeve oréve g̃uarã.

Che avuélo oñangareko porãiterei vaʼekue cherehe. Haʼe onkargámi chéve heta tembiapo añentretene hag̃ua, por ehémplo, ojerurémi chéve ajupi hag̃ua umi yvyramátare ahakãʼo hag̃ua. Chemitãme umívantema la igústo vaʼekue chéve. Avyʼa ha ndajepyʼapýi vaʼekue mbaʼevére.

Arekópe 7 áño oiko kuri cherehe peteĩ mbaʼe ivaietereíva, upérõ aike ramoite kuri segundo grádope. Ahakuévo ógape ajupi peteĩ tórre de álta tensiónre. Ha aimévo pe 8 metrohápe, okorre mbareteterei cherehe elektrisida ha chereja inkonsiénte. Apáyvo aĩma peteĩ ospitálpe, ha nañanduvéima che jyva. Ojegolpeapa ha okái vaieterei, upévare oñeamputámante chehegui ani hag̃ua umi erída arekóva oenvenenapa che ruguy. Oime vaʼerã peñeimahináma voi mbaʼeichaitépa opyta vai kuri che sy ha che avuelokuéra. Che upérõ chemitãiterei gueteri, ha nantendepái vaʼekue mbaʼépepa cheafektáta apyta hague jyvaʼỹre.

Asẽ rire ospitálgui, aha jey eskuélape. Umi mitã oñembohory cherehe, chemyaña ha chejapi oimeraẽ mbaʼépe pórke che ndaikatúi añedefende. Haʼekuéra cheapoʼi ha heʼi chéve heta mbaʼe chemoñeñandu vaietereíva. Upéi aha peteĩ eskuéla opytávape pe siuda héravape Birkenwerder. Upe eskuéla haʼete peteĩ internádo ohohápe umi mitã orekóva diskapasida. Pe eskuéla opyta vaʼekue mombyry pe lugár che aiko haguégui, upévare che sy ha che avuelokuéra ndaikatúi chevisita. Ha vakasiónpemante ahecha chupekuéra. Upe tiémpo guive ahasa 10 áño che sy ha che avuelokueraʼỹre.

Aaprende pyahupaite ajapo hag̃ua heta mbaʼe che pýpe. ¿Reñeimahinápa rejokórõ peteĩ tenedór térã peteĩ kuchára ne pysãme ekaru hag̃ua? Che aheka chupe ládo ha aaprende ajapo hag̃ua upéva. Aaprende avei ajevale che pýre ajesepilla ha añakãkarãi hag̃ua. Ha hésto jepe añepyrũ ajapo che pýpe añeʼẽ jave la  héntendi. Añetehápe che py ideprovécho chéve haʼerõguáicha che po.

Chemitãrusuvépe añepyrũ alee siénsia fiksión, ha chegustaiterei upéva. Añeimahinámi voi arekórõ peteĩ jyva imodernoitereíva orekoháicha umi rrovót, ikatúva aipuru ajapo hag̃ua oimeraẽ mbaʼe. Arekópe 14 áño añepyrũ apita. Haʼetévaicha chéve péicha ajeroviavéva chejehe ha añandu nachediferenteiha umi ótrogui. Apensámi: “Che ikatu avei apita. Umi opitáva ohechauka ikariaʼymaha, ha noimportái ijyvápa térã nahániri”.

Añehaʼã ajapo heta mbaʼe ajeheʼa meme hag̃ua umi héntere. Aike pe grúpo sosialísta héravape Juventud Libre Alemana. Pe goviérno oapoja ko grúpo, ha che aime pype kómo sekretário, ha umi hénte omombaʼeterei upe puésto. Aike avei peteĩ club de músikape, aha umi rreunión ojeleehápe poesía ha ajapo umi depórte ojepreparáva umi orekóvape g̃uarã diskapasida. Upéi añepyrũ aha peteĩ emprésape aaprende hag̃ua pe traváho ojejapóva upépe, ha un tiémpo haguépe chekontrata hikuái. Akakuaavévo ahávo, añepyrũ aipuru meme peteĩ prótesis ani hag̃ua apensaiterei ofaltaha chéve che jyva.

Peteĩ vuéltape oñemboja che rendápe peteĩ karai, ahaʼarõ aja pe tren aha hag̃ua che travahohápe. Haʼe oporandu chéve agueroviánepa Ñandejára ikatuha omeʼẽ jey chéve che jyva, ha chedeskolokaite upéva. Aipota jey vaʼekue añete la che jyva, péro naisentidoiete voi chéve la heʼíva ha apensa ni mbaʼevéicharõ ndaikatumoʼãiha oiko upéva. Upe tiémpope che aime vaʼekue segúro Ñandejára ndoexistiriha. Ha upe día guive añehaʼãmbaite anive hag̃ua ajotopa pe karaíndi.

Tiémpo rire peteĩ che kompañéra de traváho cheinvita avisita hag̃ua ifamíliape. Ha roʼu aja kafe ituakuéra oñepyrũ oñeʼẽ Ñandejárare, ha ohenói chupe Jehová. Upérõ primera ves ahendu Ñandejára heraha avei (Salmo 83:18). Péro apensa: “Tombohéra hikuái omboheraseháicha, péro che aikuaa porã Ñandejára ndoexistiriha voínte. Ha ahechaukáta chupekuéra ojavyha”. Che aime vaʼekue segúro la apensávare, upémarõ ropyta roñemongetataha jepi la Bíbliare. Péro añesorprende apillávo ndaikatuiha ahechauka chupekuéra Ñandejára ndoexistiriha.

Aanalisávo umi profesía oĩva la Bíbliape, mbeguekatúpe akambia ahávo ha napensavéima Ñandejára ndoexistiriha. Hetaiterei mbaʼe Ñandejára heʼi vaʼekue oikotaha oñekumpli, ojeskrivíramo jepe hetaiterei tiémpo oiko mboyve. Peteĩ vuéltape, romaña umi profesía oĩvare Mateo kapítulo 24, Lucas kapítulo 21 ha 2 Timoteo kapítulo 3-pe, ha rokompara umi mbaʼe oikóvare ñane tiémpope. Peteĩ doktór ningo omañambaite umi síntoma orekóvare ipasiénte opilla hag̃ua mbaʼe mbaʼasýpa oreko. Péicha avei umi mbaʼe oikóva ko múndope chepytyvõ apilla hag̃ua ñaimemaha “umi ára pahápe”, heʼiháicha la Biblia. * Apyta chejurujái ahechávo hesakuaitépe oñekumpliha hína koʼã profesía.

Che aime vaʼekue segúro añeteha umi mbaʼe aaprendéva hína. Añepyrũ añemboʼe Ñandejára Jehovápe ha apoi la sigarríllogui, apitáramo jepe tódo el día  mas de 10 áñore. Asegi astudia la Biblia un áñorupi, ha upéi ajevautisa peteĩ vañérape el 27 de abril de 1986. Rojapo upéva kañyháme pórke upérõ pe goviérno oproivi kuri umi Testígo rembiapo Alemania Orientálpe.

Pe goviérno káusare, ore roñembyatými grupoʼi mimímente óga partikulárpe, ha unos kuánto Testígopente che aikuaa. Péro peteĩ vuéltape, ahaʼarõʼỹetére, umi autorida oheja chéve aviaha Alemania Occidentálpe, ha upépe ndojeproivíri umi Testígo rembiapo. Primera ves ikatu kuri aha umi aty guasuhápe ha ahecha hetaiterei ermánope. Arakaʼeve ndacheresaraimoʼãi upévagui.

Hoʼa rire pe múro de Berlín, pe goviérno opermiti sapyʼa umi Testígope opredika ha oñerreuni pe país che aikohápe. Hasypeve ikatu roadora trankílo Ñandejára Jehovápe. Che adesidi apredikavetaha, péro akyhyje avei añemongeta hag̃ua umi extráñondi. Che añandu vaʼekue ndavaleiha umi ótro rovake, pórke ndachejyvái ha avei akakuaa peteĩ internádo oikohápe umi orekóva diskapasida. Péro lomímonte áño 1992-pe atantea apredika 60 óra un méspe. Oho porã chéve ha ahasa porãiterei, upévare adesidi ajapotaha upéva káda mes. Ha 3 áñore asegi ajapo upéicha.

Siémpre chemanduʼa ko fráse oĩvare la Bíbliape: “Añeñandu vai oĩ jave ikangýva” (2 Corintios 11:29). Ndachejyváiramo jepe, areko gueteri che akã ha ikatu avei añemongeta che rapichakuérandi, upévare ajapopaite ikatumíva aipytyvõ hag̃ua chupekuéra. Che ikatu antende porã umi hénte orekóvape avei diskapasida. Aikuaa porã mbaʼéichapa ñañeñandu jajaposeterei jave peteĩ mbaʼe péro ndaikatúi, ha upévare añehaʼãmbaite amokyreʼỹ umi oñeñandúvape upéicha. Avyʼaiterei ikatu haguére ajapo koʼã mbaʼe che rapichakuéra rehehápe.

Nanegamoʼãi sapyʼánte añeñandu vai lentoha. Hiʼãnte chéve areko avei la che jyva. Oĩ heta mbaʼe ikatúva ajapo cheaño, péro cheforsaiteve ha orahaiteve chehegui tiémpo umi ótro héntegui. Káda día apensa ko frásere: “Opa mbaʼerã chembarete Ñandejára omeʼẽgui chéve podér” (Filipenses 4:13). Jehová chemombarete káda día ajapo hag̃ua oimeraẽ mbaʼe. Ahechakuaa haʼe núnka ndofallaiha chendive, ha che ndafallaséi avei hendive.

Che aikotevẽterei vaʼekue che famíliare chemitãʼírõ guare ha avei chekariaʼývo ahávo. Péro upéi Jehová tuichaiterei chevendesi ha omeʼẽ chéve che familiarã. Che rembireko Elke tuichaiterei chepytyvõ, haʼe cherayhu ha imbaʼerechakuaa. Hiʼarive ko múndope oĩ hetaiterei testígo de Jehová, ha kompletoite haʼekuéra che ermáno. Haʼekuéra ningo hína che família.

Tuichaiterei chembopyʼaguapy umi mbaʼe Ñandejára oprometéva. Haʼe heʼi ojapotaha ko yvýgui peteĩ paraíso ha ombopyahupataha opa mbaʼe, umíva apytépe che jyva (Apocalipsis 21:5). Che antende porãve umi mbaʼe Ñandejára oprometéva apensávo umi mbaʼe Jesús ojapo vaʼekuére oĩ aja ko yvy ape ári. Haʼe omonguera vaʼekue peteĩ tesapirĩme umi orekóvape diskapasida, ha peteĩ vuéltape omonguera voi peteĩ kuimbaʼépe oñeikytĩva chugui inambi (Mateo 12:13; Lucas 22:50, 51). Umi mbaʼe Jehová oprometéva ha umi milágro Jesús ojapo vaʼekue oasegura chéve koʼẽrõitéma areko jeytaha che jyva.

Chéve g̃uarã ningo tuichaiterei vendisión aikuaa Ñandejára Jehovápe, ndaipóri ótra kósa iporãvéva. Haʼéngo che Túa ha che amígo, chekonsoláva ha chemombaretéva. Añeñandu rréi David oñeñandu haguéicha, haʼe heʼi vaʼekue: “Ñandejára upe chemombaretéva [...]. Avyʼa chepytyvõ haguére, chupe aropurahéita” (Salmo 28:7). Siertoiténgo la heʼíva ko téxto ha iporãiterei, ha arakaʼeve ndacheresaraimoʼãi chugui. Añakarama hatã hese ndachejyváiramo jepe.