Hetaiterei hénte oguerovia navidápe ojefestehaha Jesucristo kumpleáño. Péro, ¿ndépa reñeporandúva umi Jesús apóstol ha idisipulokuérapa ofesteha vaʼekue pe Navidad? ¿Reñeporandúvapa avei mbaʼépa heʼi la Biblia umi kumpleáñore? Ñambohováiramo koʼã porandu ikatúta jaikuaa iporãpa kristianokuéra ofesteha Navidad.

Primero, la Biblia nomombeʼúi oĩ hague Ñandejára siérvo ofesteha vaʼekue ikumpleáño ni Jesús kumpleáño. La Biblia oñeʼẽ sólamente mokõi persóna ofesteha vaʼekuére ikumpleáño, ha mokõivéva ndahaʼéi vaʼekue Ñandejára Jehová siérvo. Hiʼarive, umi mokõi kumpleáñope oiko vaʼekue álgo ivaíva (Génesis 40:20; Marcos 6:21). Pe Encyclopædia Britannica heʼi umi kristiáno ypykue ndofestehaséi hague “umi kumpleáño oúgui rrelihión japúgui”.

La Biblia nomombeʼúi mbaʼe féchapepa onase vaʼekue Jesús. Pe Diccionario de historia de la Iglesia heʼi: “Ndaipóri ni peteĩ pruéva iñimportánteva ohechaukáva mbaʼe mes ni mbaʼe díapa onase vaʼekue Cristo”. Péro Jesús oipotárire idisipulokuéra ofesteha ikumpleáño katuete ojapóta kuri tekotevẽva guive ojekuaa hag̃ua pe fécha.

Segundo, la Biblia ndeʼíri Jesús ni idisipulokuéra ofesteha hague pe Navidad. Pe New Catholic Encyclopedia heʼi primera ves oñeñeʼẽ hague pe navidáre pe Cronógrafo de Filócalope, péva haʼe peteĩ kalendário romano ojejapo vaʼekue áño 336-pe. Ha upérõ ojapóma heta tiémpo oñetermina hague la Biblia ha avei heta tiémpoma Jesús ou hague ko yvy ape ári. Upévare pe Cyclopedia de McClintock ha Strong heʼi Ñandejára nomandái hague ojefesteha hag̃ua pe Navidad, ha pe Nuevo Testaméntope ndeʼíri avei ojejapo vaʼerãha upéva. *

Jesús, pe Mboʼehára Guasu, heʼipaite vaʼekue idisipulokuérape mbaʼe mbaʼépa oipota ojapo hikuái, ha kompléto umi mbaʼe oĩmbaite la Bíbliape. Haʼe arakaʼeve ndeʼíri vaʼekue chupekuéra ofesteha hag̃ua pe Navidad. Peteĩ profesór ningo oipotáta iñalumnokuéra ojapo sólamente umi mbaʼe haʼe heʼíva chupekuéra ojapo hag̃ua, upéicha avei Jesús oipota idisipulokuéra ojapo sólamente “umi mbaʼe ojehaíva Ñandejára Ñeʼẽme” (1 Corintios 4:6).

Péro oĩ peteĩ mbaʼe iñimportantetereíva umi kristiáno ypykue siémpre ogueromanduʼa vaʼekue. Upéva haʼe pe Jesús omano hague ára. Haʼe voi heʼi vaʼekue chupekuéra mbaʼéichapa ha arakaʼépa ojapo vaʼerã upéva. La Bíbliape jatopa umi instruksión Jesús omeʼẽ vaʼekue ha mbaʼe féchapepa haʼe omano vaʼekue (Lucas 22:19; 1 Corintios 11:25).

Jahechaháicha, pe navidápe ojefesteha peteĩ kumpleáño ha umi kristiáno ypykue ndojapói vaʼekue upéva haʼégui peteĩ kostúmbre oúva umi rrelihión japúgui. Hiʼarive la Biblia ndeʼíri oĩ hague ofesteháva pe Navidad, ni Jesús ndojapói vaʼekue upéva. Opa koʼã mbaʼére, oĩ hetaiterei kristiáno ndofesteháiva pe Navidad.