1. ¿Mbaʼéichapa siémpre ombaʼapo Jehová ha isiervokuéra?

JEHOVÁ okrea vaʼekue Jesúspe raẽvete, ha upéi ombaʼapo hikuái oñondive ojapo hag̃ua opaite mbaʼe. Jesús ombaʼapo Itúandi “peteĩ travahadór ikatupyrývaicha” (Prov. 8:30, NM). Upeichaite avei Ñandejára siervokuéra, siémpre ombaʼapo peteĩ ñeʼẽme ojapo hag̃ua umi tembiapo Ñandejára onkarga vaʼekue chupekuéra. Por ehémplo, Noé ha ifamília ombaʼapo oñondive ojapo hag̃ua pe árka. Heta áño upe rire, umi isrraelíta ombaʼapo avei oñondivepa ojapo hag̃ua pe tavernákulo. Ha oviaháta jave hikuái ótro lugárpe, oñopytyvõmba ikatu hag̃uáicha odesarma pe tavernákulo, oraha ha upéi oarma jey hag̃ua. Avei pe témplope, haʼekuéra opurahéi oñondivepa ha ombopu músika ombotuicha hag̃ua Jehovápe. Jahechaháicha, Ñandejára siervokuéra ojapo koʼã mbaʼe oĩ rupi unído ha ombaʼapo rupi oñondivepa (Gén. 6:14-16, 22; Núm. 4:4-32; 1 Crón. 25:1-8).

2. a) ¿Mbaʼéichapa ombaʼapo vaʼekue umi kristiáno síglo primero guare? b) ¿Mbaʼépa jahecháta ko artíkulope?

² Umi kristiáno ypykue siémpre ombaʼapo avei oñondivepa. Apóstol Pablo heʼi vaʼekue káda kristiáno idiferenteha  ha ikatupyryha peteĩ mbaʼépe, ha káda únope oñenkargaha “diferénte tembiapo”. Péro amo ipahápe entéro oĩ unído pórke osegi Jesucristo ehémplo. Pablo okompara pe kongregasión peteĩ kuérpore orekóva diferénte párte, péro ombaʼapo porãmbáva oñondivepa (elee 1 Corintios 12:4-6, 12). Jahechamína mbaʼéichapa ikatu ñaime unído ha ñambaʼapo oñondivepa: 1) ñamombeʼúvo pe marandu porã, 2) kongregasiónpe, ha 3) ñande rogapýpe.

3. ¿Mbaʼépa ohecha vaʼekue Juan peteĩ visiónpe?

³ Peteĩ jey, Jehová ohechauka apóstol Juánpe peteĩ visión rupive 7 ánhel ombopúva trompéta. Pe quinto ánhel ombopu rire itrompéta, Juan ohecha “peteĩ estrélla” hoʼáva yvágagui ko yvy ape ári. Ko estrélla oipuru peteĩ lláve oavri hag̃ua “pe yvykua pypuku”. Upéi pe yvykuágui oñepyrũ ojupi tuicha tatatĩ. Ha pe tatatĩgui osẽ hetaiterei tuku. Péro koʼã tuku ndoʼúi umi yvyramáta rogue ni umi plánta, síno oataka umi persóna ndoguerekóivape “Ñandejára séllo isyváre” (Apoc. 9:1-4). Juan oikuaa porã umi tuku ikatuha oporoperhudika vai, oiko haguéicha Egíptope Moisés tiémpope (Éx. 10:12-15). Umi tuku Juan ohecháva orrepresenta umi kristiáno unhídope, opredikáva oikóvo entéro rrelihión fálsa oñehunditaha. Chupekuéra omoirũ heta kristiáno orekóva esperánsa oikove hag̃ua ko yvy ape ári pára siémpre. Enterovéva ombaʼapo oñondivepa ikatu hag̃uáicha oipytyvõ umi héntepe ojei hag̃ua Satanás poguýgui ha umi rrelihión japúgui.

4. a) ¿Mbaʼe tembiapópa Jehová omeʼẽ ñandéve? b) ¿Mbaʼépa jajapo vaʼerã ñakumpli porãséramo pe tembiapo Jehová oenkargáva ñandéve?

⁴ Jehová omeʼẽ ñandéve peteĩ tembiapo iñimportantetereíva. ¿Mbaʼépa hína upéva? Ñamombeʼu vaʼerã ko múndo tuichakuére umi “marandu porã” oñeʼẽva Ñandejára Rréinore ou mboyve pe fin (Mat. 24:14; 28:19, 20). Avei ñainvita vaʼerã umi ijuhéivape hoʼu hag̃ua ‘pe y oporomoingovéva’. Upéva heʼise ñamboʼe vaʼerãha la Biblia umi hénte oikuaasévape Ñandejárape (Apoc. 22:17). Péro ñakumpli porãséramo ko tembiapo Jehová oenkargáva ñandéve, ñaime vaʼerã unído ha ñambaʼapo peteĩ ñeʼẽme kongregasiónpe (Efes. 4:16).

5, 6. ¿Mbaʼe mbaʼépa ojapo Jehová puévlo oñondivepa?

⁵ Ikatu hag̃uáicha japredika heta hetave persónape tekotevẽ ñañeorganisa porã. Upearã tuicha ñanepytyvõ umi instruksión jarresivíva kongregasión rupive, por ehémplo umi rreunión ojejapóva ñasẽ mboyve japredika. Koʼã instruksión rupive ikatu japredika pe marandu porã oparupiete ko yvy ape ári. Avei ñandeprepara ñaikuaveʼẽ hag̃ua hetaiterei puvlikasión oñeguenohẽva la Bíbliagui. Sapyʼánte ojejerure avei ñandéve japartisipa hag̃ua umi kampáña espesiálpe. Péicha jave jagueraha hína el mísmo mensáhe ñane ermanokuérandi oparupiete ko yvy ape ári. Avei ñambaʼapo umi ánhel ndive, pórke haʼekuéra ñanepytyvõ japredika hag̃ua (Apoc. 14:6).

⁶ Javyʼaiterei ningo káda áño jalee jave Anuáriope umi mbaʼe porã ojehupytýva oparupiete predikasiónpe. Umi asambléa tres diagua ñanepytyvõ avei ñaime hag̃ua unído. ¿Mbaʼérepa? Pórke umi asambléa mboyve, entéronte ñasẽ ñainvita umi héntepe. Ha pe asambléa aja katu enterovéva ñahendu la mísma informasión. Umi diskúrso, demostrasión ha dráma ñanemokyreʼỹ jaservi hag̃ua Jehovápe ñande pyʼaite guive. Ambue mbaʼe ñanepytyvõva avei ñaime hag̃ua unído, haʼe hína pe Konmemorasión. Unas kuánta semána  upe mboyve, entéronte jaha ñainvita umi héntepe ko rreunión iñimportantetévape g̃uarã. Upéi entéro Testígo ñañembyaty jagueromanduʼa hag̃ua ko akontesimiénto el mísmo día, el 14 de nisán, oike rire kuarahy (1 Cor. 11:23-26). Péicha ñakumpli Jesús mandáto ha jahechauka Jehovápe jaagradeseha chupe pe ojapo vaʼekuére ñanderehehápe.

7. ¿Mbaʼépa jahupyty ñambaʼapo rupi oñondivepa?

⁷ Peteĩ tuku ningo ndaikatúi ojapo mbaʼeve guasu haʼeñónte, péro hetáramo hikuái katuete ojekuaa hapykuere. Péicha avei, ñande ñaneañónte ndaikatumoʼãi japredika ko yvy tuichakuére. Péro ojapoháicha umi tuku, entéro ñañomoirũ ñambaʼapo hag̃ua. Upéicha rupi ñañeʼẽ Jehováre hetaiterei persónape, ha ñaipytyvõ chupekuéra ikatu hag̃uáicha omombaʼeguasu avei chupe.

8, 9. a) ¿Mbaʼe ehémplopa oipuru Pablo oexplika hag̃ua iñimportanteha pe unida kongregasiónpe? b) ¿Mbaʼépa jajapo vaʼerã oĩ hag̃ua unida kongregasiónpe?

⁸ Pablo oexplika vaʼekue umi kristiáno Efesoguápe mbaʼéichapa oĩ organisádo peteĩ kongregasión, ha omeʼẽ chupekuéra ko konsého: “Jakakuaapa [vaʼerã] opa mbaʼépe” (elee Efesios 4:15, 16). Pe apóstol oipuru ehémploramo pe kuérpo umáno, omyesakã hag̃ua entéro kristiáno ikatuha ñaipytyvõ oĩ hag̃ua unida kongregasiónpe ha jasegi hag̃ua Jesúspe, haʼéva hína pe akã. Pablo heʼi peteĩ kuérpope entéro umi párte “ojoaju ha ombaʼapo [porãha] oñondive oñekotevẽháicha”. Upéicharõ, entéro ñaiméva kongregasiónpe, tahaʼe imitãva ha ijedáva, hesãiva ha hasykatúva, ñaipytyvõ vaʼerã oĩ hag̃ua unida kongregasiónpe. ¿Mbaʼéichapa ikatu jajapo upéva?

⁹ Jesús onombra umi ansiánope odirihi hag̃ua pe kongregasión. Haʼe oipota jarrespeta chupekuéra ha jasegi umi instruksión omeʼẽva ñandéve (Heb. 13:7, 17). Ha upéva ningo sapyʼánte hasy ñakumpli porã hag̃ua. Péro jajeruréramo Jehovápe tañanepytyvõ, haʼe omeʼẽta ñandéve ijespíritu sánto ikatu hag̃uáicha ñaneñeʼẽrendu chupekuéra. Ñaneumílderamo ha ñambaʼapo meme umi ansiánondi, ñandedeprovechoitereíta kongregasiónpe. Upéicha entéronte ñaiméta unído ha koʼẽ koʼẽre jajoayhuvéta.

10. ¿Mbaʼe mbaʼépa ojapo umi siérvo ministeriál oĩ hag̃ua unida kongregasiónpe? (Ehecha pe taʼanga oĩva iñepyrũme.)

¹⁰ Umi siérvo ministeriál oipytyvõ avei oĩ hag̃ua unida kongregasiónpe. Haʼekuéra oajuda umi ansiánope ha oagradese umi tembiapo oñemeʼẽvare chupekuéra. Por ehémplo, oñenkarga ani hag̃ua ofalta puvlikasión jaipurútava japredika hag̃ua. Avei orresivi porã umi persóna ou ramóvape rreunionhápe, ha ombaʼapo ojejapo jave limpiésa ha mantenimiénto Salónpe. Ñambaʼapóramo umi siérvo ministeriál ndive, ñaipytyvõ hína oĩ hag̃ua unida kongregasiónpe ha jaservi hag̃ua Jehovápe peteĩ ñeʼẽme (embojoja Hechos 6:3-6 rehe).

11. ¿Mbaʼéichapa umi ermáno imitãva ikatu oipytyvõ oĩ hag̃ua unida kongregasiónpe?

¹¹ Oĩ ansiáno heta áñorema ombaʼapo jejopýva kongregasiónpe. Péro sapyʼánte haʼekuéra ndaikatuvéima ojapo heta mbaʼe yma guaréicha, pórke ijedáma ohóvo. Upéicha jave umi ermáno imitãva ikatu oipytyvõ chupekuéra. ¿Mbaʼépa ojapo vaʼerã umi ansiáno ijedáva? Iporãta ombokatupyrýramo umi mitãrusúpe. Péicha haʼekuéra oĩta preparádo oñemeʼẽve hag̃ua chupekuéra rresponsavilida. Ha umi siérvo ministeriál katu oñehaʼã vaʼerã oiko hag̃ua avei chuguikuéra ansiáno (1 Tim. 3:1, 10). Oĩ ansiáno imitãva ha oprogresa porãva  ohóvo, péicha rupi oikóma chuguikuéra superintendénte de sirkuíto ha oipytyvõ hína heta ermáno oĩvape diferénte kongregasiónpe. ¡Ajépa javyʼaite oĩ haguére heta ermáno imitãva oĩva dispuésto oipytyvõ hag̃ua ermanokuérape! (Elee Salmo 110:3 ha Eclesiastés 12:1.)

12, 13. ¿Mbaʼépa ikatu jajapo ñaime hag̃ua unído ñande rogapýpe?

¹² ¿Mbaʼépa ikatu jajapo jaiko hag̃ua peteĩ ñeʼẽme ñande rogapýpe? Tekotevẽ káda semána jajapo pe estúdio de família. Tuvakuéra odedikáramo tiémpo omboʼe hag̃ua Jehovágui ifamíliape, koʼẽ koʼẽre ojoayhuvéta hikuái. Por ehémplo, ikatu oñensaja oñondive predikasionrã. Péicha entéro oikuaátama mbaʼépa heʼíta umi héntepe. Añetehápe ningo ñane família kompletoite oĩve unído ñahendúramo ñane hénte oñeʼẽha Jehováre, ha jahechakuaárõ mbaʼeichaitépa ohayhu chupe hikuái.

¹³ Jehová oipota umi ména ha tembireko oñopytyvõ ha oĩ unído. Mokõivéva ohayhúramo Jehovápe ha oñondive oservíramo chupe, imatrimónio imbaretevéta ha ovyʼavéta hikuái. Iñimportánte avei mokõivéva ojoayhu ha ojotrata porã, ojapo haguéicha Abrahán ha Sara, Isaac ha Rebeca, ha Elqaná ha Ana (Gén. 26:8; 1 Sam. 1:5, 8; 1 Ped. 3:5, 6). Ména ha tembireko osegíramo koʼã ehémplo porãite, oĩta unído ha siémpre oikóta Jehová amígoramo (elee Eclesiastés 4:12).

14. ¿Mbaʼépa jajapo vaʼerã ñamombarete hag̃ua ñane matrimónio, ñane ména térã ñane rembireko ndahaʼéiramo jepe Testígo?

¹⁴ La Biblia heʼi porã ndovaleiha ñamenda peteĩ persóna ndoservírivare Jehovápe (2 Cor. 6:14). Upéicharõ jepe oĩ heta kristiáno iména térã hembireko ndahaʼéiva Testígo. Heta vése, koʼãichagua ermáno ha ermána omenda riréma oiko chugui Testígo, ha la iména térã hembireko ndostudiái la Biblia. Térã ikatu avei omenda raʼe peteĩ Testígore, péro upéi hembiayhu ou oñemomombyry Jehovágui. Oiméramo jajecha ko situasiónpe, jasegi vaʼerã jajapo la Biblia heʼíva ijetuʼúramo jepe ñandéve. Péichamante ñane matrimónio imbaretéta. Jahechamína peteĩ ermána hérava Mary ehémplo. Haʼe ha iména hérava David oservi vaʼekue Jehovápe oñondive. Upéinte iména ndohovéi rreunionhápe. Upéicharõ jepe, Mary siémpre okumpli la Biblia heʼíva, osegi ohekomboʼe umi 6 imembýpe Jehová rapére, ha ndofaltái rreunionhápe ni asambleahápe. Kon el tiémpo, ifamiliakuéra tuichapa ha ohopáma hógagui. Upépe katu ijetuʼuvéntema Márype oservi hag̃ua haʼeño Jehovápe, péro osegi iñeʼẽrendu. Sapyʼánte haʼe oheja rrevísta hógarupi, ikatu hag̃uáicha iména ohecha umíva. Peteĩ díape iména oñepyrũ olee umi rrevísta, ha tiémpo riremínte oho mimi jeýma rreunionhápe. Haʼekuéra oreko peteĩ iniéto de 6 áño siémpre orreserváva ijavuélope iñasientorã. Ha haʼe ndohói jave rreunionhápe, pe mitãʼi heʼími chupe: “Avuélo, ¿mbaʼéreiko nderehói raʼe rreunionhápe?”. Ohasa rire 25 áño, David oñepyrũ jey oservi Jehovápe. Koʼág̃a haʼe ha hembireko oservi oñondive Ñandejárape ha mokõivévante ovyʼaiterei.

15. ¿Mbaʼépa ojapo vaʼerã umi arevéma omenda vaʼekue oipytyvõ hag̃ua umi omenda ramovévape?

¹⁵ Satanás ombyaise umi famíliape. Upévare, ména ha tembireko tekotevẽ oñopytyvõ ha oĩ unído. Mokõivéva oñatende vaʼerã ani hag̃ua umi mbaʼe heʼi ha ojapóva omokangy imatrimónio, tove jepe tomenda ramo térã aréma. Umi ermáno  ha ermána aréma omenda vaʼekue, omoĩ vaʼerã ehémplo umi omenda ramovévape. Ikatu oinvita sapyʼapyʼa umi matrimónio imitãvévape ijestúdio de famíliape. Péicha haʼekuéra ohechakuaáta umi omendáva osegi vaʼerãha oĩ unído ha ojotrata porã, ohasáramo jepe heta áñoma oñondive (Tito 2:3-7).

16, 17. ¿Mbaʼe mbaʼépa jahupytýta koʼẽrõite?

¹⁶ Umi isrraelíta oviaha jave Jerusalénpe umi fiestarã, entéronte ombaʼapo oñondive. Oprepara hikuái opa mbaʼe oikotevẽtava ha upéi oñopytyvõmba pe viáhe aja. Upéi, og̃uahẽ rire pe témplope, oadora ha oalava hikuái Jehovápe oñondivepa (Luc. 2:41-44). Ñande koʼág̃a jajeprepara hína jaiko hag̃ua pe múndo pyahúpe. Upévare iñimportánte avei ñaime unído ha ñambaʼapo oñondivepa. ¿Ikatúpa ñapensa mbaʼépepa tekotevẽ ñamehorave?

¹⁷ Ko múndope ningo umi hénte ojoavypa ha oiko vai oimeraẽ mbaʼére. Péro ñande katu jaiko pyʼaguapýpe ha ñantende porã la Biblia omboʼéva, pórke Jehová ñanepytyvõ. ¡Ajépa jaagradesete chupe! Ñande jaservíva Jehovápe, ñamombaʼeguasu hína chupe haʼe oipotahaichaite. Koʼã ára pahápe koʼytevéntema ñaime unído jaikóramo jepe diferénte lugárpe ko yvy ápe ári. Oñekumpli hína Isaías ha Miqueas oprofetisa vaʼekue. Haʼekuéra heʼi: “Jaha jajupi Jehová montáñape” (Is. 2:2-4, NM; elee Miqueas 4:2-4). Ñaiméramo siémpre unído, koʼẽrõite jahecháta og̃uahẽ vove pe día entéro yvypóra ‘ojoaju ha ombaʼapo porãtahápe oñondive’ oadora hag̃ua Jehovápe. ¡Ajépa iporãite vaʼerã og̃uahẽ vove upe tiémpo!