PE ÁÑO ohasa vaʼekuépe, hetaiterei testígo de Jehovápe oĩva ko yvy tuichakuére oñenombra oservi hag̃ua de ansiáno ha siérvo ministeriál. Oiméramo nde reĩ koʼã ermáno apytépe, katuete revyʼaiterei hína ne asignasión pyahúre.

Upéicharõ jepe, ikatu hína rejepyʼapy lénto. Péro upéva ningo oikónte jepi voi. Por ehémplo, peteĩ ansiáno imitãva hérava Jason heʼi: “Añenombra ypýrõ guare apensa kuri ndaikatumoʼãiha akumpli ko rresponsavilida tuichaitéva”. Epensamína Moisés ha Jeremías ehémplore. Haʼekuéra opensa vaʼekue ndaikatumoʼãiha avei okumpli pe asignasión Jehová omeʼẽva chupekuéra (Éx. 4:10; Jer. 1:6). Oiméramo nde reñeñandu avei upéicha, ¿mbaʼépa ikatu rejapo rembohovái hag̃ua upe situasión ha resegi hag̃ua rekumpli porã ne asignasión? Jahechamína Timoteo ehémplo, haʼéva peteĩ kristiáno síglo primérope guare (Hech. 16:1-3).

Oime vaʼerã Timoteo oreko kuri 20 áñorupi Pablo oinvitárõ guare chupe oviaha hag̃ua hendive. Imitã rupi ikatu oime ndojeroviái ijehe, ha ijetuʼu chupe okumpli hag̃ua pe asignasión pyahu orekóva kongregasiónpe (1 Tim. 4:11, 12; 2 Tim. 1:1, 2, 7). Péro 10 áño upe rire, Pablo heʼi pe kongregasión oĩvape Filípospe: “Ñande Ruvicha Jesús oipotáramo, koʼẽrõitéma amondóta pene rendápe Timotéope [...]. Ndarekói avave haʼeichagua, añetehápe ojepyʼapýtava penderehe” (Filip. 2:19, 20).

¿Mbaʼéicha rupípa Timotéogui oiko peteĩ ansiáno ikatupyrýva? Jahechamína 6 mbaʼe ikatúva ñaaprende chugui.

1. Añetehápe oñeinteresa vaʼekue hapicháre. Pablo heʼi kuri umi ermáno Filiposguápe Timoteo añetehápe ojepyʼapyha hesekuéra (Filip. 2:20). Timoteo oñeinteresa vaʼekue ipyʼaite guive hapichakuérare, ha oipota oĩ porã hikuái Jehová renondépe. Upévare ojesakrifika hesehapekuéra.

Aníkena rejogua pe chofér de kolektívo og̃uahẽsetereívape iparádape ha ndojepyʼapyvéima umi pasahérore síno pe órarentema. Peteĩ ermáno ehemplár oservímava mas de 20 áño kómo ansiáno hérava William, omeʼẽ ko konsého umi ermáno oñenombra ramóvape: “Mborayhúpe etrata umi ermánope. Ejepyʼapyve vaʼerã umi mbaʼe haʼekuéra oikotevẽvare, emotenonde rangue umi traváho erekóva kongregasiónpe”.

2. Omotenonde Ñandejára servísio. Pablo heʼi vaʼekue Timoteo ijaktitu porãitereiha. Haʼe heʼi: “Enterove umi ótro oheka umi mbaʼe chupekuérante ideprovéchotava ha ndojepyʼapýi Cristo Jesús rembiapóre” (Filip. 2:21). Pablo oskrivi ko kárta Roma guive, ha ohechakuaa umi ermáno upepegua ojepyʼapyve hague ijehénte. Haʼekuéra ndahaʼéi la oñehaʼãitereíva Jehová servísiope. Péro Timoteo ndojoguái chupekuéra. Oñepresenta jave oportunida ombaʼapove hag̃ua predikasiónpe, haʼe ohechauka ikyreʼỹha ojapo haguéicha Isaías. Ko proféta heʼi vaʼekue: “Ápe ningo aĩ che. Chemondóna chéve” (Is. 6:8).

¿Mbaʼéichapa ikatu remohenda porã ne rembiapokuéra ha nde aktivida espirituál? Primero, ehecha mbaʼépa remotenonde vaʼerã. Pablo heʼi vaʼekue tekotevẽha jaikuaa porã “umi mbaʼe iñimportantevéva” (Filip. 1:10). Upéva heʼise emotenonde vaʼerãha Ñandejára oguerohorýva. Segundo, emboyke umi mbaʼe hoʼuetereíva ne tiémpo ha nemokaneʼõva. Pablo oakonseha kuri Timotéope: “Emboykete umi  mbaʼe ojaposéva jepi mitãrusukuéra, ha eñehaʼã akóinte nderekojoja, ejerovia, eporohayhu, ha ndepyʼaguapy” (2 Tim. 2:22).

3. Ombaʼapo jejopy Jehová servísiope. Pablo omomanduʼa vaʼekue umi Filiposguápe: “Peẽ peikuaa Timoteo ohechauka porã hague mbaʼeichaguápa haʼe, peteĩ taʼýra ombaʼapoháicha itúvandi, haʼe ombaʼapo chendive tembiguáicha umi marandu porã iñasãi hag̃ua oparupiete” (Filip. 2:22). Timoteo naiñateʼỹi vaʼekue, upéva rangue ombaʼapo jejopy Páblondi. Péicha rupi oñemoag̃uive ojuehe.

Nde ningo ikatu rejapo heta mbaʼe Jehová organisasiónpe, ha umi traváho nembovyʼáta ha nemoag̃uivéta ermanokuérare. Eñehaʼãkena siémpre nerembiapo heta “ñande Ruvicha servísiope” (1 Cor. 15:58).

4. Ojapo umi mbaʼe oaprendéva. Pablo oskrivi vaʼekue Timotéope: “Péro nde katu reñatende porã ha resegi hekoitépe che amboʼéva, che aiko lája, che rembipota, che jerovia, che pasiénsia, che mborayhu ha che aguánte” (2 Tim. 3:10). Timoteo ojapo rupi umi mbaʼe oaprendéva, okumpli umi rrekisíto oñemeʼẽ hag̃ua chupe rresponsavilida tuichavéva (1 Cor. 4:17).

¿Oĩpa peteĩ ermáno madúro nde rekonfiaha oñemoñeʼẽva jepi ndéve? Ndereguerekóiramo, ¿ikatúpa reheka peteĩ? Peteĩ ansiáno oservímava heta áñore hérava Tom heʼi: “Peteĩ ansiáno ohechauka vaʼekue oñeinteresaha cherehe, ha ahecha chupe che túaicha. Pyʼỹinte ajerure chupe konsého, ha upéi ajapo la heʼíva chéve. Upéva chepytyvõ ajeroviave hag̃ua ahávo chejehe”.

5. Osegi oñakãrapuʼã espirituálmente. Pablo heʼi Timotéope: “Reñehaʼã meme vaʼerã remombaʼeguasu Ñandejárape nde pyʼaite guive” (1 Tim. 4:7). Jaikuaaháicha, peteĩ atléta ikatu oreko peteĩ entrenadór, péro tekotevẽ avei oñentrena haʼeño. Pablo heʼi avei Timotéope: “Resegi vaʼerã reñehaʼãmbaite relee opavave renondépe, reñemoñeʼẽ ha reporomboʼe [...]. Ejepyʼamongeta koʼã mbaʼére, ha eñemeʼẽmbaite umíva rehehápe; péicha opavave ohechakuaáta reñakãrapuʼãha rehóvo” (1 Tim. 4:13-15).

Nde avei reñehaʼã meme vaʼerã ndekatupyryve hag̃ua. Ejapo ikatúva guive esegi hag̃ua eprogresa ha eikuaa hag̃ua umi prosedimiénto Jehová organisasión oipotáva resegi, eñemoĩ al día koʼã mbaʼépe. Eñatendékena ha ani ejeroviaiterei ndejehe. Ani epensa neexperiénsia heta haguére natekotevẽveimaha reipurueterei ne tiémpo reheka hag̃ua informasión. Timoteo ojapo haguéicha, “eñatende ndejehe ha remboʼe lájare” (1 Tim. 4:16).

6. Ojerovia Jehová espíriture. Pablo opensa pe tembiapo Timoteo ojapóvare ha heʼi chupe: “Eñongatu porãke pe mbaʼe porãite ojeheja vaʼekue nde kárgope, upearã ejevale pe espíritu sánto oĩvare ñande pype” (2 Tim. 1:14). Ikatu hag̃uáicha Timoteo oñangareko porã pe tembiapo Ñandejára omeʼẽ vaʼekue chupe, ojerovia vaʼerã pe espíritu sántore.

Peteĩ ermáno hetaiterei áñorema oservíva de ansiáno hérava Donald, heʼi: “Umi ansiáno ha siérvo ministeriál hakateʼỹ vaʼerã pe amista orekóvare Ñandejárandi. Péicha ‘naikaneʼõmoʼãi’, imbaretevéta guei. Ojeruréramo Ñandejárape ijespíritu ha ohechaukárõ hekovépe umi mbaʼe porã oúva pe espíritu sántogui, haʼéta peteĩ vendisión iñermanokuérape g̃uarã” (Sal. 84:7; 1 Ped. 4:11).

Heta ermáno oñenombra ramóva oprogresa ohóvo nde rejapoháicha, ha añetehápe igustoiterei jahecha upéva. Jason, ñañeʼẽ hague oñepyrũre ko artíkulo, heʼi: “Heta mbaʼéma aaprende pe tiémpo aservívape de ansiáno, ha ajeroviamiéma chejehe. Avyʼa pe asignasión arekóvare, ha chéve g̃uarã upéva haʼe peteĩ priviléhio tuichaitereíva”.

Ha nde, ¿resegítapa reprogresa? Eñehaʼãmbaitékena esegi Timoteo ehémplo, péicha ndedeprovechoitereíta Jehová puévlope.