1, 2. a) ¿Mbaʼérepa umi hénte Pablo tiémpope guare oñemongeta meme vaʼekue pe liverta ha esklavitúre? b) ¿Mávaguipa ou pe liverta teete?

UMI kristiáno ypykue oiko kuri pe império románope. Upérõ umi hénte ojekreeterei vaʼekue umi leikuéra, pe hustísia ha liverta orekóvare hikuái. Péro ko goviérno imbaretetéva omombaʼapo pohýi vaʼekue hetaiterei esklávope. Peteĩ moméntope 1 de káda 3 persóna oikóva Roma poguýpe haʼe vaʼekue esklávo. Katuete ningo umi hénte ha umi kristiáno avei oñemongeta meme vaʼekue pe liverta ha esklavitúre.

² Apóstol Pablo oñeʼẽ meme vaʼekue pe livertáre umi kárta oskrivi vaʼekuépe. Péro haʼe ndahaʼéi omyatyrõséva umi provléma oĩva ko múndope, heta hénte ojapose haguéicha upe tiémpope. Upéva rangue, haʼe ha umi ótro kristiáno oñehaʼãmbaite vaʼekue omboʼe hag̃ua hapichakuérape pe marandu porã oñeʼẽva Ñandejára Rréinore. Avei oipytyvõ chupekuéra ontende hag̃ua iñimportantetereiha Jesús sakrifísio. Pablo heʼi kuri umi kristiánope moõguipa ou pe liverta teete. Haʼe heʼi: “Jehová hína peteĩ Espíritu; ha oĩháme Jehová espíritu sánto, upépe oĩ liverta” (2 Cor. 3:17).

3, 4. a) ¿Mbaʼérehepa oñeʼẽ kuri Pablo heʼi mboyve la oĩva 2 Corintios 3:17-pe? b) ¿Mbaʼépa jajapo vaʼerã jareko hag̃ua pe liverta oúva Jehovágui?

 ³ Pablo oskrivírõ guare pe segunda kárta umi Corintoguápe, omombeʼu mbaʼépa oiko Moisés oguejýrõ guare mónte Sinaígui oñeʼẽ rire Jehová ánhel ndive. ¡Moisés rova omimbipa haʼete voi hendýva! Umi israelita ohechávo upéva okyhyjeterei, upémarõ Moisés omoʼã hova peteĩ páñope (Éx. 34:29, 30, 33; 2 Cor. 3:7, 13). Pablo heʼi: “Oĩramo okambiáva ha ou jeýva oadora Jehovápe upe páño ojepeʼa” (2 Cor. 3:16). ¿Mbaʼépa la heʼise vaʼekue?

⁴ Pe artíkulo ohasa vaʼekuépe jahecha kuri Jehová haʼeha pe Kreadór, ha haʼe añoite orekoha pe liverta ijojahaʼỹva ojapo hag̃ua opa mbaʼe ojaposéva. Ndareíri ningo “oĩháme Jehová” ha ijespíritu sánto, “upépe oĩ liverta”. Péro Pablo heʼi jarekoséramo liverta jajevy vaʼerãha Jehová rendápe. Upéva heʼise ñaĩ porã vaʼerãha henondépe. Umi israelita oĩrõ guare pe desiértope ndohechái vaʼekue opa mbaʼe Jehová ohechaháicha. Haʼete orekóva hikuái peteĩ páño omoʼãva iménte ha ikorasõ. Haʼekuéra oipuruse iliverta omeʼẽ hag̃ua gústo ijupe (Heb. 3:8-10).

5. a) ¿Mbaʼeichagua livertápa ou Jehová espíritu sántogui? b) ¿Mbaʼéichapa jaikuaa umi oĩva préso jepe ikatuha oreko pe liverta oúva Jehovágui? c) ¿Mbaʼe porandúpa ñambohovái vaʼerã?

⁵ Pe liverta oúva Jehová espíritugui tuichaiteve hína pe liverta ikatúvagui oguereko peteĩ préso. Pe espíritu sánto rupive yvyporakuéra ikatu oreko pe liverta ndaikatumoʼãiva ohupyty mamove. Upéva ñandepeʼa pekádo ha ñemano poguýgui, ha avei ñandelivra pe rrelihión japúgui ha ikostumbrekuéragui (Rom. 6:23; 8:2). ¡Ajépa tuichaite mbaʼe upe liverta! Peteĩ esklávo térã peteĩ oĩva kárselpe jepe ikatu oreko upéva (Gén. 39:20-23). Ermána Nancy Yuen ha ermáno Harold King oĩ vaʼekue kárselpe heta áñore ojerovia haguére Ñandejárare. Upéicharõ jepe haʼekuéra oreko kuri pe liverta oúva Jehovágui. Ikatu jahecha ha ñahendu chupekuéra JW Broadcástingpe (VIDEOS > ENTREVISTAS Y EXPERIENCIAS > SE ENFRENTAN A PRUEBAS). Ñambohovaimína koʼág̃a mokõi porandu: 1) ¿Mbaʼéichapa jahechauka ñamombaʼeha pe liverta jarekóva? Ha 2) ¿mbaʼéichapa ikatu jaipuru porã pe liverta?

6. ¿Mbaʼéichapa umi israelita ohechauka vaʼekue nomombaʼeiha pe liverta Jehová omeʼẽva chupekuéra?

⁶ Jarresivi jave peteĩ rregálo ivaliósova, katuete jaagradeseterei pe persóna omeʼẽ vaʼekuépe ñandéve. Umi israelita katu ndoagradeséi vaʼekue pe liverta Jehová omeʼẽva chupekuéra. Unos kuánto mésente Jehová oguenohẽ rire chupekuéra Egíptogui, haʼekuéra ohechagaʼueterei jeýma umi tembiʼu ha vevída hoʼu vaʼekue upépe. Ojekeha pe manágui, pe aliménto Jehová omeʼẽva chupekuéra. La ivaiveha katu ohose jey hikuái Egíptope. Jehová omeʼẽ kuri umi israelítape liverta oadora hag̃ua chupe, péro chupekuéra g̃uarã umi pira, pepíno, sandía, puérro, sevói ha áho ovaleve vaʼekue pe livertágui. Ndareíri Jehová ipochyeterei hendivekuéra (Núm. 11:5, 6, 10; 14:3, 4). ¿Mbaʼépa ñaaprende upe oiko vaʼekuégui?

7. ¿Mbaʼéichapa Pablo osegi kuri pe konsého haʼe voi omeʼẽ vaʼekue oĩva 2 Corintios 6:1-pe? b) ¿Mbaʼéichapa ñande avei ikatu jasegi upe konsého?

⁷ Pablo heʼi porã vaʼekue entéro kristiánope siémpre oagradese vaʼerãha pe  liverta Jehová omeʼẽva Itaʼýra Jesucristo rupive (elee 2 Corintios 6:1). Pablo ningo iñimperfékto vaʼekue ha oĩ pe pekádo ha ñemano poguýpe, upévare oñeñandu vaieterei kuri. Upéicharõ jepe haʼe heʼi: “¡Aagradese Ñandejárape, ñande Ruvicha Jesucristo rupive!”. ¿Mbaʼérepa heʼi kuri upéva? Haʼe omyesakã: “Pe espíritu sánto léi penemoingovéva pejoaju hag̃ua Cristo Jesús rehe, peneguenohẽ pekádo ha ñemano léi poguýgui” (Rom. 7:24, 25; 8:2). Pablo ojapo haguéicha, ñande avei núnka nañanderesaráiri vaʼerã Jehová ñanemosãsoha pekádo ha ñemano poguýgui. Jesús sakrifísio rupive ñande jaservi Ñandejárape konsiénsia potĩ reheve ha añetehápe javyʼa (Sal. 40:8).

8, 9. a) ¿Mbaʼéichapa heʼi vaʼekue Pedro jaipuru vaʼerãha pe liverta? b) ¿Mbaʼéichapa ikatu ojepuru vai pe liverta?

⁸ Ñande ningo ndahaʼéi jaagradesénte vaʼerã Jehovápe pe liverta jarekóvare, síno ñañatende vaʼerã ani hag̃ua jaipuru vai. Por ehémplo, Pedro heʼi porã vaʼekue ani hag̃ua jaipuru pe liverta jarekóva jajapo hag̃ua ivaíva (elee 1 Pedro 2:16). Ko konsého ningo ñanemomanduʼa la oiko vaʼekuére umi israelita oĩrõ guare desiértope. Ñane tiémpope katu koʼýte ou porã ñandéve ko konsého. Satanás ha imúndo pyʼỹinte ñandejopy opáicha rei jarekose hag̃ua heta mbaʼe, por ehémplo ao, tembiʼu, vevída térã umi entretenimiénto. Umi propagánda katu omoĩ umi persóna iporãvape ikatu hag̃uáicha ñanekonvense jajogua hag̃ua umi mbaʼe añetehápe nañaikotevẽiva. Jahechaháicha, ndahasyiete jaʼa hag̃ua koʼã ñuhãme ha jaipuru vai la ñande liverta.

⁹ Pe konsého omeʼẽ vaʼekue Pedro ikatu avei jaipuru jadesidi hag̃ua umi mbaʼe iñimportantevéva. Por ehémplo, jadesidítaramo jasegítapa jastudia ha mbaʼépepa jajededikáta. Koʼág̃arupi heta mitãrusúpe oñepresiona ikoléhiope ikatu hag̃uáicha oñehaʼãmbaite oike hag̃ua universidápe. Heta oĩ heʼíva umi mitãrusukuérape ijestúdio porã vaʼerãha ikatu hag̃uáicha ojerrespeta chupekuéra, ombaʼapo porã ha ogana heta pláta. Ikatu voi ojehechauka chupekuéra algún infórme orovia hag̃ua hikuái umi osẽva guive universidágui, ogana porãveha umi oterminávagui ikoléhionte. Umi mitãrusukuéra ningo odesidi vaʼerã mbaʼépa ojapóta henonderãme, upévare ikatu ou opensa umi estúdio yvate ou porãitereitaha chupekuéra. Péro, ¿mbaʼéguipa ndahesaráiri vaʼerã umi mitãrusu ha ituakuéra?

10. ¿Mbaʼépa jareko vaʼerã enkuénta jadesidíta jave peteĩ mbaʼe?

¹⁰ Oĩ opensáva káda uno odesidi vaʼerãha mbaʼépa ojapóta umi situasión ñakomenta vaʼekuépe, ha upéicha rupi iporãha ojapo la ojaposéva ndostorváima guive chupe ikonsiénsia. Koʼãichagua persóna ikatu hína oreko enkuénta Pablo oskrivi vaʼekue: “¿Mbaʼére piko che arekohápe liverta, che rapicha konsiénsia chehusga vaʼerã?” (1 Cor. 10:29). Añetehápe ñande jareko liverta jadesidi hag̃ua jasegítapa peteĩ estúdio yvate ha mbaʼépepa jajededikáta. Péro ani ñanderesarái ñande liverta orekoha límite, ha jajecha vaʼerãha umi mbaʼe jadesidívare. Upévare Pablo heʼi vaʼekue: “Opa mbaʼe ningo ovale jajapo, péro naentéroi ideprovécho. Opa mbaʼe ovale jajapo, péro naentéroi ñanemombarete” (1 Cor. 10:23). Ñande ningo jareko liverta jadesidi hag̃ua heta mbaʼe, péro ani ñanderesarái umi mbaʼe ñandéve ñandegustávante ndahaʼeiha la iñimportantevéva.

11. ¿Maʼerãpa Jehová ñanemosãso?

¹¹ Pedro heʼírõ guare ani hag̃ua jaipuru vai pe liverta jarekóva, heʼi avei jaipuru porãtaha pe liverta jaservírõ Ñandejárape “tembiguáiramo”. Jehová ningo ñanemosãso Jesús rupive pekádo ha ñemano poguýgui, ikatu hag̃uáicha ñañemeʼẽmbaite iservísiope.

12. ¿Mbaʼe ehémplopa oheja ñandéve Noé ha ifamília?

¹² ¿Mbaʼéichapa ikatu jaipuru porã pe liverta jarekóva? Upéva jajapóta jaipurúramo ñane tiémpo ha ñane mbaretekue Jehová servísiope. Péicha ndajaikomoʼãi ko múndo oikuaveʼẽva rapykuéri, ni nañañehaʼãmoʼãi tódo el tiémpo jahupyty hag̃ua umi mbaʼe ñandéve ñandegustávante (Gál. 5:16). Ñapensamína Noé ha hogayguakuérare. Upérõ guare umi hénte iviolentoiterei ha hekokyʼa vaʼekue. Péro haʼekuéra ndojeheʼái hesekuéra ni umi mbaʼe ojapóvare hikuái. Upéva rangue odesidi ombaʼapo jejopy pe traváho Jehová omeʼẽ vaʼekuépe chupekuéra. Ojapo hikuái pe árka, ombyaty hiʼupy ijupekuéra g̃uarã ha umi animálpe g̃uarã, ha avei oavisa umi héntepe outaha peteĩ ama guasu. “Noé ojapo opa mbaʼe omanda vaʼekue chupe Ñandejára. Heʼi hagueichaite chupe ojapo” (Gén. 6:22). Upéicha rupi Noé ha ifamília ojesalva kuri (Heb. 11:7).

13. ¿Mbaʼépa omanda ñandéve Jehová?

¹³ ¿Mbaʼépa omanda Jehová jajapo hag̃ua koʼã tiémpope? Ñande ningo Jesús disípulo ha jaikuaa porã Ñandejára oipotaha japredika (elee Lucas 4:18, 19). Koʼág̃arupi Satanás ombotavy avei umi héntepe, upévare ndohechakuaái hikuái umi rrelihión japu, umi mbaʼerepy ha pe polítika orekoha chupekuéra hembiguáiramo (2 Cor. 4:4). Jesús ojapo haguéicha, ñande avei ikatu ñaipytyvõ umi héntepe oikuaa ha oadora hag̃ua Jehovápe, Ñandejára omeʼẽva liverta. Upéva ningo peteĩ priviléhio tuichaitereíva (Mat. 28:19, 20). Péro jaikuaaháicha ndahaʼéi la ifásilva japredika umi héntepe.  Heta lugárpe umi persóna ndoikuaaséi Ñandejárape, térã ipochy voi japredika jave chupekuéra. Opa umívare iporã ñañeporandu: “¿Ikatúpa aipuru pe liverta arekóva ambaʼapove hag̃ua Jehová servísiope?”.

14, 15. ¿Mbaʼépa odesidi ojapo heta kristiáno? (Ehecha pe taʼanga oĩva iñepyrũme).

¹⁴ Heta kristiáno ohechakuaa pe fin hiʼag̃uimbaitemaha, upévare odesidi oiko sensillomie ha omoñepyrũ iprekursorádo. Añetehápe upéva ñanemokyreʼỹeterei (1 Cor. 9:19, 23). Oĩ osegíva oservi ikongregasiónpe, ótro katu ova ambue lugárpe oĩvehápe nesesida. Umi 5 áño ohasa vaʼekuépe, mas de 250.000 ermáno ha ermána omoñepyrũ iprekursorádo, ha koʼág̃a oĩma mas de 1.100.000 prekursór rregulár. ¡Ajépa igustoite ñahendu jave oĩha hetaiterei kristiáno oipurúva iliverta oservi hag̃ua Jehovápe! (Sal. 110:3).

¹⁵ ¿Mbaʼépa omokyreʼỹ chupekuéra oipuru porã hag̃ua pe liverta orekóva? Jahechamína John ha Judith ehémplo. Umi 30 áño ohasa vaʼekuépe, oservi jepéma hikuái heta paíspe. Haʼekuéra omombeʼu oñepyrũrõ guare pe Eskuéla de Prekursór áño 1977-pe, oñemokyreʼỹ hague umi ermánope ova hag̃ua umi lugár oñekotevẽhápe hetave opredika vaʼerãre. Upéicha rupi John pyʼỹinte okambiámi vaʼekue de traváho, péva opermiti chupekuéra osegi hag̃ua oiko sensillomi. Amo ipahápe oho hikuái oservi ótro paíspe. ¿Mbaʼépa oipytyvõ chupekuéra ombohovái porã hag̃ua umi mbaʼe ijetuʼúva, por ehémplo pe idióma, kultúra ha klíma idiferénteva? John ha Judith oñemboʼe kuri Jehovápe ha oĩ segúro oipytyvõtaha chupekuéra. ¿Mbaʼéichapa oñeñandu hikuái oservi rire Jehovápe ipyʼaite guive heta áñorema? John heʼi: “Añemeʼẽmbaite rupi Jehová servísiope, aju aikuaa porãve chupe. Chéve g̃uarã ningo Jehová haʼe peteĩ túa cherayhuetereíva. Koʼág̃a antende porãve mbaʼépa heʼise Santiago 4:8. Upépe heʼi: ‘Peñemoag̃uíkena Ñandejárare, ha haʼe oñemoag̃uíta penderehe’. Che ningo atopa la aheka vaʼekue aikóvo, pórke aipuru porã che rekove ha upéva chembovyʼa”.

16. ¿Mbaʼéichapa heta ermáno oipuru porã pe liverta orekóva?

¹⁶ Oĩ oservíva de prekursór heta tiémporema, ojapo haguéicha John ha Judith. Péro ótro katu oservi kuri peteĩ tiémpo mbykymírente ha upéi ndakatuvéi ojapo upéva. Oĩ heta oñekuaveʼẽva oservi hag̃ua oñemopuʼãhápe umi lugár ojeadora hag̃ua Jehovápe. Por ehémplo, amo 27.000 ermáno ha ermánarupi oipytyvõ kuri oñemopuʼãrõ guare pe sentrál mundiál oĩva Warwick, Nueva Yórkpe. Oĩ ombaʼapóva 2 semánare, unos kuánto mésere, 1 año térã hetave. Heta koʼã ermáno omboyke heta mbaʼe oservi hag̃ua Wárwickpe. Haʼekuéra oipuru pe liverta orekóva omombaʼeguasu hag̃ua Jehovápe, Ñandejára omeʼẽva liverta. ¡Añetehápe omoĩ hikuái peteĩ ehémplo iporãitereíva ñandéve g̃uarã!

17. ¿Mbaʼépa jahupytýta jaipuru porãramo pe liverta Ñandejára omeʼẽva ñandéve?

¹⁷ Ñande ningo jaikuaa Jehovápe ha jareko liverta jaadora rupi chupe. Ajépa jaagradesete koʼã mbaʼe. Jahechaukákena javaloraha upe liverta opa mbaʼe jadesidívape. Ha jaiko rangue jaipuru vai upéva, ñañehaʼã jaservi Jehovápe ñande pyʼaite guive. Péicha javyʼáta jahupyty vove umi vendisión haʼe oprometéva heʼírõ guare ikreasión “ojeitaha ñehundi poguýgui ha ohupytýta Ñandejára raʼykuéra liverta ijojahaʼỹva” (Rom. 8:21).