1-3. a) ¿Mbaʼe situasiónpepa oĩ entéro mitãrusukuéra, ha mbaʼérehepa ikatu ñambojoja upéva? (Ehecha pe taʼanga oĩva iñepyrũme). b) ¿Mbaʼépa ikatu oipytyvõ umi mitãrusúpe?

EPENSAMÍNA rehoseha peteĩ akontesimiénto iñimportántevape oikótava mombyry nde rógagui. Upévare rehómante vaʼerã peteĩ kolektívope. Reg̃uahẽ rire pe terminálpe, rehecha oĩha hetaiterei hénte ha diferénte kolektívo. Péro nde nderejepyʼapýi pórke reikuaa moõitépa rehose ha mbaʼe kolektívopa ndegueraháta upe gotyo. Upéicha rupi reñatendéta pono rejupi ótro kolektívo ndeguerahátava ótro ládo.

² Ñande rekove ikatu ñakompara peteĩ viáhere, ha peẽ mitãrusukuéra haʼete hína umi hénte oĩva pe terminálpe. Amáske ohasa la tiémpo tekotevẽta pedesidi ha peiporavo heta mbaʼe, péro umíva ikatu penderesarea. Upéicharõ jepe, peikuaa porãramo moõpa pehose, ifasilvéta peẽme pedesidi porã hag̃ua. ¿Ndépa mbaʼe rejapose?

³ Ko artíkulope ñambohováita ko porandu ha nemokyreʼỹta reñehaʼãmbaite hag̃ua rembovyʼa Jehovápe. Upéva heʼise ereko  vaʼerãha enkuénta Jehová konsého opa mbaʼe redesidívape. Umíva apytépe mbaʼépa restudiáta, mbaʼépepa rembaʼapóta, remendátapa ha nefamíliatapa. Iporãta reñehaʼãramo rehupyty hetave mbaʼe Jehová servísiope, pórke umíva nemoag̃uivéta hese. Remotenondéramo Jehovápe, haʼe katuete nevendesíta ha nepytyvõta osẽ porã hag̃ua ndéve opa mbaʼe (elee Proverbios 16:3).

4. ¿Mbaʼépa jahecháta ko artíkulope?

⁴ Iporãiterei ningo eñehaʼã ehupyty hetave mbaʼe Jehová servísiope. ¿Mbaʼérepa? Koʼág̃a jahecháta mbohapy mbaʼe ohechaukáva iñimportanteha upéva. Umi mokõi mbaʼe ñamensionátava ñepyrũrã, nepytyvõta rehechakuaa hag̃ua reñemoag̃uivetaha Jehováre reñehaʼãmbaitérõ rehupyty ne méta. Pe mbohapyha katu ohechaukáta mbaʼérepa iporã remoĩ méta nemitã reheve.

5. ¿Mbaʼérepa iñimportantete ñamoĩ méta?

⁵ ¿Mbaʼérepa iñimportantete ñamoĩ méta? Primero, jaagradese hag̃ua Jehovápe ñanderayhueterei haguére ha ojapo rupi heta mbaʼe porã ñanderehehápe. Peteĩ salmísta heʼi vaʼekue: “Jehová Todopoderóso, ore roagradese ndéve [...]. Jehová, nde ningo rejapo heta mbaʼe porã, upévare che avyʼaiterei. Che apurahéita romombaʼeguasu hag̃ua pórke nde rejapo opaite mbaʼe” (Sal. 92:1, 4). Epensamína umi mbaʼe Jehová omeʼẽ vaʼekuére ndéve. Por ehémplo, omeʼẽ ndéve nde rekove, la Biblia, pe kongregasión, pe esperánsa reiko hag̃ua peteĩ paraísope opa árare ha nepytyvõ rejerovia hag̃ua hese. Remoĩramo umi méta espirituál, rehechaukáta reagradeseha Jehovápe koʼã mbaʼe ha reñemoag̃uivéta hese.

6. a) ¿Mbaʼéichapa umi méta remoĩva nepytyvõ reñemoag̃uive hag̃ua Jehováre? b) ¿Mbaʼe métapa ikatu reñehaʼã rehupyty ne mitã aja gueteri?

⁶ Segundo, ñañehaʼãramo jahupyty umi méta, jajapovéta Jehová servísiope ha ñanemoag̃uivéta hese. Apóstol Pablo heʼi vaʼekue: “Ñandejára ningo hekojoja hína ha ndahesaraimoʼãi umi mbaʼe pejapo vaʼekuégui, mbaʼéichapa pehayhu héra” (Heb. 6:10). Ani epensa nemitãitereiha remoĩ hag̃ua méta. Por ehémplo, Christine orekórõ guare 10 áño odesidi vaʼekue olee memetaha umi ermáno ifiélva rembiasakue. Toby katu orekópe 12 áño odesidi oleepataha la Biblia ojevautisa mboyve. Maxim orekórõ guare 11 áño ha iñermána Noemi 10 áño, ojevautisa vaʼekue hikuái. Mokõivéva oservise kuri Betélpe. Upévare, ikatu hag̃uáicha siémpre imanduʼa la imétare, omoĩ hóga parére peteĩ solisitu oho hag̃ua Betélpe. Ha nde, ¿mbaʼe métapa reñehaʼã hína rehupyty? (elee Filipenses 1:10, 11).

7, 8. a) ¿Mbaʼéichapa umi méta remoĩva nepytyvõ redesidi porã hag̃ua? b) ¿Mbaʼérepa peteĩ ermána odesidi imitãrõ guare ndohomoʼãiha universidápe?

⁷ Tercero, iporã remoĩ méta nemitã aja pórke tekotevẽ redesidi heta mbaʼe. Por ehémplo, mbaʼépa restudiáta térã mbaʼépepa rembaʼapóta. Epensami jeýna pe viáhere. Umi mbaʼe tekotevẽva redesidi ikatu rekompara reg̃uahẽha peteĩ krúsepe ha ehecha vaʼerã moõ gotyopa rehóta. Reikuaáramo moõpa rehose ndahasymoʼãi redesidi hag̃ua mbaʼe tapépa resegíta. Péicha avei, reikuaa porãramo mbaʼe mbaʼépa rehupytyse ifasilvéta ndéve redesidi porã hag̃ua. Proverbios 21:5 heʼi: “Umi oplanea porãva la ojapótava, katuete osẽ porã chupe la ojaposéva”. Amáske voive replanea mbaʼe métapa rehupytyse, pyaʼeve rehecháta la rresultádo. Péicha oiko vaʼekue peteĩ ermána héravare Damaris, tekotevẽrõ guare odesidi peteĩ mbaʼe iñimportánteva imitã aja gueteri.

⁸ Damaris otermina vaʼekue ikoléhio nóta porã reheve. Upévare ikatu kuri oike universidápe ostudia hag̃ua avogadarã opagaʼỹre mbaʼevete. Péro haʼe odesidi ombaʼapo peteĩ vánkope. ¿Mbaʼérepa ojapo upéva? Pórke imitãite guive odesidíma kuri oservitaha kómo prekursóra. Haʼe heʼi: “Ajaposéramo che prekursorádo  ambaʼapo vaʼerã médio díante, ha oikórõ chehegui avogáda añetehápe aganavéta péro ijetuʼúta kuri ambaʼapo hag̃ua médio díante”. Damaris oservi kómo prekursóra ojapóma 20 áño. ¿Ohechakuaápa ko ermána odesidi porã hague imitãme, ha noñehaʼãreíri hague ombaʼapove Jehová servísiope? Haʼe oĩ segúra odesidi porã hague. Por ehémplo, pe vánko ombaʼapohápe oikuaa unos kuánto avogádope, ha ohecha heta ijapyteguikuéra ndovyʼaiha la itraváhore. Damaris katu oñemeʼẽ enkuénta heta áñorema pe prekursorádo ombovyʼaitereiha chupe, ha avei ojei hague heta akãrasýgui.

9. ¿Mbaʼérepa jaguerohory umi ermáno imitãvape?

⁹ Ko yvy tuichakuére oĩ hetaiterei ermáno imitãva ojapóva umi mbaʼe iporãva, ha jaguerohory chupekuéra upe haguére. Haʼekuéra ningo omotenonde Jehovápe, upévare oñehaʼãmbaite ohupyty hetave mbaʼe iservísiope. Koʼã ermáno ovyʼaiterei ha ojapo ikatúva guive iñeʼẽrendu hag̃ua Jehovápe opa mbaʼépe. Por ehémplo, oreko enkuénta Ñandejárape odesidíta jave mbaʼépa ostudiáta, mbaʼépepa ombaʼapóta ha mbaʼéichapa oñemaneháta hogapýpe. Salomón heʼi vaʼekue: “Rekonfia vaʼerã Jehováre nde pyʼaite guive”. Upéi heʼi avei: “Ereko vaʼerã enkuénta Ñandejárape opa mbaʼe rejapóvape, ha haʼe ndegiáta reho hag̃ua tape porãre” (Prov. 3:5, 6). Mitãrusukuéra, Jehová penderayhueterei ha omombaʼe la pejapóva. Upévare oñangarekóta penderehe, pendegiáta ha penevendesíta.

10. a) ¿Mbaʼérepa pe predikasión oĩ vaʼerã umi mbaʼe iñimportantevéva apytépe? b) ¿Mbaʼépa ikatu nepytyvõ reexplika porãve hag̃ua umi mbaʼe regueroviáva?

¹⁰ Reñehaʼãramo remotenonde umi mbaʼe Jehová oguerohorýva, reñeʼẽséta hese umi héntepe oikuaa hag̃ua chupe. Jesucristo heʼi vaʼekue “pe marandu porã ojekuaauka raẽ vaʼerã opa tetãrupi” (Mar. 13:10). Jahechaháicha, tekotevẽterei japredika, upe tembiapo oĩ vaʼerã umi mbaʼe iñimportantevéva apytépe. ¿Ikatúpa reñehaʼã repredikave? ¿Ndaijáipa ndéve rejapo nde prekursorádo? Oimérõ nanekyreʼỹguasúi repredika hag̃ua, ¿mbaʼépa ikatu rejapo? ¿Mbaʼéichapa ikatu reexplika porãve umi mbaʼe regueroviáva? Oĩ mokõi mbaʼe ikatúva nepytyvõ. Ejeprepara porã vaʼerã ha ani eheja ohasa rei peteĩ oportunida reñeʼẽ hag̃ua Jehováre. Rejapóramo péicha, rehecháta mbaʼeichaitépa revyʼáta repredika jave.

11, 12. a) ¿Mbaʼéichapa ikatu rejeprepara reñeʼẽ hag̃ua Jehováre nde rapichakuérape? b) ¿Mbaʼéichapa peteĩ mitãrusu oaprovecha pe oportunida orekóva oñeʼẽ hag̃ua Jehováre ikoléhiope?

¹¹ Iporãta rejepreparáramo rembohovái hag̃ua umi mbaʼe ikatúva oporandu ndéve ne kompañerokuéra, por ehémplo mbaʼérepa rejerovia Ñandejárare. Rembohovái hag̃ua ko porandu ikatu nepytyvõ umi artíkulo osẽva jw.org-pe. Upearã reike vaʼerã heʼihápe ENSEÑANZAS BÍBLICAS > JÓVENES. Upépe oĩ peteĩ párte hérava “Ponlo por escrito”. Ipype retopáta ko pregúnta: “¿Qué razones tengo para creer en Dios”. Ikatu resegi umi konsého oĩva upépe reprepara hag̃ua umi mbaʼe erétava ótrope. Upépe oĩ avei mbohapy téxto bíblico ikatúva reipuru, umíva hína Hebreos 3:4, Romanos 1:20, ha Salmo 139:14. Ko pártepe retopáta hetave informasión ikatúva reipuru rembohovái hag̃ua diferénte pregúnta (elee 1 Pedro 3:15).

¹² Ere ne kompañerokuérape haʼekuéra voi ikatuha oheka pe sítio jw.org-pe umi informasión ointeresáva chupekuéra. Péicha ojapo kuri Luca. Iklásepe oñeñeʼẽ kuri diferénte rrelihiónre. Haʼe ohechakuaa pe lívro ojepurúva ikoléhiope heʼiha heta mbaʼe ndasiértoiva Testigokuérare. Luca ndahaʼéiramo jepe la oñanimaitereíva, oporandu iprofesórape ikatúpa oexplika entéro umi ikompañérope  mbaʼérepa noĩporãi la ojeʼéva Testigokuérare. Pe profesóra opermiti chupe oexplika ikreénsia, ha upémarõ ohechauka ikompañerokuérape ñande sítio oĩva Internétpe. Upéi, pe profesóra omeʼẽ kómo taréa káda únope ohecha hag̃ua pe vidéo hérava Nde ikatu reñedefende reñorairõʼỹre. Katuete ningo Luca ovyʼaiterei kuri ikatu haguére oñeʼẽ Jehováre ikoléhiope.

13. ¿Mbaʼérepa ndajahejái vaʼerã mbaʼeve ñandejoko jajapove hag̃ua Jehová servísiope?

¹³ Aníkena reheja umi provléma nemokangy, upéva rangue esegi eñehaʼã ehupyty hag̃ua la ne méta (2 Tim. 4:2). Upéva ojapo kuri Katharina. Haʼe oreko vaʼekue 17 áño ojedesidírõ guare opredikataha entéro ikompañerokuérape. Oĩ kuri peteĩva manterei oñembohorýva hese, péro Katharina ndahesaráiri la ohupytysévagui. Osegi guei oñekomporta porã ha upéva opokoiterei peteĩva ikompañérore hérava Hans. Ko mitãrusu oñepyrũ olee ñane puvlikasión, ostudia la Biblia ha upe rire ojevautisa. Katharina ndoikuaái kuri la oikóva, pórke upérõ g̃uarã haʼe ováma kuri upe lugárgui. Upéi 13 áño haguépe, tuicha oñesorprende ohechárõ guare Hánspe ojapotaha pe diskúrso púvliko pe kongregasión Katharina ha ifamília oservihápe. Katharina ovyʼaiterei ndohejái haguére mbaʼeve ojoko chupe opredika hag̃ua ikompañerokuérape.

14, 15. a) ¿Mbaʼéguipa nanderesarái vaʼerã oĩ jave ndejopyséva rejapo hag̃ua ivaíva? b) ¿Mbaʼépa ikatu rejapo ani hag̃ua nekangy umi ótro nepresiona jave?

¹⁴ Ko artíkulo nemokyreʼỹ redesidi hag̃ua remotenonde Jehovápe ha remoĩ hag̃ua méta iservísiope. Péro heta mitãrusu ndeavegua ndojapói koʼã mbaʼe, síno opensánte ikuentaveha ohasa porã. Ikatu voi nemboliga rejapo hag̃ua avei haʼekuéraicha. Péro og̃uahẽta peteĩ moménto tekotevẽtahápe ere chupekuéra iñimportantetereiha ndéve g̃uarã rehupyty umi méta remoĩ vaʼekue. Aníkena ótro káusare eju nderesarái ne metakuéragui. Epensamína reimemaha pe terminál jaʼe haguépe oñepyrũre ko artíkulo. ¿Rejupítapa oimeraẽ kolektívope ojeʼéguinte ndéve rehasa porãvetaha rejapóramo upéva? ¡Ni mbaʼevéicharõ nderejapomoʼãi!

¹⁵ Péro, ¿mbaʼépa ikatu rejapo oĩramo ndejopýva  rejapo hag̃ua haʼekuéra ojapoháicha? Eñehaʼã emboyke umi situasión ikatutahápe rejecha vai (Prov. 22:3). Péicha jave epensa vaʼerã mbaʼépepa opáta rejapóramo la ivaíva (Gál. 6:7). Avei tekotevẽ reñemomirĩ rehechakuaa hag̃ua reikotevẽha konsého. Upévare, ehendu oñemoñeʼẽ jave ndéve nde tuakuéra ha umi ermáno ha ermána iñexperiénsiava oĩva kongregasiónpe (elee 1 Pedro 5:5, 6).

16. Emombeʼu peteĩ experiénsia ohechaukáva iñimportanteha ñañemomirĩ.

¹⁶ Peteĩ ermáno hérava Christoph ohechauka vaʼekue oñemomirĩha oaseptávo umi konsého oñemeʼẽva chupe. Ojevautisa riremi, oñepyrũ oho meme peteĩ himnásiope. Upépe umi ótro mitãrusu oinvita chupe opraktika hag̃ua peteĩ depórte hendivekuéra. Haʼe omombeʼu upéva peteĩ ansiánope. Ko ermáno heʼi Christóphpe opensa porã hag̃ua pórke oñepresentakuaa umi situasión ikatúva oraha vai chupe, por ehémplo mbeguekatúpe haʼe ikatu ou ikompetitívo. Christoph lomímonte odesidi oho ohuga umi mitãrusúndi. Péro upéi ohechakuaa iviolentoha hikuái ha haʼe ojapeligraha hendivekuéra. Oñeʼẽ jey ansianokuérandi ha orresivi konsého bíblico. Christoph heʼi: “Jehová ningo omeʼẽ chéve umi persóna cheakonseha porãva, ha che ahendu la heʼíva chéve, ñepyrũrã atardaʼimíramo jepe ajapo hag̃ua la heʼíva hikuái”. ¿Ndépa reñemomirĩ avei rerresivi jave konsého?

17, 18. a) ¿Mbaʼépa Jehová oipota umi imitãvape g̃uarã? b) ¿Mbaʼépa rejapo vaʼerã koʼág̃a ani hag̃ua rembyasy rekakuaapa rire? Emoĩ peteĩ ehémplo.

¹⁷ La Biblia heʼi: “Oiméramo nemitã, edisfruta vaʼerã nemitã reheve. Revyʼa vaʼerã nde pyʼaite guive upe tiémpope” (Ecl. 11:9). Jehová ningo oipota revyʼa nemitã reheve voi. Ko artíkulope reaprende kuri ikatuha rekonsegi upéva rembaʼapo meméramo rehupyty hag̃ua umi méta espirituál, ha resegírõ Jehová konsého entéro mbaʼe replaneáva ha redesidívape. Amáske voive rejapo péicha, pyaʼeve avei rehechakuaáta Jehová ndegiaha, oñangarekoha nderehe ha nevendesiha. Epensa umi konsého neporãvare Ñandejára omeʼẽva ñandéve Iñeʼẽ rupive, ha esegi Eclesiastés 12:1 heʼíva: “Nemitã reheve nemanduʼa vaʼerã nde Apohare Ijojahaʼỹvare”.

¹⁸ Umi mitãrusu ningo sapyʼaitérõ g̃uarã okakuaapáma. Péro ñambyasýramo jepe heta oĩ oñarrepentíva ndodesidiporãi haguére, térã nomoĩri rupi méta imitã reheve. Nde katu reñehaʼã meméramo rehupyty hetave mbaʼe Jehová servísiope, rekakuaapa vove revyʼáta redesidi porã haguére. Upéicha oñeñandu Mirjana. Imitãrõ guare ikatupyry vaʼekue umi depórtepe. Upévare oñeinvita chupe opartisipa hag̃ua umi olimpiáda de inviérnope. Péro haʼe odesidi oservitaha Jehovápe de tiémpo kompléto. Ohasáma mas de 30 áño ha Mirjana oservi gueteri iménandi de tiémpo kompléto. Haʼe heʼi umi hénte oñehaʼãva ifamóso, oipotáva oñemombaʼe chupekuéra, orekoséva autorida ha irrikoséva, añetehápe ndovyʼaiha. Mirjana heʼi igustoitereiha jaservi Jehovápe ha ñaipytyvõ umi héntepe oikuaa hag̃ua chupe, ha koʼã mbaʼe haʼeha umi méta iporãvéva ikatúva jahupyty.

19. ¿Mbaʼérepa iporãitereíta reñehaʼãmbaitéramo rehupyty hetave mbaʼe Jehová servísiope nemitã reheve?

¹⁹ Añetehápe roguerohoryeterei umi imitãvape pórke omboyke umi mbaʼe ikatúva ojoko chupekuéra ha oñemeʼẽmbaite Jehová servísiope. Eñehaʼãkena emoĩ umi méta espirituál, ha ani nderesarái pe predikasión iñimportanteterei vaʼerãha ndéve g̃uarã. Upéicha avei, ani repermiti ko múndo nderesarea ha upéva káusare eju nderesarái ne metakuéragui. Pe tembiapo rejapóva Jehovápe g̃uarã arakaʼeve ndopytareimoʼãi. Avei, nemanduʼáke erekoha ne ermáno ha ermanakuéra nderayhuetereíva ha nepytyvõtava reikotevẽ jave. Emoĩkena Jehová pópe entéro mbaʼe rejapóva, ha entéro mbaʼe replaneáva osẽ porãta ndéve.