1. Ohechaukaháicha Efesios 6:10-13, ¿mbaʼéichapa Jehová ohechauka ojepyʼapyetereiha ñanderehe? Emyesakã.

JEHOVÁ ningo ñanepytyvõ ñandepuʼaka hag̃ua ñane enemigokuérare, ha ojapóvo upéva ohechauka ojepyʼapyetereiha ñanderehe. Ñane enemígo prinsipál haʼe hína Satanás ha umi demónio. Jehová ñandeavisa jajekuida hag̃ua koʼã enemígogui, ha omeʼẽ ñandéve umi mbaʼe ñaikotevẽva ñandepuʼaka hag̃ua hesekuéra (elee Efesios 6:10-13). Jahejáramo Jehová ñanepytyvõ ha jajeroviárõ hese ñande pyʼaite guive, ikatúta ñañemoĩ Satanás rehe. Ñande ningo ikatu jajerovia apóstol Pablo ojapo haguéicha. Haʼe oskrivi vaʼekue: “Ñandejára oĩramo ñanendive, ¿máva piko oñemoĩta ñanderehe?” (Rom. 8:31).

2. ¿Mbaʼépa jahecháta ko artíkulope?

² Ñande ningo kristiáno tee ha ndajaikói ñañeinteresaiterei Satanás ha umi demónio ojapóvare. Upéva rangue, ñañehaʼã ñaaprendeve Jehovágui ha jaservi porã chupe (Sal. 25:5). Péro iporã jaikuaa mbaʼéichapa ombaʼapo Satanás, péicha nañanembotavymoʼãi (2 Cor. 2:11). Ko artíkulope jahecháta mbaʼépa la ojapovéva Satanás ha umi demónio ombotavy hag̃ua umi héntepe. Avei jahecháta mbaʼépa jajapo vaʼerã ani hag̃ua ipuʼaka hikuái ñanderehe.

3, 4. a) ¿Mbaʼépa hína pe espiritísmo? b) ¿Mbaʼeichaite pevépa isarambi pe espiritísmo?

³ ¿Mbaʼépa la oipuruvéva Satanás ha umi demónio ombotavy hag̃ua umi héntepe? Haʼekuéra ojevale pe espiritísmore. Umi  espiritísta heʼi ikatuha oikuaa térã okontrola heta mbaʼe yvyporakuéra normálmente ndaikatúiva oikuaa ni okontrola. Por ehémplo, oĩ heʼíva ikatuha oikuaa la oikótava pe adivinasión térã astrolohía rupive. Ótro katu heʼi ikatuha oñeʼẽ umi omano vaʼekuéndi. Ha avei oĩ ojapóva vruhería térã máhia ikatu hag̃uáicha oechisa ótra persónape. *

⁴ ¿Mbaʼeichaite pevépa isarambi pe espiritísmo? Peteĩ enkuésta ojejapóva 18 tetãme oĩva Latinoamérica ha el Caríbepe, ohechauka 1 de káda 3 persóna ojeroviaha pe máhia, vruhería ha echisería rehe. Avei haimete la mísma kantida de hénte orovia ikatuha ñañekomunika umi espíritundi. Ojejapo avei ótra enkuésta 18 tetãme oĩva Áfricape ha alamita rasa ojerovia pe vruheríare. Añetehápe ningo tahaʼe haʼéva lugár jaikoha, ñañemoĩ vaʼerã pe espiritísmore pórke Satanás oñehaʼã hína ombotavy “ko múndo kompletoitépe” (Apoc. 12:9).

5. ¿Mbaʼépa opensa Jehová pe espiritísmore?

⁵ La Biblia heʼi: “Jehová, ndehegui ou pe añetegua” (Sal. 31:5). ¿Mbaʼépa opensa Jehová pe espiritísmore? ¡Añetehápe ndaijaʼeieterei hese! Haʼe heʼi vaʼekue umi israelítape: “Ndaipóri vaʼerã pende apytépe ohapýva itaʼýra térã itajýrape sakrifísioramo, ni avave ojapóva adivinasión, máhia, opredesíva mbaʼépa oikóta, ni pajeséro, ni peteĩ ojapóva malefísio, ni ohóva oporandu espiritístape térã peteĩ adivínope, ni ombaʼeporandúva umi omano vaʼekuépe. Pórke oimeraẽ ojapóva koʼã mbaʼe ombojeguaru hína Jehovápe” (Deut. 18:10-12). Ñande kristianokuéra nañaimevéima pe Léi Mosáika poguýpe, péro upéicharõ jepe, jaikuaa porã nokambiái hague la Jehová opensáva pe espiritísmore (Mal. 3:6).

6. a) ¿Mbaʼéichapa Satanás operhudika umi héntepe pe espiritísmo rupive? b) ¿Mbaʼépa oiko umi omanóvagui heʼiháicha Eclesiastés 9:5?

⁶ Jehová heʼi ñandéve ñamboyke hag̃ua pe espiritísmo pórke oikuaa Satanás oipuruha upéva operhudika hag̃ua yvyporakuérape. Por ehémplo, oipuru omosarambi hag̃ua heta japu, umíva apytépe ogueroviaka umi omanóva osegiha oikove umi espíritu oĩháme (elee Eclesiastés 9:5). Satanás oipuru avei pe espiritísmo ikatu hag̃uáicha omongyhyje umi héntepe ha omomombyry chupekuéra Jehovágui. Péicha haʼe oipota umi persóna ojerovia umi espíritu añáre ojerovia rangue Jehováre.

7. ¿Mbaʼépa Jehová oikuaauka ñandéve?

⁷ Jaʼéma haguéicha, Jehová heʼi ñandéve entéro mbaʼe tekotevẽva jaikuaa ani hag̃ua Satanás ha umi demónio ñanembotavy. ¿Mbaʼépa jajapo vaʼerã ñañemoĩ hag̃ua hesekuéra? Jahechamína unas kuánta kósa ikatúva jajapo.

8. a) ¿Mbaʼépa prinsipálmente jajapo vaʼerã ñañemoĩ hag̃ua umi espíritu añáre? b) ¿Mbaʼéichapa Salmo 146:4 ohechauka japuha la Satanás heʼíva umi omanóvare?

⁸ Jalee Ñandejára Ñeʼẽ ha jajepyʼamongeta hese. Upéva la prinsipálmente jajapo vaʼerã ikatu hag̃uáicha ñamboyke umi japu omosarambíva umi espíritu aña. Ñandejára Ñeʼẽ haʼete peteĩ espáda haimbéva ikatúva ohundi umi japu Satanás omosarambíva (Efes. 6:17). Por ehémplo, Ñandejára Ñeʼẽ ohechauka porã umi omanóva ndaikatuiha oñekomunika umi oikovévandi (elee Salmo 146:4). Avei ñanemomanduʼa Jehová añoite ikatuha oikuaa porã mbaʼépa oikóta tenonderãme  (Is. 45:21; 46:10). Jaleéramo la Biblia ha jajepyʼamongeta meme hese, ñaiméta preparádo ñamboyke ha ndajachaʼéi hag̃ua umi japu oipotáva jaguerovia umi espíritu aña.

9. ¿Mbaʼe mbaʼépa ñande ñamboyke?

⁹ Ñamboyke opaite mbaʼe ikatúva ñanemoag̃ui pe espiritísmore. Ñande ningo kristiáno teete ha ndajajapói mbaʼeve ñanemoag̃uítava pe espiritísmore. Por ehémplo, ndajahái umi médium espiritístape ñañekomunika hag̃ua umi omanóvandi, ni ndajahekái ótra fórma ñañekomunikaségui hendivekuéra. Jahecha haguéicha pe ótro artíkulope, ñande ndajasegíri avei umi kostúmbre ojerekóva omano jave peteĩ persóna, ojejapóva jepi oñeimoʼã rupi pe omanóva osegiha oikove peteĩ espírituicha. Ha avei ndajaipurúi pe astrolohía térã adivinasión jaikuaaségui mbaʼépa oikóta amo gotyove (Is. 8:19). Ñande jaikuaa porã koʼã mbaʼe ipeligrosoitereiha, ha umíva rupive ikatuha voi ñañekomunika Satanás ha idemoniokuérandi.

10, 11. a) ¿Mbaʼépa ojapo umi Efesogua oaprendérõ guare pe añetegua? b) Ohechaukaháicha 1 Corintios 10:21, ¿mbaʼérepa jasegi vaʼerã umi kristiáno síglo primerogua ehémplo, ha mbaʼéichapa jajapo vaʼerã upéva?

¹⁰ Ñamombo térã ñahundiete umi mbaʼe ikatúva ñanemoag̃ui pe espiritísmore. Síglo primérope, oĩ vaʼekue Éfesope umi tapicha ojapóva espiritísmo. Péro oaprende rire pe añetegua, ojapo hikuái umi kámbio tuichaitereíva. La Biblia heʼi: “Heta umi ojapóva máhia ogueru ilivrokuéra, ombyaty ha ohapy opavave renondépe” (Hech. 19:19). Jahechaháicha, haʼekuéra oñehaʼãmbaite ikatu hag̃uáicha ipuʼaka umi espíritu añáre. Umi lívro de máhia ningo hepyeterei vaʼekue, upéicharõ jepe ohapy hikuái oikónte rangue orregala térã ovende. Chupekuéra ndahaʼéi la oipyʼapyetereíva mboýpa ovale umi lívro, síno mbaʼépa ojapo vaʼerã hikuái ikatu hag̃uáicha Jehová ovyʼa.

¹¹ ¿Mbaʼéichapa ikatu jasegi umi kristiáno síglo primero guare ehémplo? Iporãta ñamombo térã ñahundietéramo umi mbaʼe ikatúva  ñanemoag̃ui pe espiritísmore. Umívape oike umi amuléto térã kurundu, ha avei oimeraẽ mbaʼe umi hénte oipurúva ojeprotehe hag̃ua umi espíritu añágui (elee 1 Corintios 10:21).

12. ¿Mbaʼe mbaʼépa ñañeporandu vaʼerã?

¹² ¿Mbaʼetekópa hína umi entretenimiénto jaiporavóva? Eñeporandumína: “¿Aleépa umi lívro, rrevísta térã umi artíkulo osẽva Internétpe oñeʼẽva espiritísmore? ¿Mbaʼetekópa hína umi músika, pelíkula, prográma de televisión térã umi videohuégo ahugáva? ¿Oĩpa espiritísmo umi entretenimiénto aiporavóvape? Por ehémplo, ¿oñeʼẽpa umi vampíro, sómbi térã umi orekóvare podér sovrenaturál? ¿Ohechaukápa umi máhia, echíso térã paje haʼerõguáicha vyroreínte?”. Jaikuaaháicha, ndaikatúi jaʼe entéro umi entretenimiénto oĩháme umi kuénto térã istória de fantasía orekomaha katuete espiritísmo. Upévare, jajepyʼamongetávo koʼã mbaʼére jajasegura vaʼerã ani hag̃ua jadesidi umi mbaʼe Jehovápe ndogustáiva. Entéronte ningo jajapo ikatúva guive ñanekonsiénsia potĩ hag̃ua (Hech. 24:16). *

13. ¿Mbaʼépa ndajajapói vaʼerã?

¹³ Ani ñamombeʼu umi káso oñeʼẽva demoniokuérare. Iporãta jasegíramo Jesús ehémplo (1 Ped. 2:21). Haʼe ou mboyve ko yvy ape ári oiko vaʼekue yvágape, upévare oikuaa heta mbaʼe Satanás ha umi demóniogui. Upéicharõ jepe, ndoikói omombeʼu mbaʼépa ojapo vaʼekue umi espíritu aña. Jesús oikuaauka kuri heta mbaʼe Jehovágui, ndahaʼéi oikóva omopropagánda Satanáspe. Ñande jasegi Jesús ehémplo ha ndajaikói ñamombeʼu umi káso oñeʼẽva demoniokuérare. Upéva rangue,  umi mbaʼe jaʼéva rupive jahechauka vaʼerã pe añetegua oĩha ñande pyʼapýpe (Sal. 45:1).

14, 15. a) ¿Mbaʼérepa natekotevẽi jakyhyjeterei umi espíritu añágui? b) ¿Mbaʼérepa ikatu jaʼe Jehová oproteheha ipuévlope ñane tiémpope?

¹⁴ Ani jakyhyjeterei umi espíritu añágui. Ko múndope ikatu hína oiko ñanderehe heta mbaʼe vai, por ehémplo, ikatu jaju ñañaksidenta, ñanderasy térã ñamano voi ñahaʼarõʼỹve jave. ¿Ikatúpa jaʼe koʼã mbaʼe oikoha umi demónio káusare? La Biblia ombohovái ko porandu heʼívo enterovévape ohupytynteha voi “umi desgrásia ohaʼarõʼỹve jave” (Ecl. 9:11). Jehová ohechauka porã vaʼekue ipoderosoiteveha umi demoniokuéragui. Por ehémplo, haʼe nopermitíri vaʼekue Satanás ojuka Jóbpe (Job 2:6). Moisés tiémpope avei Jehová ohechauka vaʼekue ipoderosoveha umi saserdóte ojapóvagui máhia oĩ vaʼekue Egíptope (Éx. 8:18; 9:11). Jehová avei omeʼẽ vaʼekue Jesúspe pe podér ikatu hag̃uáicha omosẽ yvágagui Satanás ha idemoniokuérape. Hiʼarive koʼẽrõitéma omombóta chupekuéra pe yvykua pypukúpe, ha upépe haʼekuéra ndaikatumoʼãvéima operhudika avavépe (Apoc. 12:9; 20:2, 3).

¹⁵ Ñande jareko hetaiterei pruéva ohechaukáva Jehová oproteheha ipuévlope ñane tiémpope. Por ehémplo, epensamíntena mbaʼéichapa ko múndo tuichakuére japredika ha ñamboʼe hína umi héntepe pe añetegua (Mat. 28:19, 20). Upéicha rupi heta persóna ohechakuaa umi mbaʼe vai Satanás ojapóva. Añetehápe Satanás ojokoseterei ko tembiapo, péro haʼe ndaikatúi ojapo upéva. Jahechaháicha, natekotevẽi jakyhyjeterei umi espíritu añágui. Jehová “omaña porã hína opa mbaʼe oikóvare ko yvy ape ári, ohechauka hag̃ua ipodér umi ojeroviávape hese ikorasõ mbytete guive” (2 Crón. 16:9). Ñande ñandefiélramo Jehovápe, umi demónio ndojapomoʼãi ñanderehe peteĩ mbaʼe Jehová ndaikatumoʼãiva osolusiona.

16, 17. Emombeʼu peteĩ ehémplo ohechaukáva ñandepyʼaguasu vaʼerãha ñañemoĩ hag̃ua umi espíritu añáre.

¹⁶ Añetehápe tekotevẽ ñandepyʼaguasu ñañemoĩ hag̃ua umi espíritu añáre. Ha koʼýte upéva ijetuʼu ñane amigokuéra térã ñane hénte  ojapo porãségui ñandejopýramo japartisipa hag̃ua umi kostúmbre osegívape hikuái. Péro Jehová ovendesi umi ipyʼaguasúvape. Jahechamína mbaʼépa oiko vaʼekue peteĩ ermána Ghanaguáre hérava Erica. Haʼe oreko kuri 21 áño oñepyrũrõ guare ostudia la Biblia. Itúa haʼe rupi echiséro, entéronte ohaʼarõ Erica opartisipa umi rríto espiritístape, por ehémplo hoʼu vaʼerã soʼo ojesakrifikáva itúa dioskuérape. Erica odesidírõ guare ndojapomoʼãiha upéva, ihentekuéra ojagarra vaieterei ha heʼi voi oinsultaha umi dioskuérape. Haʼekuéra opensa upe haguére umi dios ikatuha ombotavyrai chupekuéra térã omondo chupekuéra oimehaichagua mbaʼasy.

¹⁷ Erica hentekuéra ojopy chupe osegi hag̃ua upe kostúmbre, péro haʼe noñentregái, jepe oñemosẽ hógagui upe haguére. Unos kuánto Testígo orresivi chupe hogapekuéra, péicha Jehová ovendesi Erícape omeʼẽvo chupe peteĩ família pyahu oĩháme ermáno ha ermána espirituál (Mar. 10:29, 30). Ihentekuéra omboyke chupe ha hiʼarive ohapypa ikosakuéra. Upéicharõ jepe haʼe osegi iñeʼẽrendu Jehovápe, ojevautisa ha koʼág̃a oservi kómo prekursóra rregulár. Erica ndokyhyjevéima umi demóniogui, ha heʼi ihentekuérare: “Káda día ajerure Ñandejára ñanderayhuetévape omeʼẽ hag̃ua oportunida che hentekuérape ikatu hag̃uáicha oikuaa ha oservi chupe, péicha ikatúta avei ovyʼa hikuái ha ojelivera”.

18. ¿Mbaʼe vendisiónpa jahupytýta jajeroviáramo Jehováre?

¹⁸ Añetehápe ningo naentéroi ohasa peichagua pruéva ijetuʼuetéva. Upéicharõ jepe, ñañemoĩ vaʼerã umi espíritu añáre ha jajerovia Jehováre. Jajapóramo péicha, jahupytýta heta mbaʼe porã. Por ehémplo, Satanás nañanembotavymoʼãi, núnka ndajahejamoʼãi Jehovápe jakyhyjégui umi demóniogui, ha la iñimportanteveha, ñañemoag̃uivéta Jehováre. Disípulo Santiago heʼi vaʼekue: “Peñakarama hatãkena Ñandejárare; péro peñemoĩ mbaretéke pe Añáre ha haʼe odiparáta pendehegui. Peñemoag̃uíkena Ñandejárare, ha haʼe oñemoag̃uíta penderehe” (Sant. 4:7, 8).