¿Mbaʼérepa Jesús omano mboyvemi osita vaʼekue umi mbaʼe David heʼi vaʼekue Salmo 22:1-pe?

Omano mboyvemi, Jesús heʼi vaʼekue umi mbaʼe jatopáva Mateo 27:46 ha Marcos 15:34-pe: “Ñandejára, Ñandejára, ¿mbaʼére piko chereja rei?”. Heʼívo upéva, Jesús okumpli hína kuri umi mbaʼe David heʼi vaʼekue Salmo 22:1-pe. Jesús ndeʼíri vaʼekue koʼã mbaʼe oñedesepsionágui Ñandejáragui, térã oúgui ijerovia kangy upe moméntope. Haʼe ningo oikuaa porã kuri mbaʼérepa tekotevẽ omano, ha oĩ kuri dispuésto ojapóvo upéva (Mat. 16:21; 20:28). Jesús oikuaa vaʼekue avei og̃uahẽvo pe tiémpo omano hag̃ua, Jehová ndaikatumoʼãveimaha oprotehe chupe (Job 1:10). Jehová ojapo upéva ikatu hag̃uáicha Jesús ohechauka osegitaha ifiél omano meve, ohasa asyetereítaramo jepe upe mboyve (Mar. 14:35, 36).

¿Mbaʼérepa upéicharõ Jesús heʼi vaʼekue umi mbaʼe jatopáva pe sálmope? Ndajaikuaaporãi ningo mbaʼérepa haʼe heʼi vaʼekue upéva, péro jahechamína mbaʼépa oiméne omomýi raʼe chupe. *

Oiméne Jesús oipota raʼe enterove ohechakuaa Jehová ndojapomoʼãiha mbaʼeve pono ojejuka chupe. Jesús ningo opaga vaʼerã kuri pe rreskáte Jehová oipytyvõʼỹre chupe. Tekotevẽ vaʼekue haʼe “omano enterove rehehápe” (Heb. 2:9).

 Oiméne Jesús heʼi raʼe upéva ikatu hag̃uáicha umi hénte imanduʼa upe salmo kompletoitére. Upe tiémpope umi judío ojepokuaa vaʼekue oikuaa de memória umi salmo. Haʼekuéra ohendu jave peteĩ versíkulo peteĩ sálmogui, ensegídama voi imanduʼapa pe salmo kompletoitére. Oimérõ upéva raʼe la Jesús idéa, haʼe oiméne oipytyvõ raʼe isegidorkuéra judíope, imanduʼa hag̃ua upe sálmope oĩha heta profesía oñekumplíva haʼe omano mboyvemi (Sal. 22:7, 8, 15, 16, 18, 24). Avei opakuévo ko salmo oñemombaʼeguasu Jehovápe, ha heʼi oikotaha chugui Rréi ha ogovernataha ko yvy kompletoite (Sal. 22:27-31).

Oiméne Jesús ohechaukase raʼe ojejuka reieteha chupe. Jesúspe ojejuka mboyve, pe Sanedrín ojapo vaʼekue chupe peteĩ huísio ilegál, ha heʼi hikuái Jesús oñeʼẽ hague Ñandejára kóntrape (Mat. 26:65, 66). Upe huísio ningo ojejapo vaʼekue pyaʼe pyaʼe peteĩ pyharepyte, ha noñekumpliriete voi umi léi upe tiémpope guare (Mat. 26:59; Mar. 14:56-59). Upéicharõ, Jesús heʼírõ guare “Ñandejára, Ñandejára, ¿mbaʼére piko chereja rei?”, haʼe oiméne ohechaukase ndojapói hague mbaʼeve omerese hag̃uáicha ojejuka chupe upéicha.

Oiméne Jesús omomanduʼase umi héntepe David jepe ohasa asy hague, péro upéva ndeʼiséi kuri Jehová ndoguerohoryveimaha chupe. David ndojapói vaʼekue upe porandu ndojeroviavéi rupi Jehováre. Pórke heʼi rire upéva, David ohechauka ojeroviaha Jehová osalvataha ipuévlope ha osegitaha ovendesi chupe (Sal. 22:23, 24, 27). Upéicha avei Jesús, haʼéva ‘David Raʼy’, osufríramo jepe peteĩ yvyra ojetorturaháre, upéva ndeʼiséi kuri Jehová ndoguerohoryveimaha chupe (Mat. 21:9).

Oiméne Jesús ohechaukase raʼe ombyasyetereiha Itúa ndoprotehevéima haguére chupe, ikatu hag̃uáicha ohechauka ifieltaha omano meve. Jehová ningo núnka ndoipotái vaʼekue Itaʼýra ohasa asy ha omano. Upéva tekotevẽ vaʼekue oiko Adán ha Eva opuʼã rupínte Ñandejárare. Jesús ndojapói vaʼekue mbaʼeve ivaíva, péro haʼe osufri ha omano vaʼerã kuri ombohovái hag̃ua umi mbaʼe Satanás okuestiona vaʼekue, ha opaga hag̃ua pe rreskáte ikatu hag̃uáicha umi yvypóra oreko jey upe Adán operde vaʼekue (Mar. 8:31; 1 Ped. 2:21-24). Upéva ikatúta kuri ojehupyty Jehová ndoprotehevéiramo añoite Itaʼýrape por primera ves.

Oiméne Jesús oipytyvõse raʼe idisipulokuérape opensa hag̃ua mbaʼérepa Jehová opermiti haʼe omano upéicha. * Jesús oikuaa vaʼekue ojejukáramo chupe peteĩ yvyra ojetorturaháre ojejukaháicha jepi peteĩ kriminálpe, upéva omoñepysangataha hetápe (1 Cor. 1:23, nóta). Isegidorkuéra ojepyʼamongetáramo mbaʼérepa añetehápe haʼe omano, nopensamoʼãi Jesús rehe haʼeha peteĩ kriminál, síno ohechakuaáta omano hague osalva hag̃ua chupekuéra (Gál. 3:13, 14).

Tahaʼe haʼéva pe omomýiva Jesúspe heʼi hag̃ua koʼã mbaʼe, haʼe oikuaa vaʼekue omano vaʼerãha pe yvyra ojetorturaháre okumpli hag̃ua Jehová volunta. Osita riremínte upe salmo, Jesús heʼi vaʼekue: “Ajapopaitéma umi mbaʼe nde rejerure vaʼekue chéve” (Juan 19:30; Luc. 22:37). Jehová ndoprotehevéi rupi Jesúspe sapyʼaitemi, haʼe ikatu vaʼekue ojapopaite umi mbaʼe oñehaʼarõva chugui ko yvy ape ári. Avei ikatu vaʼekue okumpli entéro mbaʼe ojeskrivi vaʼekue hese “Moisés léipe ha umi Sálmope, avei umi mbaʼe oskrivi vaʼekue umi Proféta” (Luc. 24:44).